មេដឹកនាំស្ថាប័នកំពូលនៃប្រទេសកម្ពុជា-វៀតណាម ប្រកាសបន្តរឹតចំណងសាមគ្គីភាពម៉ឺនឆ្នាំជាមួយគ្នាឲ្យស្អិតល្មួត ដោយប្ដេជ្ញាថា នឹងបង្កើនកិច្ចសហប្រតិបត្តិការជំរុញឲ្យមានការអភិវឌ្ឍលើគ្រប់វិស័យរវាងប្រទេសទាំងពីរឲ្យបានរីកចំរើនថែមទៀត។
ប្រធានព្រឹទ្ធសភានៃព្រះរាជាណាចក្រកម្ពុជា និងជាអនុប្រធានគណបក្សប្រជាជនកម្ពុជា លោក សាយ ឈុំ បានប្ដេជ្ញាចិត្តដូច្នេះនៅឱកាសចូលរួមជាអធិបតីពិធីដាក់សម្ពោធដាក់ឲ្យប្រើប្រាស់ស្តូបមិត្តភាពកម្ពុជា-វៀតណាម នៅខេត្តព្រះសីហនុ កាលពីព្រឹកថ្ងៃសៅរ៍ ទី២២ ខែកក្កដា។
នាឱកាសនោះ លោក សាយ ឈុំ បានរំលឹកនូវឧបសគ្គដ៏លំបាកៗជាច្រើនដែលប្រទេសទាំងពីរកម្ពុជា-វៀតណាម បានប្រឈមរួមគ្នាដោះស្រាយនៅក្នុងព្រឹត្តិការណ៍ប្រវត្តិសាស្ត្រជាច្រើនដំណាក់កាលកន្លងមកដែលឈានដល់រំដោះប្រទេសជាតិឲ្យរួចផុតពីរបបប្រល័យពូជសាសន៍ ប៉ុល ពត នៅថ្ងៃទី៧ ខែមករា ឆ្នាំ១៩៧៩ ហើយបានដឹកនាំប្រទេសកម្ពុជា ឲ្យមានសន្តិភាព និងការអភិវឌ្ឍន៍រីកចម្រើនមកដល់សព្វថ្ងៃនេះ។ លោក សាយ ឈុំ ដែលតាងនាមឲ្យបក្ស រដ្ឋ រណសិរ្ស និងប្រជាជនកម្ពុជា បានសម្ដែងជាថ្មីទៀតនូវការដឹងគុណដ៏ស្មោះស្ម័គ្រ និងជ្រាលជ្រៅ ព្រមទាំងចងចាំជានិច្ចចំពោះគុណូបការៈ ដ៏ធំធេងដែលវៀតណាម បានធ្វើពលិកម្មជួយកម្ពុជា។
លោក សាយ ឈុំ បានរំលឹកថា បើគ្មានថ្ងៃ២ ធ្នូ ឆ្នាំ១៩៧៨ ដែលជាថ្ងៃបង្កើតរណសិរ្សសាមគ្គីអភិវឌ្ឍន៍មាតុភូមិកម្ពុជា និងថ្ងៃជ័យជម្នះ ៧ មករា ឆ្នាំ១៩៧៩ ទេ នោះទំនងជាប្រទេសកម្ពុជា នឹងមិនមានអ្វីៗគ្រប់បែបយ៉ាងដូចសព្វថ្ងៃនេះទេ៖ «បានស្ដែងចេញជាផ្លែផ្កាលើគ្រប់វិស័យ ចាប់ពីវិស័យនយោបាយ រហូតដល់វិស័យសេដ្ឋកិច្ច សង្គមកិច្ច ទេសចរ វប្បធម៌ និងវិទ្យាសាស្ត្រ។ ទន្ទឹមគ្នានេះ ទំនាក់ទំនងពាណិជ្ជកម្មរវាងកម្ពុជា-វៀតណាម កាន់តែកើនឡើងជាលំដាប់»។
ចំណែកលោក ង្វៀន ហ៊្វូជុង (Nguyen Phu Trong) អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តវៀតណាម ដែលបានចូលរួមជាអធិបតី និងកាត់ខ្សែបូសម្ពោធស្តូបមិត្តភាពកម្ពុជា-វៀតណាម កាលពីព្រឹកថ្ងៃសៅរ៍ ទី២២ ខែកក្កដា។ លោកបានបញ្ជាក់ថា កម្ពុជា-វៀតណាម គឺជាមិត្តជិតខាងដ៏ជិតស្និទ្ធ ស្មាប្រកៀកស្មាជានិច្ចកាលជាមួយប្រជាជនកម្ពុជា ក្នុងដំណាក់កាលជាប្រវត្តិសាស្ត្រ តស៊ូដណ្ដើមឯករាជ្យជាតិ វាយផ្ដួលរំលំរបបប្រល័យពូជសាសន៍ ប៉ុល ពត។
