អ្នកនាំពាក្យគណបក្សកាន់អំណាច លោក សុខ ឥសាន លើកឡើងថា ប្រសិនបើម្ចាស់កាសែត ឌឹ ខេមបូឌា ដេលី (The Cambodia Daily) ដែលបានបង្ខំបិទទ្វារដោយរឿងពន្ធជាង ៦លានដុល្លារសហរដ្ឋអាមេរិក ចង់បញ្ចប់បញ្ហា ត្រូវបង់ប្រាក់ជំពាក់ពន្ធជាមុនសិន។ ការថ្លែងនេះ ក្រោយពេលសារព័ត៌មានគាំទ្ររដ្ឋាភិបាលបញ្ចេញព័ត៌មានថា ម្ចាស់កាសែតនេះបានផ្ញើលិខិតសុំការអន្តរាគមន៍ពីលោកនាយករដ្ឋមន្ត្រី ហ៊ុន សែន។
បន្ទាប់ពីកាសែត ឌឹ ខេមបូឌា ដេលី ឈប់ដំណើរការអស់ពេលជិត ១សប្តាហ៍ លិខិតរបស់អ្នកគ្រប់គ្រងនៃកាសែតជាភាសាអង់គ្លេសនេះ អ្នកស្រី ដេបូរ៉ា គ្រីស័រស្ទៀល (Deborah Krisher-Steele) ត្រូវបានផ្សព្វផ្សាយដោយម៉ាស៊ីនឃោសនាស្និទ្ធនឹងរដ្ឋាភិបាល។
លិខិតនោះបានឲ្យដឹងថា អ្នកស្រី ដេបូរ៉ា គ្រីស័រស្ទៀល (Deborah Krisher-Steele) បានលើកសរសើរគោលនយោបាយរបស់លោកនាយករដ្ឋមន្ត្រី ហើយបានសុំលោក ហ៊ុន សែន ជួយសម្របសម្រួលជម្លោះពន្ធនេះ។
កាលពីដើមខែសីហា លិខិតមួយរបស់អគ្គនាយកដ្ឋានពន្ធដារ បានចោទម្ចាស់កាសែតនេះថាគេចវេះមិនបង់ពន្ធដែលមានទំហំទឹកប្រាក់ចំនួន ២៥ពាន់លានរៀល ឬប្រហែល ៦លាន ៣សែនដុល្លារ ក៏ប៉ុន្តែភាគីម្ចាស់កាសែតបានបដិសេធ ហើយបានអះអាងថា ខ្លួនតែងបង់ពន្ធតាមច្បាប់រួចរាល់។
នៅក្នុងសេចក្តីប្រកាសព័ត៌មានស្ដីពីការបិទកាសែត ឌឹ ខេមបូឌា ដេលី បន្ទាប់ពីបានបោះពុម្ពផ្សាយចំនួន ២៤ឆ្នាំ និង ១៥ថ្ងៃ ម្ចាស់កាសែតបានថ្លែងថា អំណាចពន្ធ គឺជាអំណាចដែលមានចេតនាបំផ្លាញ ដោយលើកឡើងពីការកំណត់ថ្លៃពន្ធខ្ពស់កប់ពពក ការបែកធ្លាយតាមបណ្ដាញព័ត៌មានគាំទ្ររដ្ឋាភិបាល និងសេចក្តីថ្លែងការណ៍មិនពិតដោយនាយកដ្ឋានពន្ធដារ និងការនិយាយមួលបង្កាច់ជាសាធារណៈដោយប្រមុខរដ្ឋាភិបាលមុនពេលសវនកម្ម ដែលវាខុសឆ្ងាយពីដំណើរការស្របច្បាប់។
កាសែត ឌឹ ខេមបូឌា ដេលី បានព្រួយបារម្ភថា ការដាក់សម្ពាធលើប្រព័ន្ធផ្សព្វផ្សាយជាបន្តបន្ទាប់មុនការបោះឆ្នោតសកលអាណត្តិទី៦ មកដល់នៅឆ្នាំ២០១៨ នឹងត្រូវធ្វើក្នុងភាពងងឹត ហើយរដ្ឋាភិបាលនឹងប្រើអំណាចដែលមានទាំងប៉ុន្មានដើម្បីគាស់អ្នកប្រឆាំង និងបិទមាត់អ្នកដែលអាចមានការយល់ឃើញផ្សេងពីរដ្ឋាភិបាល។
ទោះបីជាយ៉ាងណា សេចក្តីក្នុងលិខិតដែលត្រូវបានផ្សព្វផ្សាយ អ្នកស្រី ដេបូរ៉ា គ្រីស័រស្ទៀល (Deborah Krisher-Steele) គ្រួសារអ្នកស្រីមិនមានបំណងគេចវេះមិនបង់ពន្ធនោះទេ ហើយថាការបិទកាសែតរបស់អ្នកស្រី ក៏មិនជាប់ពាក់ព័ន្ធនឹងរឿងនយោបាយដែរ ដែលនេះគ្រាន់ជារឿងចៃដន្យ។
