លទ្ធផលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០១៧ នេះបង្ហាញថា ចំនួនសិស្សប្រឡងជាប់ទូទាំងប្រទេសមានចំនួនប្រមាណជាង ៦៣ភាគរយ ក្នុងចំណោមបេក្ខជនប្រឡងសរុបជិត ១០ម៉ឺននាក់។ រីឯសង្គមស៊ីវិលសម្ដែងការសាទរ និងស្នើឲ្យក្រសួងបន្តពង្រឹងគុណភាពអប់រំទាំងទីប្រជុំជន និងជនបទឲ្យស្មើភាពគ្នា ព្រមទាំងជួយផ្តល់មធ្យោបាយ និងជម្រើសដល់សិស្សដែលធ្លាក់បាក់ឌុប។
អត្រាសិស្សប្រឡងជាប់បាក់ឌុបទាំងជាប់និទ្ទេសល្អ និងមិនសូវល្អ ចាប់ផ្តើមកើនឡើងវិញពីរឆ្នាំជាប់គ្នា បន្ទាប់ពីក្រសួងអប់រំ បានដាក់វិធានការកំណែទម្រង់វិស័យអប់រំក្រោមពាក្យស្លោក «អ្នកចេះគឺជាប់»។
លទ្ធផលដែលប្រកាសដោយក្រសួងអប់រំនៅថ្ងៃទី១០ ខែកញ្ញា បង្ហាញថា បេក្ខជនប្រឡងជាប់មានចំនួន ៦៣.៦៦៨នាក់ ស្មើប្រមាណ ៦៣% (៦៣,៨៤%) ក្នុងចំណោមបេក្ខជនមានវត្តមានប្រឡងចំនួនជិត ១០ម៉ឺននាក់ (៩៩.៧២៨នាក់)។ ក្នុងចំណោមបេក្ខជនប្រឡងជាប់មានអ្នកជាប់និទ្ទេសអេ (A) ចំនួន ៤២៤នាក់ និទ្ទេសប៊ី (B) មានចំនួន ២.៤៦៤នាក់ និទ្ទេសស៊ី (C) ចំនួន ៥.០០០នាក់ និទ្ទេសឌី (D) ៩.១២៣នាក់ និងនិទ្ទេសអ៊ី (E) ចំនួន ៤៦.៦៥៧នាក់។ ក្នុងចំណោមបេក្ខជនទទួលបាននិទ្ទេសអេ (A) ចំនួន ៤២៤នាក់នោះ មាន ១៩៤នាក់មកពីរាជធានីភ្នំពេញ ខេត្តសៀមរាប មានចំនួន ៤៧នាក់ និងខេត្តកណ្តាល មានសិស្សជាប់និទ្ទេសអេ (A) ចំនួន ២៦នាក់។ ចំណែកខេត្តមណ្ឌលគិរី រតនគិរី ស្ទឹងត្រែង និងខេត្តឧត្តរមានជ័យ គ្មានសិស្សជាប់និទ្ទេសអេ (A) ទេ។
ទន្ទឹមគ្នានេះ ក្រសួងក៏ប្រកាសដែរថាមានបេក្ខជនចំនួន ២៨រូបត្រូវបានកំណត់ឲ្យធ្លាក់ជាស្វ័យប្រវត្តិ ដោយសារបានប្រព្រឹត្តកំហុសឆ្គង ដូចជាករណីប្រឡងជំនួស ប្ដូរលេខតុ លួចចម្លង ប្រើប្រាស់ទូរស័ព្ទដៃ យកសំណៅឯកសារ និងម៉ាស៊ីនគិតលេខចូលក្នុងបន្ទប់ប្រឡង។
អាស៊ីសេរី មិនអាចសុំការអធិប្បាយបន្ថែមពីអ្នកនាំពាក្យក្រសួងអប់រំ លោក រស់ សាលីន បានទេនៅថ្ងៃទី១០ ខែកញ្ញា ដោយទូរស័ព្ទរបស់លោកមិនអាចទាក់ទងបាន។ ចំណែករដ្ឋមន្ត្រីក្រសួងអប់រំ លោក ហង់ ជួន ណារ៉ុន មិនលើកទូរស័ព្ទ។