លោក ង្វៀន ហ៊្វូជុង បានរំលឹកអំពីចំណងមិត្តភាពកម្ពុជា-វៀតណាម ដែលបានរឹតចំណងសាមគ្គីភាព និងកិច្ចសហប្រតិបត្តិការជាមួយគ្នារយៈពេលជាង ៥០ឆ្នាំកន្លងមកនេះ។ លោក ង្វៀន ហ៊្វូជុង សង្កត់ធ្ងន់ថា ចំណងមិត្តភាពរវាងកម្ពុជា-វៀតណាម នឹងបន្តមានភាពស្និទ្ធស្នាល និងកាត់តែស្អិតល្មួតថែមទៀត នៅថ្ងៃអនាគត។
អភិបាលខេត្តព្រះសីហនុ លោក យន្ត មីន បានឲ្យដឹងថា ស្តូបមិត្តភាពកម្ពុជា-វៀតណាម នៅខេត្តព្រះសីហនុ នេះ បានកសាងដំបូងក្នុងឆ្នាំ១៩៨៤ ដោយមានរូបសំណាកយុវជន ០២រូប ដៃកាន់អាវុធឈរនៅអមសងខាងស្ត្រីម្នាក់បីកូនតូចក្នុងដៃ។ ស្តូបនេះ ជានិមិត្តរូបនៃការរំលឹកគុណចំពោះពលីកម្មអាយុជីវិតរបស់យុទ្ធជនកម្ពុជា និងយុទ្ធជនស្ម័គ្រចិត្តវៀតណាម ជាពិសេសដើម្បីរំលឹកពីគុណូបការៈដ៏ថ្លៃថ្លារបស់យុទ្ធជនស្ម័គ្រចិត្តវៀតណាម ដែលបានបូជាសាច់ស្រស់ឈាមស្រស់ក្នុងបុព្វហេតុរំដោះប្រទេសកម្ពុជា ឲ្យរួចផុតពីរបបប្រល័យពូជសាសន៍ ប៉ុល ពត នៅថ្ងៃទី៧ ខែមករា ឆ្នាំ១៩៧៩ ក្រោមទង់រណសិរ្សសង្គ្រោះជាតិកម្ពុជា និងដើម្បីបញ្ជាក់អំពីចំណងសាមគ្គី មិត្តភាពជាអមតៈរវាងប្រទេសទាំងពីរ (កម្ពុជា-វៀតណាម)។
លោក យន្ត មីន ឲ្យដឹងថា ស្តូបមិត្តភាពកម្ពុជា-វៀតណាមនេះ សាងសង់នៅលើផ្ទៃក្រឡាដីសរុបជិត ៧ពាន់ម៉ែត្រការ៉េ (៦៧.៧៦៦) និងចំណាយថវិកាសរុបជិត ៧សែនដុល្លារសហរដ្ឋអាមេរិក (៦៧០.២៧២)។
ចំពោះអ្នកសិក្សាផ្នែកអភិវឌ្ឍន៍សង្គមរិះគន់ថា កម្ពុជាពុំទទួលបានប្រយោជន៍អ្វីសោះក្រៅពីការដឹងគុណវៀតណាម អស់មួយជីវិត។ បើមើលពីប្រវត្តិសាស្ត្រនៅក្នុងសង្គ្រាមជំនាន់អាណានិគមបារាំង ហើយនិងសង្គ្រាមទសវត្សរ៍ឆ្នាំ៧០ ក្នុងការរំដោះដីវៀតណាមខាងត្បូង ដោយមានការជួយគាំទ្រពីរដ្ឋាភិបាលខ្មែរយ៉ាងច្រើន ប៉ុន្តែជាអកុសលកម្ពុជា ពុំដែលបានទទួលការនឹកគុណនោះទេ គឺផ្ទុយគ្នាស្រឡះ។
តាមទិន្នន័យជាក់ស្ដែងនៅទូទាំងព្រះរាជាណាចក្រកម្ពុជា មានស្តូបមិត្តភាពកម្ពុជា-វៀតណាម មានចំនួន ១៧ស្តូប ក្នុងនោះមាននៅរាជធានីភ្នំពេញ ចំនួន១។
គិតមកដល់ពេលនេះ ក្នុងចំណោមស្តូបទាំង ១៧ គឺបានសាងសង់ និងជួសជុលឡើងវិញបានចំនួន ១២ស្តូប និងបានសម្ពោធដាក់ឲ្យប្រើប្រាស់បានចំនួន ៧ស្តូបរួចហើយ។ ចំណែកនៅថ្ងៃទី២៧ ខែកក្កដា ខាងមុខ នឹងបន្តសម្ពោធស្តូបមិត្តភាពកម្ពុជា-វៀតណាម ទី៨ នៅឯខេត្តបាត់ដំបង៕