តំណាងសហគមន៍ភូមិសមុទ្រលើ ឃុំសេដា ស្រុកលំផាត់ ខេត្តរតនគិរី ដាក់ពាក្យប្តឹងអភិបាលស្រុកមួយករណីផ្សេងទៀត ទាក់ទិនបទញុះញង់ធ្វើឲ្យពលរដ្ឋភ័យខ្លាច បន្ទាប់ពីបានដាក់ពាក្យប្តឹងបរិហារមន្ត្រីជំនាញ និងមន្ត្រីមូលដ្ឋាន ៧នាក់ ទាក់ទិនរឿងកាប់បំផ្លាញព្រៃឈើនៅដែនជម្រកសត្វព្រៃលំផាត់។
តំណាងពលរដ្ឋភូមិសមុទ្រលើ ចំនួន ៨នាក់ សំណូមពរឲ្យអយ្យការសាលាដំបូងខេត្តរតនគិរី ការពារសុវត្ថិភាព និងបញ្ឈប់សកម្មភាពគំរាមកំហែង រើសអើងពីសំណាក់មន្ត្រីអាជ្ញាធរភូមិ ឃុំ និងស្រុក។
សំណូមពរនេះ ធ្វើឡើងក្នុងពាក្យបណ្តឹងចោទប្រកាន់អភិបាលស្រុកលំផាត់ គឺលោក នូ ថេរ ពីបទញុះញង់ដាក់ជូនស្ថាប័នអយ្យការកាលពីដើមខែកញ្ញា កន្លងទៅនេះ។
តំណាងមួយរូប គឺលោក ឆន ផល្លា បញ្ជាក់នៅថ្ងៃទី៥ ខែកញ្ញា ថា អភិបាលស្រុកលំផាត់ បានប្រើប្រាស់វេទិកាសាធារណៈកាលពីថ្ងៃទី៣១ ខែសីហា ចោទប្រកាន់ពួកគាត់ថាជាអ្នកគាំទ្រគណបក្សប្រឆាំងប៉ុនប៉ងធ្វើអបគមន៍ និងញុះញង់ឲ្យអ្នកភូមិប្តឹងអាជ្ញាធរ។ លោកបន្តថា សារគំរាមកំហែងនេះ គឺដោយសារតែប្រជាពលរដ្ឋជាង ៣០នាក់កាលពីខែមិថុនា បានរកឃើញបទល្មើសកាប់ឈើមូល និងសកម្មភាពកាប់រានព្រៃប៉ុនប៉ងយកដីនៅដែនជម្រកសត្វព្រៃលំផាត់ ហើយដាក់ពាក្យប្តឹងបរិហារមន្ត្រីមូលដ្ឋាន និងមន្ត្រីអនុរក្សដែនជម្រក ពីបទបណ្តែតបណ្តោយមិនទប់ស្កាត់ករណីនេះ៖ «អាជ្ញាធរថ្នាក់ក្រោមស្រុកលំផាត់ នូ ថេរ ហ្នឹងកុំឲ្យគំរាមកំហែងតំណាងការពារព្រៃឈើ ព្រោះពួកខ្ញុំអ្នកការពារព្រៃឈើទេ»។
តំណាងម្នាក់ទៀត គឺលោក នួន ណែន ជាគ្រូបង្រៀនសាលារៀន សេដា អះអាងថា អភិបាលស្រុកប្រើប្រាស់យន្តចោទប្រកាន់ពលរដ្ឋអ្នកការពារព្រៃឈើថាជាអ្នកប្រព្រឹត្តបទល្មើសព្រៃឈើវិញ ដើម្បីបំបាក់ស្មារតីពលរដ្ឋ៖ «ប្រជាពលរដ្ឋគាត់ស្ម័គ្រចិត្តមានសិទ្ធិតវ៉ា គេថាគេស្ម័គ្រចិត្តខ្លួនគេ»។
