Clik here to view.
មន្ត្រីបក្សឃុំ ស្រុក និងខេត្តរបស់គណបក្សសង្គ្រោះជាតិ ខេត្តកំពង់ឆ្នាំង ចោទអាជ្ញាធរមូលដ្ឋាន និងប៉ូលិសក្នុងខេត្តនេះ ថាបានរារាំងមិនឲ្យពួកគេប្រជុំប្រចាំខែជាមួយសមាជិកបក្ស ក្រោយលោក កឹម សុខា ត្រូវសមត្ថកិច្ចចាប់ខ្លួន។ អាជ្ញាធរខេត្ដកំពង់ឆ្នាំង បញ្ជាក់ថា សមត្ថកិច្ចមិនបានហាមឃាត់ការជួបប្រជុំរបស់បក្សប្រឆាំងនោះទេ ប៉ុន្តែសូមឲ្យគ្រប់ការជួបប្រជុំត្រូវមានច្បាប់ ឬការជូនដំណឹង។
មេឃុំ និងសមាជិកក្រុមប្រឹក្សាខេត្តរបស់គណបក្សប្រឆាំងថ្លែងនៅថ្ងៃទី៥ ខែកញ្ញា ថា សេរីភាពក្នុងការជួបប្រជុំដោយសន្តិវិធីដែលធានាដោយច្បាប់កំពូលរបស់ជាតិ ត្រូវអាជ្ញាធរមានសមត្ថកិច្ចបំពាន។ ពួកគេថា ស្នងការរងនគរបាលខេត្ដកំពង់ឆ្នាំង លោក ស៊ុំ សុជាតិ បានប្រាប់ឲ្យគណបក្សសង្គ្រោះជាតិ ឈប់ជួបប្រជុំសមាជិកបក្សទាំងនៅតាមទីសាធារណៈ និងនៅក្នុងទីស្នាក់ការគណបក្សរបស់ខ្លួន។
មេឃុំពន្លៃ របស់បក្សប្រឆាំង ទើបជាប់ឆ្នោតក្នុងអាណត្តិទី៤ លោក ម៉ៅ ផល្លី ថា ស្នងការរងលោក ស៊ុំ សុជាតិ បានយកឱកាសក្នុងកិច្ចប្រជុំប្រចាំខែរបស់គណៈបញ្ជាការឯកភាពរដ្ឋបាលស្រុកបរិបូរណ៍ទៅដាស់តឿនសមាជិកក្រុមប្រឹក្សាស្រុក និងមេឃុំមកពីគណបក្សខ្លួន ថាកុំឲ្យមានសតិអារម្មណ៍ ឬចូលពាក់ព័ន្ធនឹងករណីឃាត់ខ្លួន លោក កឹម សុខា ដែលតុលាការកំពុងដំណើរការនីតិវិធី៖ «គេប្រជុំគេថា រឿងលោក កឹម សុខា ជារឿងបុគ្គលទេ។ ទាក់ទងនឹងរដ្ឋាភិបាលចាប់ខ្លួនចោទប្រកាន់អីហ្នឹងណា អ៊ីចឹងកុំឲ្យមានសតិអារម្មណ៍ ហើយធ្វើការងារធម្មតា ហើយយើងហាមឃាត់ដាច់ខាងទាក់ទងនឹងការប្រជុំទាំងក្នុងទីស្នាក់ការ និងក្រៅទីស្នាក់ការ»។
ឆ្លើយតបការចោទប្រកាន់នេះ លោក ស៊ុំ សុជាតិ ថា លោកមិនបាននិយាយហាមឃាត់បក្សប្រឆាំងមិនឲ្យជួបប្រជុំគ្នានោះទេ រួចក៏ចុចផ្ដាច់ទូរស័ព្ទ ខណៈដែលអ្នកនាំពាក្យស្នងការដ្ឋាននគរបាលខេត្តកំពង់ឆ្នាំង លោក លី វីរៈ បដិសេធមិនអត្ថាធិប្បាយជុំវិញរឿងនេះដោយលោកប្រាប់ថា