Clik here to view.
ប្រជាពលរដ្ឋនៅឃុំកក់ ស្រុកពញាក្រែក ខេត្តត្បូងឃ្មុំ បារម្ភខ្លាចសត្វគោក្របីរបស់ពួកគាត់ នឹងឆ្លងជំងឺបន្តទៀត ប្រសិនបើគ្មានការទប់ស្កាត់ទេនោះ។ ក្តីបារម្ភនេះ ក្រោយពេលនៅតាមមូលដ្ឋានរបស់ពួកគាត់រស់នៅ មានសត្វគោក្របីមួយចំនួនកើតជំងឺម្យ៉ាងជាបន្តបន្ទាប់ ដែលពលរដ្ឋមិនបានដឹងថាជំងឺអ្វីប្រាកដ។ ប្រធានមន្ទីរកសិកម្មខេត្ត ថានឹងឲ្យមន្ត្រីរបស់ខ្លួនចុះពិនិត្យមើលករណីនេះ។
ពលរដ្ឋនៅឃុំកក់ ស្នើឲ្យអាជ្ញាធរ និងមន្ត្រីជំនាញ ជួយយកចិត្តទុកដាក់ និងរិះរកវិធីបង្ការកុំឲ្យសត្វគោក្របីរបស់ពួកគាត់ឆ្លងជំងឺបន្តទៀត។ អ្នកភូមិដែលធ្លាប់មានគោក្របីឈឺ និយាយថា សត្វគោក្របីទាំងនោះមានអាការៈហើមពោះ ហៀរទឹកមាត់ ទន់ជើង និងមិនស៊ីស្មៅទេ។ អាការៈទាំងនេះ អ្នកភូមិមិនទាន់ដឹងថាជាជំងឺអ្វីប្រាកដ ហើយក៏មិនទាន់មានមន្ត្រីជំនាញចុះទៅពិនិត្យមើលដែរ។
ពលរដ្ឋនៅភូមិសន្ទៃ ឃុំកក់ លោកស្រី ជា ធារ៉ា ឲ្យដឹងថា គោរបស់ឪពុករបស់លោកស្រីមួយក្បាលបានឆ្លងជំងឺប្រភេទនេះ ក្រោយមកក៏ហៅពេទ្យសត្វក្នុងភូមិមកចាក់ថ្នាំអស់ជាង ១០ម៉ឺនរៀល ហើយក៏បានធូរស្រាលឡើងវិញ។ លោកស្រីបន្តថា មានអ្នកភូមិខ្លះសម្រេចលក់គោក្របីខ្លួនចេញ ក្រោយពេលផ្ទុះជំងឺជាបន្តបន្ទាប់នោះ៖ «ចា៎! ភ័យព្រួយខ្លាំងមែនទែនដែលចិញ្ចឹមក្របីគោហ្នឹង។ ទើបចូលឆ្នាំហ្នឹងដូចអត់មានឃើញគេចុះចាក់ថ្នាំចាក់អីផង ដូចថារាល់ឆ្នាំចាក់ អត់ដែលសូវព្រួយបារម្ភទេ»។
ប្រភពដដែលឲ្យដឹងថា ពលរដ្ឋនៅភូមិមួយចំនួនក្នុងឃុំកក់ មានគោក្របីកើតជំងឺប្រភេទនេះ។ សត្វគោក្របីចាប់ផ្ដើមកើតជំងឺរយៈពេលប្រមាណ ១ខែមកហើយ បណ្ដាលឲ្យអ្នកភូមិជាច្រើនបារម្ភខ្លាចសត្វពាហនៈរបស់ខ្លួនឆ្លងជំងឺបន្តទៀត ប្រសិនបើគ្មានវិធានការទប់ស្កាត់ទេ។
មេភូមិសន្ទៃ លោក នួន នី មានប្រសាសន៍ថា ក្នុងមួយរយៈពេលចុងក្រោយ ជំងឺដែលកើតឡើងចំពោះសត្វគោក្របីបានស្ងប់ទៅវិញ ប៉ុន្តែលោកមិនដឹងថា ភូមិផ្សេងមានករណីផ្ទុះជំងឺនោះដែរឬយ៉ាងណា។ លោកបញ្ជាក់ថា ប្រហែលមួយខែមកនេះមានសត្វគោក្របីចំនួន ៤ក្បាលនៅក្នុងភូមិរបស់លោកបានឈឺ ក្នុងនោះមានពីរក្បាលងាប់ ហើយពីរក្បាលទៀតម្ចាស់បានព្យាបាលជាសះស្បើយ។ មេភូមិរូបនេះមិនទាន់ដឹងថាជាប្រភេទជំងឺអ្វីប្រាកដទេ ប៉ុន្តែលោកឯកភាពចំពោះការព្រួយបារម្ភរបស់ពលរដ្ឋ ខ្លាចក្រែងជំងឺទាំងនោះឆ្លងរាលដាលបន្តទៀត៖ «បាទ! ថីមិនឯក ព្រោះយើងអត់មានអី។ ពេលដែលឈឺម្តងៗយើងរកពេទ្យចាក់អត់បានអ៊ីចឹង»។
