ចាប់ពីដើមឆ្នាំ២០១៧ រហូតមកទល់នឹងបច្ចុប្បន្ន សហគមន៍ឃុំដាក់ដាំ ស្រុកអូររាំង ខេត្តមណ្ឌលគិរី តវ៉ាទាមទារដីអភិរក្សតំបន់ទេសចរណ៍សហគមន៍ជាង ២ហិកតារ ដែលពលរដ្ឋចំណាកស្រុកឈូសឆាយហ៊ុមព័ទ្ធយកជាកម្មសិទ្ធិដោយសំអាងថា អាជ្ញាធរមូលដ្ឋានបានប្រគល់ដីនោះទៅឲ្យពួកគេពីរគ្រួសារ ក៏ប៉ុន្តែការតវ៉ានោះមិនទាន់មានដំណោះស្រាយនៅឡើយ។
ជាតិដើមភាគតិចព្នង នៅឃុំដាក់ដាំ ស្នើសុំឲ្យអាជ្ញាធរឃុំពន្លឿនដោះស្រាយទំនាស់ដីជាង ២ហិកតារ ដែលពលរដ្ឋចំណាកស្រុកកាន់កាប់ដោយខុសច្បាប់នៅក្នុងតំបន់ទេសចរណ៍សហគមន៍។នៅថ្ងៃទី៧ ខែកញ្ញា តំណាងសហគមន៍ បុគ្គលិកអង្គការក្រៅរដ្ឋាភិបាល និងអាជ្ញាធរឃុំដាក់ដាំ មានគ្នាសរុប ១០នាក់ បានចុះទៅវាស់វែងដីតំបន់ទេសចរណ៍សហគមន៍ រួមទាំងដីមានជម្លោះ ដើម្បីដាក់ជូនអាជ្ញាធរឃុំដោះស្រាយបញ្ចប់ទំនាស់ដែលអូសបន្លាយច្រើនខែមកហើយ។
តំណាងសហគមន៍ដាក់ដាំ លោក ពើល ធិ បញ្ជាក់ថា ការវាស់វែងចុងក្រោយនេះ គឺសហគមន៍ និងអាជ្ញាធរសំអាងទៅលើបង្គោលព្រំដីដែលមន្ទីរបរិស្ថានបានបោះកំណត់ផ្ទៃដីតំបន់ទេសចរណ៍ ហេតុនេះសហគមន៍ទាមទារឲ្យអាជ្ញាធរពាក់ព័ន្ធដកហូតដីដែលពលរដ្ឋចំណាកស្រុកកាន់កាប់ខុសច្បាប់ទៅប្រគល់ទុកឲ្យជាសម្បត្តិរមណីយដ្ឋានដូចដើមវិញ៖ «សហគមន៍ចង់បញ្ចប់រឿងហ្នឹងយកត្រឹមព្រំចាស់ ស៊ីម៉ង់ធំៗតាមបរិស្ថានគេរៀបចំយកតាមបង្គោលចាស់ដើម្បីប្រគល់ឲ្យសហគមន៍វិញ»។
តំបន់ទឹកធ្លាក់ជ្រៃធំ មានផ្ទៃដីប្រមាណ ៤ហិកតារឋិតនៅក្នុងភូមិពូលេះ ជាតំបន់ទឹកជ្រោះធម្មជាតិគ្រប់គ្រងដោយមន្ទីរបរិស្ថាន និងមន្ទីរទេសចរណ៍ ប៉ុន្តែស្ថាប័នទាំងពីរបានប្រគល់ទៅឲ្យសហគមន៍ថែរក្សា និងស្វែងរកប្រាក់ចំណូលពីភ្ញៀវទេសចរដែលទៅកម្សាន្តនៅតំបន់នោះជាច្រើនឆ្នាំមកហើយ។ លើសពីនេះទៀត តំបន់ទឹកជ្រោះជ្រៃធំ អាជ្ញាធរពាក់ព័ន្ធបានបោះបង្គោលសំគាល់ព្រំដីជាក់លាក់មិនអាចរំលោភបានទេ។
អតីតមេឃុំដាក់ដាំ ដែលជាអ្នកចុះហត្ថលេខាប្រគល់ដីទៅឲ្យពលរដ្ឋចំណាកស្រុក គឺលោក អាត់ ប៊ុននី ដែលបច្ចុប្បន្នលោកជាប់ឆ្នោតជាសមាជិកក្រុមប្រឹក្សាឃុំដាក់ដាំ ទទួលស្គាល់ថា ដីដែលពលរដ្ឋពីរគ្រួសារឈូសឆាយ និងហ៊ុមព័ទ្ធយកជាកម្មសិទ្ធិពិតជាឋិតក្នុងតំបន់អភិរក្សទេសចរណ៍ប្រាកដមែន និងមិនមែនជាដីដែលលោកបានចុះហត្ថលេខាប្រគល់ទៅឲ្យពលរដ្ឋចំណាកស្រុកនោះទេ។ លោកថា នឹងធ្វើរបាយការណ៍វាស់វែងពីទំហំដែលប៉ះពាល់ដីតំបន់ទេសចរណ៍ដាក់ជូនអាជ្ញាធរឃុំដោះស្រាយបញ្ហាជូនពលរដ្ឋ៖ «វាស់ដីទំនាស់ហើយ វាស់ដីការពារទៀត ដីទំនាស់នៅក្នុងដីការពារនៅក្រៅ។ គេសុំកាន់កាប់ក៏មានដែរ កំណត់តាមព្រំ ឥឡូវគេឆ្លងព្រំចង់យកអស់ហើយ»។
មន្ត្រីឃ្លាំមើលសិទ្ធិមនុស្សសមាគមអាដហុក (ADHOC) លោក សុក រដ្ឋា បញ្ជាក់ថា អាជ្ញាធរពាក់ព័ន្ធ ជាពិសេសផ្នែកជំនាញ ត្រូវកំណត់ឲ្យច្បាស់លាស់ពីអត្តសញ្ញាណដីដែលមានទំនាស់ឋិតក្នុងតំបន់អភិរក្ស ដែលជាប្រភេទដីសាធារណៈរបស់រដ្ឋ ឬយ៉ាងណា។ លោកបន្តថា មិនមានជនណាមួយមានសិទ្ធិកាន់កាប់ដីសាធារណៈរបស់រដ្ឋបានទេ។ ដូច្នេះអាជ្ញាធរមានសិទ្ធិដកហូតដីនោះមកវិញ៖ «សំខាន់អ្នកដែលដឹងថា ដីហ្នឹងជាដីសាធារណៈរបស់រដ្ឋ គឺអាជ្ញាធរដែនដីដែលគាត់គ្រប់គ្រងដែនដីហ្នឹងហើយ និងអាជ្ញាធរគ្រប់គ្រងដីរដ្ឋថ្នាក់ខេត្ត»។
របាយការណ៍អង្កេតរបស់មន្ត្រីឃ្លាំមើលសិទ្ធិមនុស្សសមាគមអាដហុក ខេត្តមណ្ឌលគិរី ឲ្យដឹងថា ដីតំបន់រមណីយដ្ឋានជ្រៃធំ គឺជាតំបន់ព្រៃដើមស្រល់ដែលអ្នកភូមិអភិរក្សសម្រាប់យកប្រភពទឹកពីជ្រោះធម្មជាតិប្រើប្រាស់ក្នុងសហគមន៍ចំនួនបីភូមិនៅតំបន់ក្បែរនោះ ជាពិសេសតំបន់នោះក៏ជាព្រៃគោរពបូជាតាមប្រពៃណីជនជាតិដើមភាគតិចទៀតផង៕