អ្នកគ្រប់គ្រងស្ថានីយវិទ្យុ អេហ្វ.អឹម (FM) មួយចំនួននៅខេត្តបាត់ដំបង និងខេត្តផ្សេងទៀតដែលធ្លាប់ចាក់ផ្សាយបន្តកម្មវិធីរបស់វិទ្យុអាស៊ីសេរី (RFA) និងវិទ្យុសំឡេងសហរដ្ឋអាមេរិក (VOA) នៅថ្ងៃទី២៧ សីហា បាននាំគ្នាធ្វើដំណើរឡើងទៅទីក្រុងភ្នំពេញ ដើម្បីទៅជួបពិភាក្សាជាមួយក្រសួងព័ត៌មាន ស្នើសុំឲ្យបើកដំណើរការស្ថានីយវិទ្យុរបស់ខ្លួនឡើងវិញ។ វិទ្យុក្នុងស្រុកមួយចំនួន ត្រូវបានបិទទ្វារអស់ជាច្រើនថ្ងៃហើយ ក្រោយពីពួកគេទទួលលិខិតពីមន្ត្រីនៃក្រសួងព័ត៌មាន នៅតាមបណ្ដាខេត្តរៀងៗខ្លួន។ អង្គការសង្គមស៊ីវិលលើកឡើងថា ការស្នើសុំឲ្យក្រសួងព័ត៌មាន បើកដំណើរវិទ្យុទាំងនេះឡើងវិញ គឺជារឿងល្អ ដើម្បីឲ្យប្រជាពលរដ្ឋទទួលបានព័ត៌មានទូលំទូលាយ។
អ្នកគ្រប់គ្រងស្ថានីយវិទ្យុ អេហ្វ.អឹម (FM) ក្នុងស្រុកភាគច្រើនអះអាងថា ពួកគេមានអាជ្ញាប័ណ្ណពីក្រសួងព័ត៌មាន ត្រឹមត្រូវ ក្នុងការធ្វើអាជីវកម្មរបស់ខ្លួនកន្លងទៅ។
ម្ចាស់ស្ថានីយវិទ្យុស្ទឹងខៀវ ខេត្តបាត់ដំបង និងខេត្តបន្ទាយមានជ័យ លោក គុយ សំរិទ្ធី មានប្រសាសន៍ថា វិទ្យុរបស់លោកបើកដំណើរការនៅឆ្នាំ២០១២ ដោយមានអាជ្ញាប័ណ្ណធ្វើអាជីវកម្មពីក្រសួងព័ត៌មាន ត្រឹមត្រូវ។ លោកអះអាងថា នៅព្រឹកថ្ងៃទី២៧ សីហា លោកបានចេញដំណើរពីខេត្តបាត់ដំបង ឆ្ពោះទៅរាជធានីភ្នំពេញ ដើម្បីទៅជួបពិភាក្សាជាមួយមន្ត្រីក្រសួងព័ត៌មាន នៅព្រឹកថ្ងៃទី២៨ សីហា ដើម្បីសាកសួរពីមូលហេតុដែលក្រសួងឲ្យពួកគេបិទកម្មវិធីផ្សាយទាំងអស់កាលពីព្រឹកថ្ងៃទី២៥ សីហា នោះ៖ «ហើយកំពុងដំណើរអាជីវកម្ម ដល់បិទទាំងស្រុងអ៊ីចឹងទៅ វាប៉ះពាល់ដល់ដៃគូផ្សាយពាណិជ្ជកម្មដែលគេធ្វើជាមួយយើង។ ខ្ញុំចង់ឲ្យវាដំណើរការឡើងវិញ ប្រសិនជាគេត្រូវការច្បាប់ទម្លាប់យ៉ាងណា សុំគេចង្អុលបង្ហាញមក។ ហេតុបានជាត្រូវបិទទាំងស្រុងដូច្នោះ?»។
លោកបន្ថែមថា ក្រៅអំពីលោកហើយ នៅមានម្ចាស់ស្ថានីយវិទ្យុ អេហ្វ.អឹម (FM) មួយចំនួនទៀតមកពីតាមបណ្ដាខេត្តផ្សេង ក៏បានឡើងទៅរាជធានីភ្នំពេញដែរ។