អភិបាលស្រុកលំផាត់ លោក នូ ថេរ បដិសេធថាមិនបានគំរាមពលរដ្ឋនោះទេ ក៏ប៉ុន្តែលោកបានពន្យល់អ្នកភូមិពីផលលំបាកនៃការដាក់ពាក្យប្តឹងរបស់ពួកគេ ដែលធ្វើឲ្យប៉ះពាល់ដល់អ្នកភូមិ ៣០នាក់ ដែលអាជ្ញាធររកឃើញថាមានពាក់ព័ន្ធកាប់រានព្រៃនោះ។ លោកទទួលស្គាល់ថា បានណែនាំពលរដ្ឋកុំឲ្យបង្កើតចលនាអបគមន៍ ឬបដិវត្តន៍ពណ៌ ដែលត្រូវប្រឈមមុខទៅនឹងវិធានការច្បាប់៖ «គេថតរូបបានហ្នឹងងាប់អ្នកណា ងាប់ ៣០នាក់ហ្នឹង»។
តំណាងពលរដ្ឋភូមិសមុទ្រក្រោម ៩នាក់កាលពីខែកក្កដា បានដាក់ពាក្យប្តឹងបរិហារមន្ត្រីមូលដ្ឋាន និងមន្ត្រីបរិស្ថានសរុប ៧នាក់ទៅការិយាល័យអយ្យការសាលាដំបូងពីបទបណ្តែតបណ្តោយ ធ្វេសប្រហែសក្នុងតួនាទីរបស់ខ្លួន។ បន្ទាប់ពីការប្តឹងនោះ មន្ត្រីស្រុកលំផាត់ ក៏បានដាក់ពាក្យប្តឹងតំណាងប្រជាពលរដ្ឋវិញក្នុងបទចោទថា ពួកគេជាអ្នកពាក់ព័ន្ធកាប់រានព្រៃឈើនោះ។
អ្នកនាំពាក្យអយ្យការសាលាដំបូងខេត្តរតនគិរី លោក ហាក់ ហ័ន បញ្ជាក់ថា រឿងក្តីកាប់រានព្រៃឈើដែលគូភាគីប្តឹងគ្នាទៅវិញទៅមក គឺអយ្យការបានចេញដីកាកោះហៅចុងចោទ និងដើមចោទឲ្យចូលបំភ្លឺហើយ ក៏ប៉ុន្តែភាគីទាំងពីរសុំពន្យារពេលដើម្បីដាក់មេធាវីការពារក្តី។ លោកបន្តថា ចំពោះរឿងក្តីតំណាងអ្នកភូមិប្តឹងអភិបាលស្រុកពីបទគំរាមកំហែង លោកមិនទាន់បានដឹងពីចំណាត់ការយ៉ាងណានៅឡើយ៖ «វាស្របគ្នាជាមួយដើមបណ្តឹង គឺគាត់សុំពន្យារដើម្បីរកមេធាវីការពារក្តីហ្នឹង សំណុំរឿងទី១»។
អ្នកសម្របសម្រួលសមាគមអាដហុក (ADHOC) ខេត្តរតនគិរី លោក ឌិន ខុន្នី ចាត់ទុកថា នេះជាទង្វើរំលោភបំពានសិទ្ធិពលរដ្ឋដែលរាជរដ្ឋាភិបាលបានបង្កើតឲ្យមានវេទិកាសាធារណៈពិគ្រោះយោបល់រវាងអាជ្ញាធរ និងពលរដ្ឋ ក៏ប៉ុន្តែមន្ត្រីមូលដ្ឋានបានប្រើប្រាស់វេទិកានោះដាក់កំហុសធ្វើឲ្យពលរដ្ឋភ័យខ្លាច និងបារម្ភពីសុវត្ថិភាពរបស់ពួកគេ និងក្រុមគ្រួសារ៖ «បើគាត់យកវេទិកាសាធារណៈទៅវាយប្រហារប្រជាពលរដ្ឋ កាត់សេចក្តីថាអ្នកឯងធ្វើអ៊ីចឹងចង់ជាប់គុកប៉ុណ្ណេះៗ វាជាសកម្មភាពខុសច្បាប់»។
ទោះបីជាយ៉ាងណាក៏ដោយ អ្នកនាំពាក្យអយ្យការសាលាដំបូងខេត្តរតនគិរី លោក ហាក់ ហ័ន បញ្ជាក់ថា អយ្យការនឹងដំណើរការស៊ើបអង្កេតរកអង្គហេតុជាក់លាក់ទាក់ទិនរឿងក្តីនេះ បន្ទាប់ពីភាគីពាក់ព័ន្ធបានដាក់ពាក្យបណ្តឹងមកការិយាល័យអយ្យការ៕