Clik here to view.
ពលរដ្ឋជាង ១០០នាក់ ក្នុងចំណោមពលរដ្ឋជាង ៤០០គ្រួសារ រស់នៅស្រុកស្នូល ខែត្រក្រចេះ បានលើកគ្នាតវ៉ារយៈពេលពីរថ្ងៃជាប់គ្នា ប្រឆាំងការបណ្ដេញពួកគាត់ពីដីរបស់ក្រុមហ៊ុនសម្បទានសេដ្ឋកិច្ចវៀតណាម។ អ្នកភូមិថា អាជ្ញាធរខែត្របង្គាប់ឲ្យពលរដ្ឋចាត់តំណាង ៣នាក់ សម្របសម្រួលជាមួយអាជ្ញាធរ និងកំណត់ព្រំប្រទល់ដីរបស់ក្រុមហ៊ុន ដើម្បីបញ្ឈប់ការទន្ទ្រានជាបន្តទៀត។
ពលរដ្ឋរស់នៅឃុំពីរធ្នូ ស្រុកស្នូល ខែត្រក្រចេះ នៅថ្ងៃទី៦ កញ្ញា អំពាវនាវជាថ្មីទៀតឲ្យអភិបាលខែត្រក្រចេះ និងស្ថាប័នពាក់ព័ន្ធពន្លឿនកាត់ឆ្វៀលដីពីក្រុមហ៊ុនសម្បទានសេដ្ឋកិច្ចវៀតណាម ឈ្មោះ ក្រុមហ៊ុនចម្ការកៅស៊ូ មេមត់ ដើម្បីបម្លែងជាដីសម្បទានសង្គមកិច្ច ជូនពលរដ្ឋដែលក្រីក្រគ្មានដី និងធ្វើកសិកម្មចិញ្ចឹមជីវិត។ ការអំពាវនាវនេះនៅគ្រាដែលអាជ្ញាធរដាក់ឱសានវាទឲ្យពលរដ្ឋជាង ៤០០គ្រួសារ រុះរើផ្ទះចេញពីដីរបស់ក្រុមហ៊ុនវៀតណាម ឲ្យបានមុនថ្ងៃទី៥ ខែកញ្ញា។
ពលរដ្ឋម្នាក់ក្នុងចំណោមពលរដ្ឋជាច្រើនទៀត រស់នៅឃុំពីរធ្នូ លោកស្រី ម៉េត សារ៉េត ឲ្យដឹងថា ពលរដ្ឋមួយចំនួនបានមកតាំងទីលំនៅតំបន់នោះចាប់តាំងពីឆ្នាំ២០១០ ដោយខ្លះមានដីក្បាលចាប់ពី ៥ម៉ែត្រ ដល់ ៤០ម៉ែត្រ បណ្ដោយចាប់ពី ២៥០ម៉ែត្រ ដល់ ៤០០ម៉ែត្រ ដែលដីសរុបមានជាង ៣០ហិកតារ។ ដីនេះ ជាប្រភេទដីលំនៅឋាន និងដីកសិកម្ម ផ្នែកខ្លះមានដំណាំដំឡូងមី និងស្វាយចន្ទី ជាដើម។ លោកស្រីថា កាលព្រឹកថ្ងៃទី៦ ខែកញ្ញា អាជ្ញាធរខែត្របានជូនដំណឹងឲ្យពលរដ្ឋសហការជាមួយក្រុមហ៊ុនឈូសឆាយកំណត់ព្រំដែនជាក់ស្ដែង បំណងការពារកុំឲ្យពលរដ្ឋទន្ទ្រានបន្តទៀត។ ក៏ប៉ុន្តែពលរដ្ឋបារម្ភថា ការកំណត់ព្រំប្រទល់ដីនៅខែវស្សា នឹងប៉ះពាល់ដល់ផលដំណាំពលរដ្ឋ៖ «គ្រាន់តែតវ៉ាឲ្យចែកប្លង់ជូនពលរដ្ឋសិនទៅ ចាំឈូសឆាយ។ គេចង់ឲ្យពលរដ្ឋកាយក្រវាត់ឈូសឆាយទៅ ដើម្បីឲ្យគេបង់ពន្ធចូលរាជការ»។
ក្រុមហ៊ុនដែលទទួលបានដីសម្បទានសេដ្ឋកិច្ចពីរដ្ឋាភិបាលឈ្មោះចម្ការកៅស៊ូ មេមត់ របស់កូនស្រីលោកនាយករដ្ឋមន្ត្រី ហ៊ុន សែន គឺអ្នកស្រី ហ៊ុន ម៉ាណា ទទួលសិទ្ធិវិនិយោគដំណាំឧស្សាហកម្មកៅស៊ូតាំងពីឆ្នាំ២០០៨ លើផ្ទៃដីជិត ១ម៉ឺនហិកតារ (៩.៨៥៥) នៅក្នុងស្រុកស្នួល ខែត្រក្រចេះ រយៈពេល ៥០ឆ្នាំ។ ក៏ប៉ុន្តែក្រុមហ៊ុននេះបានផ្ទេរសិទ្ធិឲ្យក្រុមហ៊ុនវៀតណាម កាលពីឆ្នាំ២០១៥។