សិស្សម្នាក់នៅរាជធានីភ្នំពេញដែលប្រឡងជាប់និទ្ទេសស៊ី (C) បង្ហាញអារម្មណ៍រីករាយ និងទទួលស្គាល់ថា លទ្ធផលនេះគឺយុត្តិធម៌អាចទទួលយកបាន។
ចំណែកសិស្សម្នាក់ទៀតឈ្មោះ ហួត ស្រ៊ុនហាក់ ដែលប្រឡងជាប់និទ្ទេសអេ (A) បាននិយាយក្នុងពេលដែលទៅមើលលទ្ធផលក្នុងវិទ្យាល័យទួលស្វាយព្រៃ ថាលោកមានអារម្មណ៍រំភើបចំពោះលទ្ធផលដែលសមនឹងអ្វីដែលលោកខំតស៊ូសិក្សារៀនសូត្រកន្លងទៅ៖ «»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ លើកឡើងថា កំណែទម្រង់អប់រំ ពិសេសការបន្តឹងការប្រឡងនេះ ធ្វើឲ្យសិស្សមានការរីកចម្រើន និងខិតខំរៀនសូត្រជាងមុន។ ទោះជាយ៉ាងណា លោកបន្តថា តាមរយៈលទ្ធផលនេះ ក្រសួងអប់រំ ក៏គួរតែសិក្សាស្វែងយល់ដែរដូចជា ការលើកទឹកចិត្ត និងពង្រឹងគុណភាពគ្រូបង្រៀន ព្រមទាំងផ្តល់ឱកាសសិក្សារៀនសូត្រឲ្យបានស្មើភាពគ្នារវាងទីប្រជុំជន និងជនបទ ដើម្បីឲ្យកំណែទម្រង់រឹតតែទទួលបានលទ្ធផលល្អ។
ការលើកឡើងនេះ ខណៈលោកមើលឃើញថា ឱកាសរៀនសូត្ររបស់សិស្សនៅជនបទ ជាពិសេសនៅខេត្តមួយចំនួននាភាគឦសាន ហាក់ដូចជានៅមានបញ្ហាច្រើន ព្រោះលទ្ធផលបង្ហាញថាគ្មានសិស្សជាប់និទ្ទេសអេ (A)៖ «»។
ទន្ទឹមគ្នានេះ លោក សន ជ័យ ក៏ស្នើឲ្យក្រសួងអប់រំ និងក្រសួងការងារ គួរតែគិតគូរផ្តល់មធ្យោបាយ ឬជម្រើសឲ្យបានទាន់ពេលវេលាសម្រាប់សិស្សដែលធ្លាក់បាក់ឌុប ដូចជាបណ្តុះបណ្តាលការងារវិជ្ជាជីវៈ និងលើកទឹកចិត្តយ៉ាងណាឲ្យពួកគេនៅតែបន្តសិក្សា ដើម្បីទប់ស្កាត់ការធ្វើចំណាកស្រុក និងបញ្ហាប្រឈមនានា៖ «»។
នេះជាឆ្នាំទី៤ នៃការធ្វើកំណែទម្រង់ប្រព័ន្ធអប់រំរបស់លោករដ្ឋមន្ត្រី ហង់ ជួន ណារ៉ុន។ កាលពីឆ្នាំ២០១៤ អត្រាអ្នកប្រឡងជាប់មាន ២៦ភាគរយ ដែលថយពី ៨០ភាគរយនៅឆ្នាំ២០១៣។ ចំណែកនៅបណ្តាឆ្នាំបន្ទាប់មក អត្រានេះកើនឡើងវិញ ដូចជានៅឆ្នាំ២០១៦ អត្រាសិស្សប្រឡងជាប់មាន ៦២ភាគរយ ហើយនៅឆ្នាំ២០១៧ នេះ អត្រាសិស្សប្រឡងជាប់ជាង ៦៣ភាគរយ។
សម្រាប់ថ្ងៃទី១០ ខែកញ្ញា លទ្ធផលប្រឡងត្រូវបានប្រកាសសម្រាប់រាជធានីភ្នំពេញ និងខេត្តកណ្ដាល ចំណែកលទ្ធផលសម្រាប់ខេត្តដទៃទៀត នឹងប្រកាសនៅថ្ងៃទី១១ ខែកញ្ញា៕