ប្រជាពលរដ្ឋនៅឃុំក្រយា ស្រុកសន្ទុក ខេត្តកំពង់ធំ បញ្ជាក់ថា មន្ត្រីរដ្ឋបាលព្រៃឈើបានបង្ខំពលរដ្ឋឲ្យដកដំណាំចេញពីដីចម្ការរបស់ខ្លួន ដោយអះអាងថាជាដីរបស់រដ្ឋ។ ពួកគាត់យល់ថា ករណីនេះមិនត្រឹមត្រូវឡើយ ត្បិតដីតំបន់នោះពលរដ្ឋកាន់កាប់ជាច្រើនឆ្នាំមកហើយ។ ម្យ៉ាងទៀត អាជ្ញាធរស្រុក និងខេត្ត ក៏បានយល់ព្រមឲ្យពួកគាត់អាស្រ័យផលលើដីនោះដែរ។ ចំណែកមន្ត្រីរដ្ឋបាលព្រៃឈើ អះអាងថា ពួកគាត់មិនមែនជាពលរដ្ឋសាមញ្ញទេ ប៉ុន្តែជាឈ្មួញ ហើយនាំគ្នាចូលកាន់កាប់ដីរបស់រដ្ឋដោយខុសច្បាប់។
ពលរដ្ឋមានទំនាស់ដីធ្លីជាមួយរដ្ឋបាលព្រៃឈើនៅឃុំក្រយា ស្នើសុំឲ្យអាជ្ញាធរខេត្តជួយអន្តរាគមន៍ឲ្យពួកគាត់បានដាំដំណាំលើដីរបស់ខ្លួនធ្លាប់កាន់កាប់ ដោយគ្មានការភ័យខ្លាច។
ការលើកឡើងនេះ គឺក្រោយពេលដែលមន្ត្រីរដ្ឋបាលព្រៃឈើ ប្រាប់ពលរដ្ឋកាលពីថ្ងៃទី៦ កញ្ញា ឲ្យដកដំណាំរបស់ខ្លួន រួមមានដំឡូង និងស្វាយចន្ទីចេញពីដីមានទំនាស់ ក្រោមហេតុផលថា ដីនោះជាដីព្រៃរបស់រដ្ឋ ហើយការចូលអាស្រ័យផលកន្លងទៅរបស់ពួកគាត់ គឺខុសច្បាប់។
តំណាងពលរដ្ឋនៅឃុំក្រយា លោក សួស គឹមសួន អះអាងថា ពលរដ្ឋដែលធ្លាប់ទាមទារសិទ្ធិអាស្រ័យផល និងកាន់កាប់ដីនៅចំណុចអូរបឹងរូង មានចំនួនជាង ២០គ្រួសារ លើទំហំដីជាង ២០ហិកតារ។ លោកបារម្ភខ្លាចមន្ត្រីជំនាញដកហូតដីពីពលរដ្ឋ ក្រោមហេតុផលអនុវត្តច្បាប់ ហើយបន្ទាប់មកអាចនឹងប្រគល់ដីនោះឲ្យទៅអ្នកទីបី៖ «លោកចៅហ្វាយខេត្តក៏បានឯកភាពតាមស្រុកអ៊ីចឹងដែរ ហើយគាត់នឹងឲ្យកូនចៅគាត់មកត្រួតពិនិត្យមើល។ ហើយខាងមេព្រៃគេប្រទាំងប្រទូស គេថាមិនឲ្យយើងទេ»។
ពលរដ្ឋសុំមិនបញ្ចេញឈ្មោះម្នាក់ឲ្យដឹងថា កាលពីដើមខែសីហា មន្ត្រីរដ្ឋបាលព្រៃឈើធ្លាប់មកបង្ខំលោកឲ្យដកដើមស្វាយចន្ទីចេញ ព្រោះតែបារម្ភ លោកសម្រេចកាប់ដើមស្វាយចន្ទីជាង ២០០ដើមចោលតែម្តង។ លោកបន្តថា ដីរបស់គាត់មានទំហំជិត ២ហិកតារ ហើយបានអាស្រ័យផលតាំងពីឆ្នាំ២០១៣។ នៅឆ្នាំ២០១៦ ទើបមន្ត្រីរដ្ឋបាលព្រៃឈើយកកូនឈើប្រណិតទៅដាំនៅក្នុងចម្ការដំឡូងរបស់ពួកគាត់៖ «ឲ្យប្រជាពលរដ្ឋខ្ញុំហ្នឹងបានដីមកវិញ ព្រោះពួកខ្ញុំខ្វះខាតណាស់មួយ»។