មុនពេលការបិទកាសែតនេះ ដែលម្ចាស់មានសញ្ជាតិអាមេរិក ស្ថាប័នដែលទទួលជំនួយពីសហរដ្ឋអាមេរិកមួយចំនួន ដូចជាវិទ្យាស្ថានជាតិប្រជាធិបតេយ្យ (NDI) ត្រូវបង្ខំឲ្យវេចបង្វេចចេញពីកម្ពុជា ស្ថានីយវិទ្យុក្នុងស្រុកដែលចាក់ផ្សាយឡើងវិញនូវកម្មវិធីព័ត៌មានរបស់វិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) ត្រូវបញ្ជាឲ្យផ្អាកការផ្សាយបន្ត ឬបិទស្ថានីយទាំងមូល។
នៅក្នុងលិខិតមួយទៀតដែលត្រូវបានផ្សព្វផ្សាយនៅកាសែតដើមអំពិលរបស់លោក សយ សុភាព លោក បឺណាដ គ្រីស័រ (Bernard Krisher) ដែលជាអតីតម្ចាស់កាសែត ឌឹ ខេមបូឌា ដេលី និងជាឪពុករបស់អ្នកស្រី ដេបូរ៉ា គ្រីស័រស្ទៀល (Deborah Krisher-Steele) បានស្នើលោកនាយករដ្ឋមន្ត្រី ហ៊ុន សែន ទុកឲ្យលោកជាអ្នកទទួលខុសត្រូវរឿងពន្ធនេះ។
បើតាមលិខិតនោះ លោក បឺណាដ គ្រីស័រ (Bernard Krisher) បានអះអាងថា កូនស្រីរបស់លោកទើបបានគ្រប់គ្រងកាសែត ខេមបូឌា ដេលី រយៈពេល ៤ខែប៉ុណ្ណោះ ដែលមិនជាប់ពាក់ព័ន្ធនឹងរឿងលុយពន្ធដែលអគ្គនាយកដ្ឋានពន្ធដារបានទាមទារ ដោយសារកូនរបស់លោកបានទិញទ្រព្យសម្បត្តិកាសែត ឌឹ ខេមបូឌា ដេលី ពីលោកកាលពីខែមីនា ឆ្នាំ២០១៧ ដោយបានធ្វើត្រឹមត្រូវទៅតាមច្បាប់។
យ៉ាងណាក៏ដោយ អាស៊ីសេរី មិនអាចសុំការបញ្ជាក់ពីភាគីកាសែត ឌឹ ខេមបូឌា ដេលី អំពីលិខិតទាំងពីរនេះបាននោះទេត្រឹមម៉ោងផ្សាយនៅថ្ងៃទី១០ ខែកញ្ញា។
មុនថ្ងៃទី៤ កញ្ញា ដែលជាថ្ងៃឱសានវាទឲ្យកាសែត ឌឹ ខេមបូឌា ដេលី បង់ពន្ធជាង ៦លានដុល្លារ ឬត្រូវវេចបង្វេចចេញ អ្នកកាសែតដែលស្និទ្ធនឹងមន្ត្រីគណបក្សកាន់អំណាច លោក សយ សុភាព ដែលធ្លាប់ចេញមុខធ្វើជាអ្នកសម្របសម្រួលនយោបាយ បានជួបអ្នកគ្រប់គ្រងកាសែត ឌឹ ខេមបូឌា ដេលី និងបានផ្តល់យោបល់ ហើយបានអះអាងថា ប្រសិនបើកាសែត ឌឹ ខេមបូឌា ដេលី ធ្វើតាមការណែនាំរបស់លោក កាសែតនេះនឹងមិនត្រូវបិទទ្វារនោះទេ។
ការអះអាងនេះ ត្រូវបានកាសែត ឌឹ ខេមបូឌា ដេលី បានយល់ថា អ្វីដែលលោក សយ សុភាព បានព្យាយាមធ្វើ គឺដើម្បីជួយខ្លួនឯងប៉ុណ្ណោះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងក្នុងតេឡេក្រាម (Telegram) ថា សំណើសុំលើកលែងការបង់ពន្ធរបស់ម្ចាស់កាសែត ឌឹ ខេមបូឌា ដេលី មិនអាចទទួលយកបានទេ។ លោកបន្តថា ម្ចាស់កាសែតមិនអាចដោះស្រាយរឿងពន្ធនេះដោយសរសេរក្រដាសមួយសន្លឹកបាននោះទេ ហើយថា «កុំចង់លេងបួនសន្លឹកដាក់ប្រមុខរាជរដ្ឋាភិបាលបែបនេះ មិនបានជាដាច់ខាត»៕