ចំណែកនាយកវិទ្យុឃ្លាំងមឿង ខេត្តបាត់ដំបង លោក ឃេម ឃឿន មានប្រសាសន៍ថា វិទ្យុរបស់លោកបានបិទកម្មវិធីផ្សាយទាំងអស់តាំងពីថ្ងៃទី២៣ សីហា មក។ លោកអះអាងថា ចាប់តាំងពីវិទ្យុរបស់លោកបិទទ្វារមក ប្រជាពលរដ្ឋជាច្រើន ជាពិសេសអ្នកដែលនិយមតាមដានស្ដាប់កម្មវិធីចាក់ផ្សាយបន្តរបស់វិទ្យុអាស៊ីសេរី (RFA) និងវិទ្យុសំឡេងសហរដ្ឋអាមេរិក (VOA) តែងតែទូរស័ព្ទមកសាកសួរលោកជារៀងរាល់ថ្ងៃ ពីការពុំមានចាក់ផ្សាយព័ត៌មាននៃវិទ្យុទាំងនេះដូចពេលមុនៗ៖ «ភាគច្រើនដែលគាត់ទាក់ទងមកខ្ញុំ គាត់ចង់ឲ្យវិទ្យុអាស៊ីសេរី ដំណើរការឡើងវិញ ដោយសារគាត់ស្ដាប់ជារៀងរាល់ថ្ងៃ។ គាត់បន្តត្រូវយ៉ាងណា ដើម្បីបានស្ដាប់វិទ្យុនេះទៀត ខ្ញុំក៏បានប្រាប់គាត់ឲ្យស្ដាប់ហ្វេសប៊ុក (Facebook) ទៅអាចមើលឃើញរូប និងស្ដាប់បាន ប៉ុន្តែគាត់ថានៅស្រុកស្រែយើងមិនមានលទ្ធភាពទេ»។
រីឯពលរដ្ឋមួយចំនួននៅខេត្តបាត់ដំបង និងខេត្តបន្ទាយមានជ័យ លើកឡើងថា មូលហេតុដែលពួកគាត់ត្រូវការស្ដាប់វិទ្យុ អេហ្វ.អឹម (FM) ផ្សាយបន្តវិទ្យុឯករាជ្យទាំងពីរនេះ ដោយសារវិទ្យុទាំងអស់នេះផ្សាយព័ត៌មានពិត ដែលធ្វើឲ្យពួកគាត់បានយល់ដឹងបញ្ហាកើតឡើងនៅក្នុងសង្គម៖ «ខ្ញុំមិនដឹងធ្វើអីគេកើតទេ ប៉ុន្តែស្ដាប់ៗទៅកុំឲ្យគេថាដូចកង្កែបក្នុងអណ្ដូង គ្មានដឹងអ្វីសោះ។ សុំឲ្យមានប្រជាធិបតេយ្យពិតប្រាកដ បានជាខ្ញុំចេះតែចង់ស្ដាប់វិទ្យុឯករាជ្យនោះ។ ខ្ញុំធ្លាប់បានស្ដាប់អាស៊ីសេរីព្រឹកល្ងាច ដើម្បីស្វែងយល់បញ្ហាក្នុងប្រទេស។ ដល់ពេលអត់បានស្ដាប់អ៊ីចឹង ចង្អៀតចង្អល់ចិត្តណាស់ ព្រោះមានបានព័ត៌មានតែម្ខាងអត់មានទស្សនៈទូលំទូលាយ»។
ស្ថានីយវិទ្យុដែលទទួលផ្សាយព័ត៌មានអាស៊ីសេរី ព័ត៌មានវិទ្យុសំឡេងសហរដ្ឋអាមេរិក និងសំឡេងរបស់គណបក្សសង្គ្រោះជាតិ តាមរលកធាតុអាកាស អេហ្វ.អឹម (FM) គឺបិទស្ទើរតែអស់ទៅហើយ នៅសល់តែស្ថានីយវិទ្យុសំបុកឃ្មុំ និងស្ថានីយវិទ្យុស្ត្រីប៉ុណ្ណោះ។