ទាក់ទងបញ្ហានេះ នាយខណ្ឌរដ្ឋបាលព្រៃឈើខេត្តកំពង់ធំ លោក តិប ញាតា មានប្រសាសន៍នៅថ្ងៃទី៧ កញ្ញា ថា ពួកគាត់ទាំងនោះមិនមែនជាពលរដ្ឋសាមញ្ញទេ ប៉ុន្តែជាឈ្មួញដី ហើយឈ្មោះ សួស គឹមសួន ដែលអះអាងថាជាតំណាងពលរដ្ឋ គឺជាជនសង្ស័យក្នុងករណីរុករានដីព្រៃរបស់រដ្ឋទៀតផង។ លោកបន្តថា ដីតំបន់នោះជាដីព្រៃសេសសល់ពីការវិនិយោគរបស់ក្រុមហ៊ុនវៀតណាម ឈ្មោះក្រុមហ៊ុន បាលវ៉ារៀល ហើយក៏បានបញ្ចូលជាដីព្រៃរបស់រដ្ឋវិញ។ លោកអះអាងថា ពួកគាត់ទាំងនោះចូលកាន់កាប់ក្រោយបទបញ្ជា០១ របស់រាជរដ្ឋាភិបាលកាលពីឆ្នាំ២០១២៖ «មានភស្តុតាងគ្រប់គ្រាន់ ពេលគាត់ចូលកាប់រានក៏យើងបានថត។ គាត់មិនបានចេញមុខមកអះអាងទេ។ នៅពេលដុត ក៏យើងបានថត។ គាត់មិនបានចេញមុខអះអាងទេ ហើយនៅពេលគាត់ទៅលួចដាំក៏យើងបានឃាត់»។
នាយខណ្ឌរដ្ឋបាលព្រៃឈើដដែលបញ្ជាក់បន្ថែមថា សំណុំរឿងនេះបានទៅដៃតុលាការរួចរាល់ហើយ ហើយមន្ត្រីតុលាការនឹងចាត់វិធានការតាមផ្លូវច្បាប់ ប៉ុន្តែបើពលរដ្ឋទាំងនោះមានប័ណ្ណកម្មសិទ្ធិត្រឹមត្រូវ គាត់អាចតវ៉ាជាមួយតុលាការបាន។
ដីកំពុងមានទំនាស់ គឺមិនមានព្រៃឈើនៅសល់ទៀតទេ ក្រៅពីកូនឈើប្រណិតមួយចំនួនដែលមន្ត្រីជំនាញបានដាំ និងសល់តែគល់ឈើមួយចំនួនប៉ុណ្ណោះ។ ក្រៅពីនោះជាដំណាំរបស់ពលរដ្ឋ។
មន្ត្រីសម្របសម្រួលស្តីទីអង្គការសិទ្ធិមនុស្សលីកាដូ (LICADHO) ខេត្តកំពង់ធំ លោក ឈួម រុណ យល់ឃើញថា មន្ត្រីជំនាញ និងស្ថាប័នពាក់ព័ន្ធ ត្រូវស៊ើបអង្កេតករណីនេះឲ្យបានច្បាស់លាស់។ លោកបន្តថា ប្រសិនបើពលរដ្ឋទាំងនោះក្រីក្រគ្មានដីធ្លីបង្កបង្កើនផលពិតប្រាកដ អាជ្ញាធរគប្បីផ្តល់ដីជូនពួកគាត់ដើម្បីរស់ ប៉ុន្តែបើជាក្រុមឈ្មួញដូចការលើកឡើងរបស់មន្ត្រីជំនាញ ហើយការចូលកាន់កាប់ដីតំបន់នោះធ្វើឡើងដោយខុសច្បាប់មែន ពួកគាត់អាចមានទោស៕