ពលរដ្ឋ ទាហាន និងអ្នកមានលុយខ្លះចាប់ផ្ដើមសម្រុកទិញដី និងទន្ទ្រានដីព្រៃយកធ្វើកម្មសិទ្ធិនៅទឹកដីឃុំថ្មដា ស្រុកវាលវែង ខេត្តពោធិ៍សាត់ ដោយពុំមានសមត្ថកិច្ចទប់ស្កាត់។ ពលរដ្ឋឲ្យដឹងថា សកម្មភាពទន្ទ្រានដីព្រៃរបស់រដ្ឋកើតមានកាន់តែខ្លាំង ស្របពេលដែលឃុំថ្មដា ចាប់ផ្ដើមអភិវឌ្ឍតំបន់ទេសចរណ៍ទឹកធ្លាក់មានកាស៊ីណូ និងមានផ្លូវដោះដូរសេដ្ឋកិច្ចរវាងខ្មែរ-ថៃ។
អ្នកភូមិនៃឃុំថ្មដា ចំនួន ៤នាក់ដែលដឹងពីសកម្មភាពកាប់ទន្ទ្រានដីព្រៃរបស់រដ្ឋនៅក្បែរមូលដ្ឋានខ្លួនរស់នៅ ប៉ុន្តែថ្លែងក្នុងលក្ខខណ្ឌសុំមិនបញ្ចេញឈ្មោះ និងសំឡេង ដោយបារម្ភពីសុវត្ថិភាព ប្រាប់ថា អ្នកទន្ទ្រានដីព្រៃភាគច្រើនជាទាហានឈរជើងតាមបណ្ដោយព្រំដែនខ្មែរ-ថៃ និងបក្សពួក។ ពួកគេថា ផ្ទៃដីដែលបានកាប់បំផ្លាញនៅភូមិឯកភាព និងភូមិសង្គមថ្មី នៃឃុំថ្មដា មិនតិចជាង ២៥ហិកតារឡើយ។
ប្រភពពីពលរដ្ឋម្នាក់ក្នុងចំណោម ៤នាក់បន្ថែមថា ទីតាំងទើបទន្ទ្រានថ្មីមាននៅចំណុចស្ពានដែក ចំណុចខ្នង១៦ ឬវាលអុកគូទ នៃភូមិឯកភាព និងចំណុចវាលពួច នៃភូមិសង្គមថ្មី ឃុំថ្មដា ស្រុកវាលវែង។
អាស៊ីសេរី មិនអាចរកប្រភពទាក់ទងក្រុមទាហានឈរជើងតាមព្រំដែនខ្មែរ-ថៃ ក្នុងឃុំថ្មដា និងមេឃុំថ្មដា លោក ព្រុំ ង៉ុន ដើម្បីឆ្លើយតបនឹងការអះអាងរបស់ពលរដ្ឋនេះបានទេ នៅថ្ងៃទី២៥ ខែសីហា។
អភិបាលស្រុកវាលវែង លោក ហេង សុភាណា ធ្លាប់បញ្ជាក់ថា ទាំងបទល្មើសឈើ និងទន្ទ្រានដីព្រៃរបស់រដ្ឋ ខាងអាជ្ញាធរ និងមន្ត្រីជំនាញកំពុងប្រឹងប្រែងទប់ស្កាត់ និងអប់រំផ្សព្វផ្សាយដល់ពលរដ្ឋឲ្យបានយល់ដឹងពីបញ្ហាធនធានធម្មជាតិ។ លោកថា កម្លាំងសមត្ថកិច្ចក៏បង្ក្រាបបទល្មើសបានច្រើនករណី ក្នុងនោះក៏បានកសាងសំណុំរឿងបញ្ជូនជនសង្ស័យទៅតុលាការជាច្រើនករណីដែរ៖ «ខ្ញុំបានឲ្យជំនាញពិនិត្យមើលទាក់ទងការងារហ្នឹង ហើយទាំងការកាប់រានដីព្រៃ ឬក៏បទល្មើសព្រៃឈើ។ និយាយរួម យើងអនុវត្តជាប្រចាំ។ យើងធ្វើយ៉ាងម៉េចតាមយន្តការអាជ្ញាធរផង និងកម្លាំងជំនាញដើម្បីកុំឲ្យមានការកាប់រានយកដីនៅតំបន់ហ្នឹង»។
ទាក់ទងនឹងការទន្ទ្រានដីព្រៃយកធ្វើកម្មសិទ្ធិនេះ អាជ្ញាធរខេត្ត និងស្រុក ធ្លាប់ដឹកនាំកម្លាំងចម្រុះចាប់ពលរដ្ឋដាក់ពន្ធនាគារ និងដុតខ្ទមជាច្រើនខ្នងដែលពួកគេសង់នៅលើដីព្រៃរបស់រដ្ឋ ឋិតនៅចន្លោះឃុំក្រពើពីរ និងឃុំប្រមោយ កាលពីឆ្នាំ២០១៦។ កាលណោះ អាជ្ញាធរបានប្រើទាំងវិធីសាស្ត្រអប់រំ និងចាត់វិធានការក្ដៅ ដើម្បីឲ្យពួកគេចេញ ប៉ុន្តែពលរដ្ឋខ្លះនៅលួចចេញធ្វើស្រែចម្ការរហូតដល់សព្វថ្ងៃ។
អាជ្ញាធរស្រុកវាលវែង និងអាជ្ញាធរខេត្តពោធិ៍សាត់ ធ្លាប់ប្រាប់អាស៊ីសេរីថា អាជ្ញាធរមានសមត្ថកិច្ចមិនដែលបង្អង់ដៃក្នុងការបង្ក្រាប ឬទប់ស្កាត់បទល្មើសទន្ទ្រានដីព្រៃឡើយ ដើម្បីរក្សានូវនិរន្តរភាពព្រៃឈើ ឬការប្រែប្រួលអាកាសធាតុ។ ប៉ុន្តែគេសង្កេតឃើញនៅតាមបណ្ដោយផ្លូវលេខ៥៥ និងផ្លូវលំខ្លះក្នុងស្រុកវាលវែង ចាប់ផ្ដើមក្លាយទៅជាវាលបន្តិចម្ដងៗចាប់ពីតំបន់ទំនាប រហូតដល់ក្បែរជើងភ្នំតាំងពីឆ្នាំ២០១៣ មក៕