ចំណែកអ្នកនាំពាក្យក្រសួងព័ត៌មាន លោក អ៊ុក គឹមសេង ថ្លែងប្រាប់អាស៊ីសេរី កាលពីថ្ងៃទី២៤ ខែសីហា ថា ប្រសិនបើម្ចាស់ស្ថានីយវិទ្យុទាំងឡាយណាដែលត្រូវបានក្រសួងដកហូតអាជ្ញាប័ណ្ណទាំងស្រុង មិនពេញចិត្តនឹងចំណាត់ការរបស់ក្រសួងពេលនេះ ពួកគេអាចមកជួបតវ៉ាជាមួយក្រសួងបាន។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី លើកឡើងថា ករណីម្ចាស់វិទ្យុ អេហ្វ.អឹម (FM) ក្នុងស្រុកដែលស្នើឲ្យក្រសួងព័ត៌មាន អនុញ្ញាតឲ្យពួកគេបានបើកដំណើរការឡើងវិញនេះ គឺជារឿងត្រឹមត្រូវ ព្រោះវិទ្យុទាំងនោះមានច្បាប់អនុញ្ញាត។ លោកបន្ថែមថា ប្រសិនបើក្រសួងព័ត៌មាន បិទវិទ្យុទាំងនេះ ធ្វើឲ្យប្រជាពលរដ្ឋទទួលព័ត៌មានពុំបានទូលំទូលាយឡើយ៖ «ចាំបាច់ក្រសួងដូចជារាជរដ្ឋាភិបាល ត្រូវធ្វើការណែនាំបន្ថែមឲ្យភាគីពាក់ព័ន្ធបំពេញបែបបទ ដើម្បីបានដំណើរឡើងវិញ ទើបប្រទេសយើងមានសិទ្ធិទទួលបានព័ត៌មាន ឬសង្គមរបស់យើងដំណើរការបានល្អ»។
ចំណែកមន្ត្រីសម្របសម្រួលអង្គការលីកាដូ (LICADHO) ខេត្តបាត់ដំបង លោក ហេង សាយហុង ទទូចឲ្យរដ្ឋាភិបាល និងមន្ត្រីពាក់ព័ន្ធ អនុញ្ញាតឲ្យវិទ្យុ អេហ្វ.អឹម (FM) ក្នុងស្រុកដែលផ្សាយបន្តកម្មវិធីព័ត៌មានរបស់វិទ្យុឯករាជ្យ បានបើកដំណើរការឡើងវិញឲ្យបានឆាប់ ពីព្រោះថ្ងៃបោះឆ្នោតកាន់តែខិតកៀកមកដល់ហើយ៖ «ជាធម្មតាសេរីភាពក្នុងការទទួលបានព័ត៌មានគ្រប់ជ្រុងជ្រោយ ត្រូវមានការផ្សាយព័ត៌មានឲ្យដល់គ្រប់ទិសទីនៅក្នុងប្រទេស ដើម្បីប្រជាពលរដ្ឋបានដឹង ដើម្បីងាយស្រួលអភិវឌ្ឍប្រទេសជាតិ»។
ក្រសួងព័ត៌មាន ក្រៅពីបិទស្ថានីយវិទ្យុ អេហ្វ.អឹម មួយចំនួនហើយ ក្រសួងព័ត៌មាន ក៏បានចេញលិខិតលុបចោលប្រកាស និងដកហូតហ្វ្រេកង់ពីបណ្ដាស្ថានីយនៅតាមខេត្តផ្សេងទៀត ដូចជាស្ថានីយវិទ្យុគិរីដងរែក ខេត្តឧត្តរមានជ័យ វិទ្យុស្ទឹងសែន ខេត្តកំពង់ធំ វិទ្យុកំពង់ចាម ខេត្តកំពង់ចាម និងវិទ្យុមហានគរ ជាដើម ក្រោមហេតុផលថា បានរំលោភប្រកាសអនុញ្ញាតធ្វើអាជីវកម្ម និងកិច្ចសន្យាដែលតម្កល់ទុកនៅក្រសួងព័ត៌មាន។
អ្នកគ្រប់គ្រងស្ថានីយវិទ្យុដែលត្រូវបានបិទទ្វារទាំងនោះ សង្ឃឹមថា ក្រោយពេលជួបជាមួយមន្ត្រីក្រសួងព័ត៌មាន ហើយ នឹងបានបើកដំណើរការវិទ្យុរបស់ខ្លួនឡើងវិញក្នុងពេលឆាប់ៗ។ ទន្ទឹមគ្នានេះ ករណីក្រសួងមិនអនុញ្ញាតឲ្យពួកគាត់បន្តអាជីវកម្ម ពួកគាត់ក៏ពុំទាន់មានផែនការថានឹងធ្វើយ៉ាងណាបន្តទៀតនៅឡើយ៕