ពលរដ្ឋខ្លះនៅស្រុកឆែប ខេត្តព្រះវិហារ កំពុងភ័យខ្លាចអាជ្ញាធរចាប់ខ្លួនពួកគេក្នុងរឿងទំនាស់ដីធ្លីជាមួយក្រុមហ៊ុនសម្បទានសេដ្ឋកិច្ចរបស់ចិន។ ការភ័យខ្លាចនេះ បន្ទាប់ពីអាជ្ញាធរស្រុកឆែប បានកោះហៅពួកគេទៅសាកសួរនៅថ្ងៃអង្គារ ទី៥ ខែកញ្ញា ជុំវិញរឿងទំនាស់ដីធ្លី ហើយលើកគ្នាទៅដាក់ញត្តិតវ៉ាដល់ស្ថានទូតចិន នៅឯទីក្រុងភ្នំពេញកន្លងទៅ។
អាជ្ញាធរស្រុកឆែប បានកោះហៅតំណាងសហគមន៍តវ៉ាដីធ្លីជាច្រើនរូបនៅឃុំសង្កែ១ និងឃុំសង្កែ២ ទៅសាកសួរនៅថ្ងៃអង្គារ ទី៥ ខែកញ្ញា ឲ្យឆ្លើយបំភ្លឺជុំវិញរឿងដែលលើកគ្នាទៅទីក្រុងភ្នំពេញ ដើម្បីដាក់ញត្តិតវ៉ាទំនាស់ដីធ្លីទៅស្ថានទូតចិន។
តំណាងសហគមន៍ខ្លះភ័យខ្លាចអាជ្ញាធរចាប់ខ្លួន នៅពេលដែលមេភូមិ មេឃុំ បានដើរប្រាប់ឲ្យទៅជួបជុំគ្នានៅឯសាលាស្រុកឆែប នោះ។ តំណាងសហគមន៍ទំនាស់ដីធ្លីម្នាក់នៅឃុំសង្កែ២ គឺលោកស្រី ឡាន ស៊ីម។ លោកស្រីអះអាងនៅរសៀលថ្ងៃអង្គារ ទី៥ ខែកញ្ញា ថា មេភូមិ មេឃុំបានប្រាប់រូបគាត់ និងតំណាង ២នាក់ផ្សេងទៀតឲ្យទៅសាលាស្រុកឆែប ដើម្បីឲ្យអាជ្ញាធរស្រុកសាកសួរជុំវិញការនាំគ្នាយកញត្តិរឿងទំនាស់ដីធ្លីប្រឆាំងក្រុមហ៊ុនចិន ហេង យូ (Heng Yu) ទៅដាក់នៅស្ថានទូតចិន ឯទីក្រុងភ្នំពេញកាលពីថ្ងៃទី៣០ ខែសីហា នោះ។
លោកស្រី ឡាន ស៊ីម បញ្ជាក់ថា នៅថ្ងៃអង្គារ នេះ លោកស្រី និងតំណាងសហគមន៍ដីធ្លីចំនួន ២នាក់ទៀត មិនបានទៅសាលាស្រុកឆែប តាមការកោះហៅនោះទេ ពីព្រោះតែមានសមត្ថកិច្ចខ្លះខ្សឹបប្រាប់ថា បើឆ្លើយមិនសមរម្យ គេនឹងដាក់ខ្នោះ៖ «សមត្ថកិច្ចដែលចិត្តល្អប្រាប់ថា អាជ្ញាធរខេត្តព្រះវិហារ និងស្រុកឆែប ហៅពួកខ្ញុំទៅសួររឿងឡើងទៅភ្នំពេញដាក់ញត្តិប្រឆាំងក្រុមហ៊ុនចិន ឲ្យស្ថានទូតចិន នៅភ្នំពេញ ហើយគេថាបើឆ្លើយមិនត្រូវ គឺដាក់ខ្នោះ»។
អាជ្ញាធរស្រុកឆែប ទទួលស្គាល់ថា គេពិតជាបានហៅតំណាងសហគមន៍ទំនាស់ដីធ្លីជាមួយនឹងក្រុមហ៊ុនដីសម្បទានសេដ្ឋកិច្ចចិន ជាច្រើននាក់ទៅសាកសួរមែន នៅថ្ងៃអង្គារ ក៏ប៉ុន្តែមិនមានការគំរាមរហូតដល់ទៅវាយខ្នោះអ្នកទាំងនោះទេ។
អភិបាលរងស្រុកឆែប លោក សុខ មុន្នីរិទ្ធ មានប្រសាសន៍ថា ការកោះហៅតំណាងសហគមន៍ទៅសាកសួរនេះ គឺធ្វើតាមការណែនាំរបស់ក្រសួងរៀបចំដែនដី នគរូបនីយកម្ម និងសំណង់ ដើម្បីចង់ដឹងឲ្យប្រាកដថា តើក្រុមហ៊ុនចិន ពិតជារំលោភយកដីចំនួនប៉ុន្មានហិកតារ និងរំលោភបំពានលើសិទ្ធិមនុស្សមែនឬក៏យ៉ាងណា? មន្ត្រីដដែលបញ្ជាក់ថា អាជ្ញាធរមិនបានគំរាមដាក់ខ្នោះនៅពេលហៅអ្នកទាំងនោះទៅសាកសួរទេ ប៉ុន្តែប្រសិនបើអាជ្ញាធរស្រាវជ្រាវឃើញថា សហគមន៍ទាំងនោះឆ្លើយមិនត្រឹមត្រូវ អាចប្រឈមមុខនឹងផ្លូវច្បាប់៖ «ករណីនេះយើងមិនបាននិយាយដល់ថ្នាក់ថាវាយខ្នោះទេ យើងថាបើសិនជាករណីហ្នឹងយើងស្រាវជ្រាវ អ្នកដែលឆ្លើយបំភ្លឺវាមិនពិតប្រាកដ គឺនឹងប្រឈមមុខចំពោះផ្លូវច្បាប់»។
នៅថ្ងៃអង្គារ ទី៥ ខែកញ្ញា មានអ្នកភូមិរហូតដល់ជាង ១០០នាក់មកពីឃុំសង្កែ១ និងឃុំសង្កែ២ បាននាំគ្នាទៅសាលាស្រុកឆែប។
កាលពីថ្ងៃទី៣០ ខែសីហា សហគមន៍ទំនាស់ដីធ្លីជាច្រើនកន្លែងមកពីស្រុកត្បែងមានជ័យ ស្រុកឆែប និងស្រុកជ័យសែន ខេត្តព្រះវិហារ បាននាំគ្នាទៅទីក្រុងភ្នំពេញ ដើម្បីដាក់ញត្តិសុំអន្តរាគមន៍ពីស្ថានទូតចិន ប្រចាំកម្ពុជា ជុំវិញរឿងក្រុមហ៊ុនដីសម្បទានសេដ្ឋកិច្ចចិន រំលោភយកដីធ្លីរបស់ពួកគេ។
មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ យល់ថា ការដែលសហគមន៍លើកគ្នាទៅតវ៉ានៅស្ថានទូតចិន នោះ គឺជាសិទ្ធិរបស់គាត់ដែលការពារធនធានធម្មជាតិក្នុងតំបន់ដែលពួកគាត់រស់នៅ ប៉ុន្តែបើអាជ្ញាធរហៅទៅសួរនាំ និងដេញដោលច្រើនពេក នោះមានន័យថាវាជាការគំរាមកំហែង៕