មេឃុំតាឡាត ស្រុកសេសាន ខែត្រស្ទឹងត្រែង រងការចោទថាបែងចែកតួនាទីសមាជិកក្រុមប្រឹក្សាឃុំ រើសអើងនិន្នាការនយោបាយ។ មេឃុំតាឡាត លោក សឿង ខង មកពីគណបក្សកាន់អំណាច បានសម្រេចចែកភារកិច្ចជូនក្រុមប្រឹក្សាឃុំមកពីគណបក្សប្រជាជនកម្ពុជា ទទួលបន្ទុកការងារផ្នែករដ្ឋបាលជំនួសជំទប់ទី២ មកពីគណបក្សសង្គ្រោះជាតិ។
ជំទប់ទី២ ឃុំតាឡាត ស្រុកសេសាន ខែត្រស្ទឹងត្រែង ចាត់ទុកការបែងចែកតួនាទីរបស់មេឃុំតាឡាត លោក សឿង ខង ថាជាការរំលោភអំណាចដែលជាមូលហេតុនាំឲ្យប៉ះពាល់ការបម្រើសេវាសាធារណៈជូនពលរដ្ឋ។
ជំទប់ទី២ ឃុំតាឡាត មកពីគណបក្សសង្គ្រោះជាតិ លោក មី បៃ ឲ្យដឹងនៅថ្ងៃទី៥ កញ្ញា ថា មេឃុំតាឡាត លោក សឿង ខង បានប្រជុំអនុម័តបែងចែកតួនាទីជូនជំទប់ទី១ មកពីគណបក្សប្រជាជនកម្ពុជា អនុវត្តភារកិច្ចផ្នែកសេដ្ឋកិច្ច និងហិរញ្ញវត្ថុ។ ចំណែកជំទប់ទី២ មកពីគណបក្សសង្គ្រោះជាតិ ទទួលបន្ទុកការងារផ្នែកសន្តិសុខ ហើយសមាជិកក្រុមប្រឹក្សាឃុំមកពីគណបក្សប្រជាជនកម្ពុជា លោក មួត ឃិត បែរជាមានភារកិច្ចជំនួសជំទប់ទី២ ទៅវិញ។ លោកចាត់ទុកការបែងចែកតួនាទីនេះថាផ្ទុយពីក្របខ័ណ្ឌច្បាប់៖ «ពលរដ្ឋក៏ដឹងដូចគ្នាដែររឿងច្បាប់ទម្លាប់ ព្រោះថាអ្នកធ្វើរបៀបហ្នឹងវាខុសបាទ! ខ្ញុំថារើសអើងវាខុសពីច្បាប់»។
ឃុំតាឡាត មាន ៥អាសនៈ និងមានគណបក្សនយោបាយចំនួនពីរដាក់បេក្ខជនឈរឈ្មោះក្រុមប្រឹក្សាឃុំ-សង្កាត់ គឺគណបក្សប្រជាជនកម្ពុជា និងគណបក្សសង្គ្រោះជាតិ។ លទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ បង្ហាញថា គណបក្សប្រជាជនកម្ពុជា ទទួលបាន ៣អាសនៈ និងគណបក្សសង្គ្រោះជាតិ ទទួលបាន ២អាសនៈ។
ឆ្លើយតបការចោទប្រកាន់នេះ មេឃុំតាឡាត លោក សឿង ខង បដិសេធការចោទប្រកាន់នេះ ដោយលើកហេតុផលថា អាជ្ញាធរឃុំបានបែងចែកតួនាទីឲ្យជំទប់ទី១ និងទី២ ទទួលបន្ទុកការងារផ្អែកតាមច្បាប់កំណត់ ហើយជំទប់ទី១ និងទី២ ទទួលបន្ទុកការងារជំនួសមេឃុំតាមឋានានុក្រម នៅគ្រាដែលមេឃុំអវត្តមាន៖ «បាទ! អត់មានទេ។ អូ! ការចោទប្រកាន់នោះវាខុសហើយ ខុសពីបទបញ្ជាផ្ទៃក្នុងរបស់ក្រុមប្រឹក្សាឃុំហើយ»។
មន្ត្រីគណបក្សសង្គ្រោះជាតិ រំឭកថា កាលពីឆ្នាំ២០១៥ ជំទប់ទី២ នៃឃុំតាឡាត លោក ណ ឡិត មកពីគណបក្ស សម រង្ស៊ី ត្រូវបានសាលាដំបូងខែត្រស្ទឹងត្រែង កាត់ទោសឲ្យជាប់គុក ៥ឆ្នាំពីបទកាប់ព្រៃ ១ហិកតារ។ សំណុំរឿងនេះ មេឃុំតាឡាត លោក សឿង ខង ជាដើមបណ្តឹង។ មន្ត្រីគណបក្សសង្គ្រោះជាតិ ចាត់ទុកពាក្យបណ្តឹងរបស់មេឃុំតាឡាត ដែលប្តឹងមន្ត្រីគណបក្សប្រឆាំងជារឿងនយោបាយច្រើនជាងការអនុវត្តច្បាប់។
អ្នកសម្របសម្រួលផ្នែកអង្កេតនៃអង្គការខុមហ្វ្រែល (COMFREL) លោក កន សាវាង្ស យល់ថា ច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ បានកំណត់ពីតួនាទីភារកិច្ចរបស់អាជ្ញាធរឃុំនីមួយៗ តែបើការបែងចែកភារកិច្ចមិនត្រឹមត្រូវទេ វាជាដែនសមត្ថកិច្ចរបស់ក្រសួងមហាផ្ទៃ ត្រូវដោះស្រាយ និងពង្រឹងការអនុវត្តច្បាប់នេះឲ្យបានត្រឹមត្រូវ ចៀសវាងនាំឲ្យមានការចោទប្រកាន់គ្នាថារើសអើងនិន្នាការនយោបាយ៖ «សម្រាប់ការអនុវត្ត អ្នកណាក៏អាចអនុវត្តបានដែរឲ្យតែអ្នកនោះគោរពតាមច្បាប់ និងតួនាទីរបស់ខ្លួន ឧបមាថាខាងរដ្ឋបាលធ្វើឲ្យត្រឹមត្រូវតាមរដ្ឋបាលកុំឲ្យប្រកាន់បក្សពួកទៅវា ចប់ហើយ»។
ច្បាប់ស្ដីពីការគ្រប់គ្រងរដ្ឋបាលឃុំ-សង្កាត់មាត្រា៤០ ចែងថា ជំទប់ ឬចៅសង្កាត់ជាជំនួយការមេឃុំ-ចៅសង្កាត់ ក្នុងការអនុវត្តភារកិច្ចដែលមេឃុំប្រគល់ឲ្យ និងជំនួសមេឃុំតាមឋានានុក្រម នៅគ្រាដែលមេឃុំ-ចៅសង្កាត់អវត្តមាន។ ជំទប់ទី១ ឬចៅសង្កាត់រងទី១ ទទួលបន្ទុកផ្នែកសេដ្ឋកិច្ច និងហិរញ្ញវត្ថុ។ ជំទប់ទី២ ឬចៅសង្កាត់រងទី២ ទទួលបន្ទុកអនុវត្តការងារផ្នែកកិច្ចការរដ្ឋបាល សង្គមកិច្ច សេវាសាធារណៈ និងសណ្ដាប់ធ្នាប់៕