ថ្ងៃទី១០ ខែកញ្ញា នេះ គឺជាខួប ១៤ខែគត់ ដែលអ្នកវិភាគសង្គម លោកបណ្ឌិត កែម ឡី ត្រូវបានឃាតកបាញ់សម្លាប់។ លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់នៅថ្ងៃទី១០ ខែកក្កដា ឆ្នាំ២០១៦ នៅហាងស្តារម៉ាត (Star Mart) ក្បែរស្តុបបូកគោ។
ក្រោយពីឃាតកម្មបាញ់លោកបណ្ឌិត កែម ឡី តែប៉ុន្មាននាទី អាជ្ញាធរចាប់បានជនសង្ស័យម្នាក់ដែលអះអាងខ្លួនឯងថាឈ្មោះ ជួប សម្លាប់។ ជួប សម្លាប់ ដែលសាក្សី និងឯកសារបញ្ជាក់ថាឈ្មោះ អឿត អាង ត្រូវបានសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារអស់មួយជីវិតកាលពីខែមីនា ឆ្នាំ២០១៧ ដោយជាប់ចោទពីបទឃាតកម្មគិតទុកជាមុន និងកាន់កាប់អាវុធខុសច្បាប់។
ទោះជាយ៉ាងនេះក្ដី សាធារណជននៅតែចង់ឲ្យតុលាការស្វែងរកមេខ្លោងដែលបញ្ជាឲ្យសម្លាប់បណ្ឌិត កែម ឡី ជាបន្តទៀត ដោយពួកគេជឿថា ការបាញ់សម្លាប់បណ្ឌិត កែម ឡី ជាហេតុផលនយោបាយ មិនមែនដោយសារបណ្ឌិត កែម ឡី ជំពាក់លុយ ៣ពាន់ដុល្លារដូចការអះអាងរបស់ ជួប សម្លាប់ នោះទេ៕