Clik here to view.
ស្ថាប័នព័ត៌មាន ឌឹ ខេមបូឌា ដេលី (The Cambodia Daily) ថ្លែងថា សេរីភាពសារព័ត៌មាននៅកម្ពុជា កំពុងស្ថិតក្រោមការវាយប្រហារពីសំណាក់រដ្ឋាភិបាលក្រុងភ្នំពេញ ដែលប៉ុនប៉ងបិទស្ថាប័នរបស់ខ្លួន។ ការលើកឡើងរបស់សារព័ត៌មាន ឌឹ ខេមបូឌា ដេលី ដែលជាកាសែតឯករាជ្យចេញផ្សាយជាភាសាអង់គ្លេសនេះ ធ្វើឡើងតាមរយៈសេចក្តីប្រកាសព័ត៌មានមួយចេញផ្សាយនៅព្រឹកថ្ងៃទី២៨ សីហា។
ខណៈឱសានវាទនៃការបង់ពន្ធកាន់តែខិតជិតចូលមកដល់ ស្ថាប័នព័ត៌មាន ឌឹ ខេមបូឌា ដេលី ស្នើឲ្យរដ្ឋាភិបាលនៃប្រទេសផ្សេងទៀតជួយអន្តរាគមន៍ ដើម្បីតទល់នឹងចំណាត់ការរបស់រដ្ឋាភិបាលកម្ពុជា ដែល ខេមបូឌា ដេលី ចាត់ទុកថាជារឿងអយុត្តិធម៌ និងជាចេតនានយោបាយ។
ក្នុងសេចក្តីប្រកាសព័ត៌មានដែលដាក់ចំណងជើងថា “ការពារសេរីភាពសារព័ត៌មាន ដោយបញ្ឈប់ការវាយប្រហារលើ ខេមបូឌា ដេលី” អ្នកស្រី ដេប្រ៉ា គ្រីស័រ-ស្ទាល (Deborah Krisher-Steele) ដែលជាបណ្ណាធិការរងនៃកាសែតបរទេសមួយនេះ ថ្លែងថា រដ្ឋាភិបាលកម្ពុជា កំពុងវាយប្រហារមកលើសេរីភាពសារព័ត៌មានតាមរយៈការចង់បិទស្ថាប័នរបស់អ្នកស្រី ដោយក្លែងអធិករណ៍ទៅជារឿងមិនបង់ពន្ធវិញ៖ «ពេលនេះ ខេមបូឌា ដេលី កំពុងស្ថិតក្រោមការគាបសង្កត់។ លុយដ៏ច្រើនដែលរដ្ឋាភិបាលកំពុងបង្ខំយើងឲ្យសងនោះ គឺជាការវាយប្រហារទៅលើសេរីភាពសារព័ត៌មាន ដោយបន្លំទៅជាទំនាស់រឿងពន្ធទៅវិញ។ រដ្ឋាភិបាលកម្ពុជា មានផែនការរឹបអូសយកទ្រព្យសម្បតិ្តរបស់យើង។ នេះជាការរំលោភបំពានយ៉ាងធ្ងន់ធ្ងរទៅលើសន្ធិសញ្ញាស្ដីពីការវិនិយោគទ្វេភាគី ដែលរដ្ឋាភិបាលកម្ពុជា បានចុះហត្ថលេខាដើម្បីការពារវិនិយោគិនបរទេស និងកាតព្វកិច្ចនៃអង្គការពាណិជ្ជកម្មពិភពលោករបស់ខ្លួន។ រដ្ឋាភិបាលនៃប្រទេសនានាលើពិភពលោក ចាំបាច់ត្រូវមានប្រតិកម្មនៅពេលនេះ ដើម្បីជួយពួកយើងតតាំងនឹងបំណងដ៏អយុត្តិធម៌ក្នុងការបិទកាសែតរបស់ពួកយើង»។
អ្នកស្រីសង្កត់ធ្ងន់ថា អ្វីដែលបង្ហាញកាន់តែច្បាស់នោះ គឺការបញ្ចេញព័ត៌មានសម្ងាត់ទាក់ទងនឹងការជាប់ពន្ធរបស់ ខេមបូឌា ដេលី។ អ្នកស្រីថ្លែងថា មន្ត្រីដែលមិនស្គាល់អត្តសញ្ញាណជាច្រើននាក់នៅក្នុងក្រសួងសេដ្ឋកិច្ច និងហិរញ្ញវត្ថុ និងនៅខាងអគ្គនាយកដ្ឋានពន្ធដារ បានទម្លាយព័ត៌មានសម្ងាត់នេះទៅឲ្យសារព័ត៌មាន ហ្វ្រេសញូវ (Fresh News) ដែលស្និទ្ធនឹងរដ្ឋាភិបាល មុនពេលទាក់ទងមក ខេមបូឌា ដេលី។
អ្នកស្រីអះអាងថា នេះគឺជាការអនុវត្តរំលោភទៅលើច្បាប់ស្ដីពីសារពើពន្ធ ត្រង់មាត្រា៩៤ ដែលចែងថា អគ្គនាយកដ្ឋានពន្ធដារ និងមន្ត្រីរបស់ខ្លួន ត្រូវរក្សាការសម្ងាត់ចំពោះព័ត៌មានទាក់ទងនឹងអ្នកជាប់ពន្ធ។ ព័ត៌មាននេះអាចផ្តល់ឲ្យតែបុគ្គលដែលមាត្រានៃច្បាប់នេះអនុញ្ញាតតែប៉ុណ្ណោះ គឺមានមន្ត្រីពន្ធដារដែលកំពុងបំពេញភារកិច្ច អាជ្ញាធរព្រហ្មទណ្ឌ និងតុលាការ ជាដើម៖ «រដ្ឋាភិបាលកម្ពុជា