គណៈរដ្ឋមន្ត្រី កាលពីថ្ងៃសុក្រ ទី២៥ ខែសីហា បានអនុម័តទាំងស្រុងដោយគ្មានការកែប្រែសេចក្ដីព្រាងគោលនយោបាយជាតិស្ដីពីមនុស្សវ័យចាស់ ឆ្នាំ២០១៧-២០៣០។
សេចក្ដីព្រាងគោលនយោបាយនេះ ផ្ដោតលើមធ្យោបាយ និងលទ្ធភាពដោះស្រាយបញ្ហារបស់មនុស្សចាស់។ ការឈានចូលវ័យចាស់របស់ប្រជាជនកម្ពុជា កំពុងកើនឡើងក្នុងអត្រាខ្ពស់ជាងមុន ហើយនឹងបន្តកើនឡើងបន្ថែមទៀត។ ការកើនឡើងនេះ ដោយសារតែការថយចុះនៃលទ្ធភាពមានកូន និងមនុស្សអាយុវែង។ ភាគរយប្រជាជនកម្ពុជា អាយុ ៦០ឆ្នាំឡើងមានចំនួន ៨% នៅឆ្នាំ២០១៣ នឹងមាននិន្នាការកើនឡើងដល់ ១១% នៅឆ្នាំ២០៣០។ គោលនយោបាយជាតិស្ដីពីមនុស្សវ័យចាស់ឆ្នាំ២០១៧-២០៣០ បានកំណត់យកអាយុ ៦០ ជាមនុស្សចាស់។
ដោយឡែកនៅក្នុងកិច្ចប្រជុំគណៈរដ្ឋមន្ត្រី ដែលមានលោកនាយករដ្ឋមន្ត្រី ហ៊ុន សែន ដែលជាអ្នកដឹកនាំកិច្ចប្រជុំនោះ បានណែនាំក្រសួងការងារ និងក្រសួងស្ថាប័នពាក់ព័ន្ធត្រូវរៀបចំឱ្យបានឆាប់រហ័សនូវប្រព័ន្ធប្រាក់សោធននិវត្តន៍ សម្រាប់កម្មករ កម្មការិនីឱ្យបានទូលាយដែលអាចគ្របដណ្ដប់លើវិស័យដទៃទៀត និងបន្តជំរុញការតប្រតាយទឹកភ្លើង តាមខ្នងផ្ទះជួលដែលកម្មករស្នាក់នៅ។ ជាមួយគ្នានេះដែរ លោក ហ៊ុន សែន ណែនាំឱ្យអាជ្ញាធររាជធានីខេត្ត ត្រូវសហការពិភាក្សាជាមួយម្ចាស់ផ្ទះ បន្ទប់ជួល ដើម្បីកុំឱ្យដំឡើងថ្លៃឈ្នួលយ៉ាងតិចរយៈពេល ២ឆ្នាំនេះ ក្នុងពេលដែលប្រាក់ឈ្នួលកម្មករត្រូវបានដំឡើង៕