អភិបាលខែត្រក្រចេះ លោក សរ ចំរុង បដិសេធមិនអធិប្បាយរឿងនេះ ដោយបង្គាប់ឲ្យអាស៊ីសេរី ធ្វើលិខិតជូនព័ត៌មានពីលេខទូរស័ព្ទរបស់អ្នកយកព័ត៌មានអាស៊ីសេរី មករដ្ឋបាលខែត្រក្រចេះ ជាមុនសិន៖ «ធ្វើលិខិតមួយជូនព័ត៌មានមកថា លេខអាស៊ីសេរី មានប៉ុណ្ណឹងលេខ កាន់ដោយឈ្មោះអី ឈ្មោះអី ហើយក្រុមនេះមានតែអាស៊ីសេរី និង វី.អូ.អេ និង ខេមបូឌា ដេលី ទេ ដែលធ្វើលិខិតហ្នឹងតែបីនាក់ហ្នឹងទេ អ៊ីចឹងមានន័យថា ការរៀបចំរបស់វិទ្យុទាំងប៉ុន្មានហ្នឹង មិនដឹងថា មែន ឬមិនមែនទេជាមួយហ្នឹងពួកដែលបានប្រព្រឹត្តខុសបទបញ្ជា ០១ របស់រាជរដ្ឋាភិបាលហ្នឹង។ ប្អូនឃើញលិខិតហ្នឹងហើយ អ្នកណាស៊ីញ៉េប្អូនសួរអ្នកហ្នឹងទៅ»។
របាយការណ៍របស់អាជ្ញាធរឃុំពីរធ្នូ បង្ហាញថា ពលរដ្ឋដែលទៅរស់នៅក្នុងបរិវេណដីក្រុមហ៊ុនវៀតណាម មាន ៤១៨គ្រួសារ ក្នុងនោះពលរដ្ឋចំណាកស្រុកប្រហែល ៧០ភាគរយ។ ពលរដ្ឋទាំងនោះមករស់នៅក្រោយពេលដែលក្រុមហ៊ុនវាយតម្លៃផលប៉ះពាល់ ហើយនៅគ្រាដែលក្រុមហ៊ុន និងអាជ្ញាធរពាក់ព័ន្ធចុះសិក្សាផលប៉ះពាល់ បានកាត់ឆ្វៀលដីជូនពលរដ្ឋរងផលប៉ះពាល់ជាង ២០០ហិកតារ។
មន្ត្រីអង្កេតជាន់ខ្ពស់នៃសមាគមអាដហុក (ADHOC) លោក ប៉ែន ប៊ុណ្ណារ៍ មើលឃើញថា ភាពយឺតយ៉ាវក្នុងការផ្ដល់ដីសម្បទានសង្គមកិច្ចរបស់រដ្ឋាភិបាល គឺជាផ្នែកមួយដែលនាំឲ្យពលរដ្ឋទៅទន្ទ្រានដីរស់នៅ ព្រោះជីវភាពខ្វះខាត និងគ្មានដីរស់នៅ ដែលជាមួយហេតុដែលនាំឲ្យអាជ្ញាធរចោទប្រកាន់។ លោកថា បើអាជ្ញាធរបង្ក្រាប និងបណ្ដេញពលរដ្ឋចេញ គឺជាបន្ទុកបន្ថែមទៀតដែលនាំឲ្យពលរដ្ឋកាន់តែក្រីក្រឡើង។ ចំណែកឯដីព្រៃសាធារណៈរាប់ពាន់ហិកតារដែលត្រូវបានអ្នកមានអំណាចកាន់កាប់ កម្រឃើញអាជ្ញាធរអនុវត្តច្បាប់ណាស់៖ «ដកហួតយកដី ពីពួកគាត់ត្រូវតែដកហូតយកដីពីអ្នកមានអំណាចមានលុយទាំងអស់ហ្នឹងដែរ ដើម្បីធ្វើយ៉ាងម៉េចផ្ទេរដីដែលចោទប្រកាន់ថា ខុសច្បាប់ហ្នឹងទៅឲ្យពលរដ្ឋក្រីក្រ»។
លិខិតជូនដំណឹងរបស់អាជ្ញាធរខែត្រក្រចេះ ចុះថ្ងៃទី២១ ខែសីហា បញ្ជាក់ថា ពលរដ្ឋត្រូវរុះរើរោងស្នាក់នៅចេញពីតំបន់នោះជាបន្ទាន់ បញ្ឈប់ការទន្ទ្រានយកដីរបស់ក្រុមហ៊ុន និងឈប់ទិញលក់ដូរដីរបស់ក្រុមហ៊ុន រួមទាំងឈប់កាប់បំផ្លាញព្រៃឈើ។ ចំពោះពលរដ្ឋណាដែលទទួលបានដីតាមរយៈបទបញ្ជា ០១ របស់រាជរដ្ឋាភិបាលត្រូវដកខ្លួនចេញពីដីរបស់ក្រុមហ៊ុន ហើយក្នុងករណីពលរដ្ឋខ្វះខាតដីរស់នៅពិតប្រាកដ ត្រូវរៀបចំឯកសារពាក់ព័ន្ធស្នើសុំដីសម្បទានសង្គមកិច្ចតាមរយៈអាជ្ញាធរមូលដ្ឋាន ហើយអាជ្ញាធរខែត្រនឹងដោះស្រាយជូនពលរដ្ឋតាមនីតិវិធីរបស់ក្រសួងសុរិយោដី៕