កំពុងជាប់រវល់។ ប៉ុន្តែអ្នកនាំពាក្យសាលាខេត្តលោក ម៉ម ឈឿម ថាសមត្ថកិច្ចមិនរារាំងឡើយបើការជួបប្រជុំនោះមានច្បាប់៖ «នៅខេត្ដដូចជាមិនឮនិយាយ ប៉ុន្ដែការជួបជុំអាហ្នឹងគេនិយាយៗ ប៉ុន្ដែយើងធ្វើលិខិតសុំច្បាប់ទម្លាប់គេត្រឹមត្រូវជួបជុំកម្រិតប៉ុន្មាន? ហើយនៅទីតាំងណា? ទៅសុំទៅហើយចាំមើលមើគេថាម៉េច?»។
ទោះជាយ៉ាងណាសមាជិកក្រុមប្រឹក្សាខេត្តកំពង់ឆ្នាំង លោក កែវ ថៃ ថានៅតាមឃុំជាច្រើនដែលមានកិច្ចប្រជុំគណបក្សសង្គ្រោះជាតិ នៅក្នុងទីស្នាក់ការបក្ស ឬក្នុងផ្ទះសកម្មជនត្រូវកម្លាំងប៉ូលិសប៉ុស្តិ៍ និងប៉េអឹមស្រុកនីមួយៗ ចុះហាមឃាត់សកម្មភាពជួបប្រជុំដោយប្រាប់ថា មានបទបញ្ជាផ្ទាល់មាត់ពីថ្នាក់លើ។
លោកថា ការរឹតត្បិតសេរីភាពជួបប្រជុំនេះ នៅក្រោយការចាប់ខ្លួនលោក កឹម សុខា៖ «ខ្ញុំឃើញថា មានសភាពធ្ងន់ធ្ងរមែនទែននៅប្រទេសកម្ពុជា ជាពិសេសនៅមូលដ្ឋាន កាលណាយើងចង់ប្រជុំជាទូទៅ ដូចជាបូកសរុបរបាយការណ៍ បញ្ហាក្នុងឃុំ ហើយមកដល់ពេលគឺផ្ដោតទៅលើទាក់ទងនឹងការចុះឈ្មោះ ការពិនិត្យបញ្ជីឈ្មោះអ៊ីចឹងទៅ ប៉ុន្តែដល់រកជួបជុំគ្នាអត់បានធ្វើឲ្យជួបការលំបាកដល់ធ្ងន់ធ្ងរ។ ដូច្នេះហើយបានសូមអំពាវនាវដល់សង្គមស៊ីវិល ហើយក៏ដូចជារដ្ឋាភិបាលគិតពិចារណាឡើងវិញ ហើយបញ្ឈប់សកម្មភាពចាត់វិធានការដ៏តឹងតែងទប់ស្កាត់ រារាំងដំណើរការដល់គណបក្សសង្គ្រោះជាតិនៅតាមមូលដ្ឋាន»។
សមត្ថកិច្ចក្រុងភ្នំពេញ បានឃាត់ខ្លួនប្រធានគណបក្សសង្គ្រោះជាតិ លោក កឹម សុខា កាលពីម៉ោងប្រមាណ ១២កន្លះរំលងអធ្រាត្រចូលថ្ងៃទី៣ ខែកញ្ញា រួចបញ្ជូនទៅឃុំនៅមន្ទីរអប់រំកែប្រែត្រពាំងផ្លុង ឬម-៣ ក្នុងខេត្តត្បូងឃ្មុំ។ លោកត្រូវចោទពីបទក្បត់ជាតិ និងត្រូវរ៉ូវជាមួយបរទេសដើម្បីផ្ដួលរំលំរដ្ឋាភិបាលតាមរយៈវីដេអូឃ្លីបនៃការថ្លែងរបស់លោកទៅកាន់អ្នកគាំទ្រនៅប្រទេសអូស្ត្រាលី កាលពីប៉ុន្មានឆ្នាំមុន។ ប៉ុន្ដែបទចោទនេះត្រូវបានសង្គមស៊ីវិលជាតិ និងអន្តរជាតិ ព្រមទាំងពលរដ្ឋនៅតាមខេត្តជាច្រើនប្រតិកម្ម៕