បានបន្តដំណើរការត្រួតពិនិត្យរឿងពន្ធនេះ ដោយមិនអើពើពីស្តង់ដារវិជ្ជាជីវៈ ការរក្សាការសម្ងាត់ ឬការអនុវត្តតាមនីតិវិធីអ្វីបន្តិចសោះ។ ការបន្តបែកធ្លាយព័ត៌មានអំពីករណីរបស់ពួកយើងទៅប្រព័ន្ធផ្សព្វផ្សាយគាំទ្ររដ្ឋាភិបាលនោះ ជាសញ្ញាបង្ហាញថា នេះជាការប៉ុនប៉ងរុញពួកយើងចេញពីការងារ ជាជាងការព្យាយាមរកឲ្យឃើញការពិតថា ពន្ធនោះពិតជាត្រូវបានជំពាក់មែន»។
ឌឹ ខេមបូឌា ដេលី ទាមទារឲ្យអគ្គនាយកដ្ឋានពន្ធដារស៊ើបអង្កេត និងដាក់ទោសទណ្ឌមន្ត្រីរបស់ខ្លួនដែលបានប្រព្រឹត្តទង្វើល្មើសច្បាប់នេះ។
ស្ថាប័នព័ត៌មាន ឌឹ ខេមបូឌា ដេលី (The Cambodia Daily) កំពុងរងការចោទប្រកាន់ពីអគ្គនាយកដ្ឋានពន្ធដារ ថាបានជំពាក់ថ្លៃពន្ធរយៈពេល ១០ឆ្នាំ គឺតាំងពីឆ្នាំ២០០៧ ដល់ឆ្នាំ២០១៦ ដែលគិតជាទឹកប្រាក់ប្រហែល ៦លាន ៣សែនដុល្លារអាមេរិក។
អគ្គនាយកដ្ឋានពន្ធដារបានដាក់ឱសានវាទឲ្យកាសែតនេះសងថ្លៃពន្ធទាំងនោះ ត្រឹមថ្ងៃទី៤ ខែកញ្ញា ខាងមុខនេះ។ បើផុតឱសានវាទហើយ ខេមបូឌា ដេលី នៅតែមិនព្រមបង់ទេនោះ ស្ថាប័ននេះនឹងប្រឈមការរឹបអូសយកទ្រព្យសម្បត្តិ និងឈានដល់ការបិទអាជីវកម្មទាំងស្រុងតែម្តង។
ចំណែកឯលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ ក៏បានហៅកាសែត ខេមបូឌា ដេលី ថាជាមេចោរដែលមិនបង់ពន្ធជូនរដ្ឋ និងបានគំរាមបិទស្ថាប័ននេះតែម្តង បើមិនព្រមបង់ពន្ធ៖ «»។
ស្ថានភាពសិទ្ធិមនុស្ស និងសេរីភាពសារព័ត៌មាននៅកម្ពុជា ក្នុងរយៈពេលចុងក្រោយនេះ បានដើរមកដល់ដំណាក់កាលមួយដែលមជ្ឈដ្ឋានជាតិ និងអន្តជាតិបានលើកឡើងពីក្តីព្រួយបារម្ភរបស់ខ្លួន បន្ទាប់ពីរដ្ឋាភិបាលកម្ពុជា បានបណ្តេញវិទ្យាស្ថានជាតិប្រជាធិបតេយ្យ (NDI) ចេញពីកម្ពុជា ដោយដាក់ឱសានវាទមិនឲ្យហួសពីមួយសប្ដាហ៍ គំរាមបិទសារព័ត៌មាន ខេមបូឌា ដេលី និងបញ្ឈប់សកម្មភាពរបស់ស្ថានីយវិទ្យុក្នុងស្រុកជាច្រើនដែលផ្សាយបន្តកម្មវិធីព័ត៌មានរបស់វិទ្យុអាស៊ីសេរី (RFA) វិទ្យុសំឡេងសហរដ្ឋអាមេរិក វីអូអេ (VOA) វិទ្យុសំឡេងប្រជាធិបតេយ្យ វីអូឌី (VOD) និងកម្មវិធីនយោបាយរបស់គណបក្សប្រឆាំង ដោយខាងក្រសួងព័ត៌មាន អះអាងថា ស្ថានីយវិទ្យុទាំងនោះរំលោភលើការណែនាំរបស់ក្រសួង។
ពួកគេរិះគន់ថា នេះជាការព្យាយាមបំបិទសំឡេងអ្នកឯករាជ្យ និងអ្នកហ៊ានរិះគន់រដ្ឋាភិបាលកម្ពុជា ដែលជាការធ្លាក់ចុះដុនដាបនៃបរិយាកាសប្រជាធិបតេយ្យនៅកម្ពុជា។ ពួកគេអំពាវនាវយ៉ាងទទូចឲ្យរដ្ឋាភិបាលកម្ពុជា បញ្ឈប់នូវយុទ្ធនាការធ្វើបាប សម្លុតបំភ័យ និងគំរាមកំហែងទៅលើប្រព័ន្ធផ្សព្វផ្សាយ អង្គការមិនមែនរដ្ឋាភិបាល និងអ្នកការពារសិទ្ធិមនុស្សនៅពេលនេះ។
ទោះបីជាយ៉ាងណា ការប្រតិកម្ម និងរិះគន់ផ្ទួនៗគ្នានេះ ត្រូវបានមន្ត្រីរដ្ឋាភិបាលកម្ពុជា ប្រតិកម្មតបថា គឺជាការជ្រៀតជ្រែកចូលក្នុងកិច្ចការងារផ្ទៃក្នុងរបស់កម្ពុជា ទៅវិញ៕