លោក ទៀ បាញ់ រដ្ឋមន្ត្រីក្រសួងការពារជាតិ នៅថ្ងៃទី១៣ តុលា បានប្រាប់ក្រុមអ្នកសារព័ត៌មានថា កម្ពុជាពិតជាអាក់អន់ចិត្ត ដែលសហរដ្ឋអាមេរិក មកបំផ្លិចបំផ្លាញប្រទេសកម្ពុជាហើយ តែមិនសហការចូលរួមដោះស្រាយ។
លោក ទៀ បាញ់ អះអាងដូចនេះ នៅពេលសួរសុខទុក្ខពលរដ្ឋរស់នៅក្នុងភូមិគគីរ ស្រុករមាសហែក ខេត្តស្វាយរៀង ដែលជាតំបន់គ្រាប់បែកគីមីសហរដ្ឋអាមេរិក បានបន្សល់ទុកពីសម័យសង្គ្រាម។ លោកបន្តទៀតថា កម្ពុជានឹងព្យាយាមបោសសំអាតគ្រាប់បែកគីមី ដែលបន្សល់ដោយអាមេរិកនេះ ឲ្យអស់ចេញពីឃុំគគីរ ពីព្រោះគ្រាប់បែកគីមីទាំងនេះ កំពុងបំផ្លាញសុខភាពប្រជាពលរដ្ឋខ្មែរយ៉ាងខ្លាំង។
ចំណែក រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ក៏បានដឹកនាំក្រុមការងារចុះទៅទីតាំង ដែលមានគ្រាប់គីមី របស់អាមេរិកនៅឃុំគគីរ ហើយបានរកឃើញក្មេង៣នាក់ ដែលកើតមកខុសប្រក្រតីដែលលោកអះអាងថា អាចបណ្ដាលមកពីផលប៉ះពាល់ពីការសាយភាយគ្រាប់បែកគីមីនេះ។ កុមារទាំង៣នាក់នោះ ត្រូវបានបញ្ជូនទៅរាជធានីភ្នំពេញ ដើម្បីតាមដានសភាពជំងឺរបស់កុមារទាំង៣នាក់នោះហើយ។
អាស៊ីសេរី មិនអាចទាក់ទងសុំការបំភ្លឺពី មន្ត្រីស្ថានទូតសហរដ្ឋអាមេរិក ជុំវិញការលើកឡើងរបស់រដ្ឋមន្ត្រីក្រសួងសុខាភិបាល អំពីផលប៉ះពាល់ដល់សុខភាពរបស់កុមារទាំងបីនាក់ ដោយសារការសាយភាយគ្រាប់បែកគីមីនោះទេ។
ក៏ប៉ុន្តែ ឯកអគ្គរដ្ឋទូតអាមេរិកលោក វីល្លៀម ហៃដ្ដ៍ (William Heidt) ធ្លាប់លាតត្រដាងថា សហរដ្ឋអាមេរិកបានចំណាយថវិកាអស់ជាង ១៦០លានដុល្លារ ក្នុងកិច្ចប្រឹងប្រែង ដើម្បីជួយដោះមីន និងគ្រាប់មិនទាន់ផ្ទុះនៅកម្ពុជា។ លោកថា ពាក់កណ្ដាលនៃទឹកប្រាក់នេះ ត្រូវបានប្រើប្រាស់ សម្រាប់ដោះមីនរបស់ចិន សូវៀត និងវៀតណាម នៅភាគខាងលិចប្រទេស គឺនៅតាមចម្ការមីនដែលមានគ្រោះថ្នាក់ ១០ ដងលើសគ្រាប់ដែលទម្លាក់ដោយអាមេរិក។ មន្ត្រីនាំពាក្យអាមេរិកធ្លាប់បញ្ជាក់ថា រដ្ឋាភិបាលកម្ពុជាមិនបានស្នើឲ្យអាមេរិកជួយដោះស្រាយបញ្ហាគ្រាប់គីមីនេះទេ ហើយបន្ថែមថា កម្ពុជាអាចប្រើប្រាស់ថវិកាអាមេរិកដែលត្រៀមសម្រាប់ដោះមីន ដើម្បីយកទៅដោះស្រាយបញ្ហាគ្រាប់គីមីទាំងនោះ៕