Clik here to view.
លោកនាយករដ្ឋមន្ត្រី ហ៊ុន សែន ប្រកាសបញ្ចុះតម្លៃទឹកនៅតាមផ្ទះជួលកម្មករ ត្រឹម៨០០រៀល ក្នុងមួយម៉ែត្រគូប។ តម្លៃទឹកដែលកម្មករធ្លាប់បង់ទៅឲ្យម្ចាស់ផ្ទះជួលកន្លងមក ជាមធ្យមចំនួន ១ពាន់ ២រយរៀលក្នុងមួយម៉ែត្រគូប។
លោក ហ៊ុន សែន បន្ត៖ «កន្លងទៅយើង បានប្រឹង ក្នុងការតភ្ជាប់អគ្គិសនី ដែលមុននេះក្មួយៗ ត្រូវបានម្ចាស់ផ្ទះយកលើសការកំណត់។ រដ្ឋលក់ថ្លៃភ្លើងឱ្យការប្រើប្រាស់ត្រឹម៥០គីឡូវ៉ាត់ម៉ោងចុះក្រោម យកតម្លៃតែ៤៥០រៀល ទេ ក៏ប៉ុន្តែម្ចាស់ផ្ទះបានយកពីក្មួយៗរហូតដល់១ពាន់ ឬ១៥០០រៀល ប៉ុន្តែឥឡូវយើង បានតភ្លើងទៅហើយ។ ចំណែកឯទឹកវិញ គឺយើងបានតភ្ជាប់ទាំងខេត្តកណ្តាលទាំង ភ្នំពេញ ចំនួន៥,១១៩ផ្ទះ ស្មើនឹង១២០,៧៨៧បន្ទប់»។
លោក ហ៊ុន សែន ថ្លែង បែបនេះ នៅចំពោះមុខតំណាងកម្មកររាប់ពាន់នាក់ ក្នុងពិធីជួបសំណេះសំណាលជាមួយកម្មករនៅកោះពេជ្រ កាលពីថ្ងៃទី២៧ ខែសីហា។
ការបញ្ចុះតម្លៃទឹកនេះ គឺមានសុពលភាព ចាប់ពីដើមខែកញ្ញា ខាងមុខនេះ។
ក្នុងឱកាសជួបជាមួយតំណាងកម្មករនោះដែរ លោក ហ៊ុន សែន ក៏បានអំពាវនាវ ដល់ម្ចាស់ផ្ទះជួលទាំងអស់ កុំឱ្យដំឡើងថ្លៃក្នុងរយៈពេល១ឆ្នាំ សម្រាប់ឆ្នាំ ២០១៨ ខាងមុខនេះ។
ការចុះយកចិត្តទុកចំពោះកម្មករនៅពេលនេះ ស្របពេលដែលមជ្ឈដ្ឋានជាតិ និងអន្តរជាតិ វាយតម្លៃស្ថានភាពនយោបាយ និងការគោរពសិទ្ធិមនុស្សនៅកម្ពុជាកំពុងស្ថិតក្នុងភាពស្រអាប់ និងការបោះឆ្នោតជាតិ ជិតចូលមកដល់ គឺនៅឆ្នាំ២០១៨ខាងមុខនេះ។
ទន្ទឹមគ្នានេះដែរ កាលពីថ្ងៃទី២៦ ខែសីហា លោក ហ៊ុន សែន ចុះហត្ថលេខា លើអនុក្រឹត្យថ្មីមួយ ស្ដីពីការកែសម្រួលមាត្រា៧ នៃអនុក្រឹត្យលេខ០១ ខែមករា ឆ្នាំ២០១៦ ស្ដីពីការបង្កើតរបបសន្តិសុខសង្គមផ្នែកថែទាំសុខភាពសម្រាប់ជនទាំងឡាយណា ដែលស្ថិតនៅក្រោមបទបញ្ញត្តិនៃច្បាប់ស្ដីពីការងារ បានកែសម្រួលត្រង់មាត្រា៧។ មាត្រា៧ថ្មី ចែងថា និយោជក និងកម្មករនិយោជិត ត្រូវមានកាតព្វកិច្ចបង់ភាគទានផ្នែកថែទាំសុខភាពជូនដល់បេឡាជាតិរបបសន្តិសុខសង្គម (ប.ស.ស) រហូតដល់ថ្ងៃទី៣១ ខែធ្នូ ឆ្នាំ២០១៧។ កាតព្វកិច្ចនៃការបង់ភាគទានផ្នែកថែទាំសុខភាពនេះ ត្រូវស្ថិតនៅក្នុងបន្ទុកទាំងស្រុងរបស់និយោជកចាប់ពីថ្ងៃទី១ មករា ឆ្នាំ២០១៨ តទៅ៕
អនុក្រឹត្យថ្មីរបស់រដ្ឋាភិបាលនេះ ធ្វើឡើងបន្ទាប់ពីលោកនាយករដ្ឋមន្ដ្រី ហ៊ុន សែន ដែលបានថ្លែងកាលពីដើមសប្ដាហ៍មុនថា កម្មករនិយោជិតនៅគ្រប់វិស័យទាំងអស់ ទាំងក្នុងប្រព័ន្ធនិងក្រៅប្រព័ន្ធ នឹងទទួលបានសេវាថែទាំសុខភាពដោយឥតគិតថ្លៃ ចាប់ពីដើមឆ្នាំ២០១៨ តទៅ។
កាលពីថ្ងៃទី២០ ខែសីហា លោកនាយករដ្ឋមន្ត្រី ហ៊ុន សែន បានប្រកាសថា ចាប់ពីខែមករា ឆ្នាំ២០១៨ ទៅ ថៅកែក្រុមហ៊ុនត្រូវទទួលខុសត្រូវបង់ថ្លៃសេវាគាំពារសុខភាពកម្មករ ១០០ភាគរយ រីឯចាប់ពីឆ្នាំ២០១៩ កម្មករកម្មការិនីនឹងទទួលបានប្រាក់ចូលនិវត្តន៍ដូចមន្ត្រីរាជការដែរ។ លោកក៏បានសន្យាទៀតថា នឹងដំឡើងប្រាក់ឈ្នួលកម្មកររោងចក្រឲ្យបានដល់ ១៦៨ដុល្លារក្នុងមួយខែនៅឆ្នាំ២០១៨។ ក្រៅពីនេះ កម្មការិនីអាចជិះរថយន្តក្រុងសាធារណៈពីរឆ្នាំដោយឥតគិតថ្លៃ ចាប់ពីខែសីហា ឆ្នាំ២០១៧ ដល់ខែសីហា ឆ្នាំ២០១៩ ដោយគ្រាន់តែបង្ហាញប័ណ្ណការងារ៕