ភូមិសន្ទៃ មានពលរដ្ឋចំនួន ២៣០គ្រួសារ និងមានសត្វគោក្របីជិត ១០០ក្បាល។
មេភូមិដដែលបន្ថែមថា ប្រសិនបើករណីនេះផ្ទុះឡើងទៀត ខាងលោកនឹងធ្វើរបាយការណ៍បញ្ជូនទៅមន្ត្រីជំនាញតាមរយៈអាជ្ញាធរឃុំ ដើម្បីចាត់វិធានការទប់ស្កាត់ជូនពលរដ្ឋ។
ប្រធានមន្ទីរកសិកម្មខេត្តត្បូងឃ្មុំ លោក ហេង ពិសិដ្ឋ មានប្រសាសន៍នៅថ្ងៃទី១២ សីហា ថា លោកនៅមិនទាន់ទទួលបានព័ត៌មានសត្វគោក្របីឈឺនៅឃុំកក់ ទេ ប៉ុន្តែលោកថានឹងឲ្យមន្ត្រីចុះពិនិត្យមើលករណីនេះ។ លោកបន្តថា ចាប់តាំងពីខែមេសា មក មានករណីផ្ទុះជំងឺអុតក្តាមចំពោះសត្វគោក្របីនៅតាមបណ្ដាស្រុកមួយចំនួន។ ជំងឺប្រភេទនេះមានអាការៈដូចគ្នាទៅនឹងអ្វីដែលពលរដ្ឋឃុំកក់ លើកឡើង ដូចជាហៀរទឹកមាត់ ឈឺជើង និងមិនស៊ីស្មៅ ជាដើម។ ជំងឺប្រភេទនេះ ច្រើនកើតឡើងនៅរដូវភ្លៀងធ្លាក់ ព្រោះមានទឹកសើម ហើយឆ្លងគ្នាតែម្តង៖ «កន្លងមកច្រើនតែមាន គឺជំងឺអុតក្តាម។ ជំងឺអុតក្តាម គឺដំបៅជើង និងដំបៅមាត់។ អ៊ីចឹងបើវាដំបៅមាត់ហើយ គឺវាហូរទឹកមាត់ហើយ»។
ប្រធានមន្ទីរដដែលបញ្ជាក់ថា ចាប់តាំងពីខែមេសា អាជ្ញាធរខេត្ត ពិសេសមន្ត្រីជំនាញបានចុះជួយព្យាបាលជំងឺអុតក្តាម និងជំងឺផ្សេងទៀតចំពោះគោក្របីរបស់ពលរដ្ឋនៅតាមស្រុកមួយចំនួន ដូចជាស្រុកក្រូចឆ្មារ ពញាក្រែក តំបែរ ស្រុកត្បូងឃ្មុំ ជាដើម។ គោក្របីដែលធ្លាប់បានព្យាបាលកន្លងទៅ គឺមានចំនួនមិនដល់ ១០០ក្បាលទេ។ លោកឲ្យដឹងដែរថា ក្រៅពីព្យាបាលគោក្របីជូនពលរដ្ឋហើយ មន្ត្រីជំនាញក៏បានចាក់ថ្នាំវ៉ាក់សាំងការពារប្រភេទជំងឺអុតក្តាម និងជំងឺសារទឹកដល់គោក្របីរបស់ពួកគាត់ជាច្រើនក្បាលផ្សេងទៀត។ លោកថា ក្នុងមួយឆ្នាំត្រូវចាក់ថ្នាំបង្ការជំងឺទាំងនោះដល់គោក្របីចំនួនពីរដង គឺមុនរដូវវស្សាចូលមកដល់ម្តង និងនៅចន្លោះពីខែកក្កដា ដល់ខែកញ្ញា ម្តងទៀត។
លោកផ្តល់ដំបូន្មានថា វិធីចាក់ថ្នាំវ៉ាក់សាំងដល់គោក្របី គឺជារឿងល្អបំផុត ព្រោះករណីគោក្របីកើតជំងឺអុតក្តាមហើយ មិនអាចចាក់ថ្នាំការពារបានទេ ពោលគឺរង់ចាំរហូតវាជាសះស្បើយជាមុន ទើបអាចចាក់ថ្នាំការពារបាន៕