Clik here to view.
កម្លាំងសមត្ថកិច្ចខេត្តកំពង់ឆ្នាំង សហការជាមួយអគ្គស្នងការនគរបាលជាតិ នៅព្រឹកថ្ងៃទី២២ ខែកក្កដា ឃាត់ខ្លួនជនសង្ស័យជាស្ត្រីម្នាក់ ចាប់កុមារជំរិតទារលុយពីឪពុកម្ដាយកុមាររងគ្រោះចំនួន ៤ពាន់ដុល្លារ។ ដំណឹងអំពីការបាត់ក្មេងស្រីអាយុ ៩ឆ្នាំ នៅសាលាបឋមសិក្សាអង្គលំទង ក្នុងភូមិព្រៃតាមួច ឃុំស្នំក្រពើ ស្រុកគងពិសី ខេត្តកំពង់ស្ពឺ ក្រោយពេលដែលកុមារីម្នាក់នោះចេញទៅរៀនបាត់តាំងពីព្រឹកថ្ងៃទី២០ កក្កដា។
កម្លាំងសមត្ថកិច្ចខេត្តកំពង់ឆ្នាំង បានបញ្ជូនខ្លួនស្ត្រីជនសង្ស័យចាប់កុមារជំរិតទារលុយពីឪពុកម្ដាយទៅកាន់ប៉ូលិសខេត្តកំពង់ស្ពឺ បន្ទាប់ពីបានសាកសួររួចនៅថ្ងៃទី២២ ខែកក្កដា។
ស្នងការខេត្តកំពង់ឆ្នាំង លោក ឡុច សុវណ្ណរ៉ា មានប្រសាសន៍ថា សមត្ថកិច្ចចាប់បានស្ត្រីជាជនសង្ស័យមានឈ្មោះ ហេង សុខលី វ័យជិត ៤០ឆ្នាំ ដែលត្រូវជាបងប្អូនជីដូនមួយរបស់ឪពុកកុមារីរងគ្រោះ ដោយបានប្រើល្បិចបោកបញ្ឆោតហៅកុមារីទៅក្នុងគោលបំណងចាប់ជំរិតទារលុយចំនួន ៤ពាន់ដុល្លារពីឪពុកម្ដាយកុមារ ប៉ុន្តែពុំមានធ្វើបាបកុមារនោះឡើយ។
លោកបន្តថា ជនសង្ស័យត្រូវបានឃាត់ខ្លួន ខណៈស្ត្រីរូបនេះបម្រុងបើកលុយនៅកន្លែងផ្ទេរលុយវីង (Wing) នាទីរួមខេត្តកំពង់ឆ្នាំង៖ «គាត់រៀបចំបើកហើយ ប៉ុន្តែកម្លាំងយើងក៏ធ្វើការតែម្ដងទៅ ព្រោះយើងបានភិនភាគមុខមាត់ ស្លាកស្នាមមកអស់ហើយ ផ្ទៀងផ្ទាត់ព័ត៌មានត្រឹមត្រូវហើយ ក៏ចាប់តែម្ដង។ ដាក់លើកទី១ ២ពាន់គាត់ព្រមទៅបើកទេ គាត់ថា ទាល់តែគ្រប់បានគាត់ទៅបើក លើកទី២ តថ្លៃគ្នាទៅនៅ ១.៥០០ សរុប ៣.៥០០បានទៅបើក ក៏បង្ក្រាបបានតែម្ដង។ ក្មេងនោះនៅជាមួយអ៊ំក៏វាមិនយំមិនអីដែរ»។
កាលពីថ្ងៃព្រហស្បតិ៍ ទី២០ កក្កដា កុមារីឈ្មោះ ម៉ុក ច័ន្ទរស្មី ហៅ ម៉ី អាយុ ៩ឆ្នាំ ជាសិស្សថ្នាក់ទី២ នៃសាលាបឋមសិក្សាអង្គលំទង ក្នុងភូមិព្រៃតាមួច ឃុំស្នំក្រពើ ស្រុកគងពិសី បានជិះកង់ទៅរៀនចម្ងាយប្រហែល ២គីឡូម៉ែត្រពីផ្ទះទៅសាលាដូចសព្វដង ប៉ុន្តែបានបាត់ខ្លួនមិនវិលត្រឡប់មកវិញ។ លោកស្នងការដដែលបន្តថា នៅថ្ងៃដដែលសមត្ថកិច្ចបានបញ្ជូនកុមារីប្រគល់ឲ្យអាណាព្យាបាលវិញ។
ម្ដាយរបស់កុមារីបាត់ខ្លួន គឺលោកស្រី ភី សោភា ថ្លែងថា ក្រុមគ្រួសារមានក្ដីត្រេកអរឥតឧបមានៅពេលទទួលបានដំណឹងថា កូនស្រីរបស់លោកស្រីពុំមានគ្រោះថ្នាក់ ហើយសមត្ថកិច្ចនាំមកឲ្យជួបគ្រួសារវិញ៖ «សម្រាប់ខ្ញុំបានធូរស្រាលឡើងវិញហើយ»។
លោកស្រីបានរៀបរាប់ថា នៅពេលបាត់កូនកាលពីថ្ងៃទី២០ កក្កដា មិនឃើញវិលមកផ្ទះ លោកស្រីបានសាកសួរក្មេងៗនៅសាលាជាមួយបានប្រាប់ភិនភាគស្ត្រីម្នាក់ បានប្រើក្មេងក្នុងសាលាឲ្យហៅកូនស្រីគាត់ ហើយបានក៏នាំចេញទៅ។ បញ្ហានេះអ្នកស្រុកអ្នកភូមិបានប្រាប់ដំណើរទំនងសង្ស័យលើស្ត្រីជាបងប្អូនស្រីជីដូនមួយខាងប្ដីលោកស្រីដែលគេឃើញមកភូមិ។ បញ្ហានេះគ្រួសារលោកស្រី និងអាជ្ញាធរមូលដ្ឋានប្ដឹងប៉ូលិសក្រសួងមហាផ្ទៃ។ ជុំវិញការបាត់នេះ លុះបាន ១ថ្ងៃ ១យប់ ទើបប្ដីរបស់លោកស្រីស្រាវជ្រាវរកលេខទូរស័ព្ទជនសង្ស័យបាន រួចហៅទៅទើបបានជួបកូនស្រីរបស់គាត់ជាអ្នកលើក និងបានប្រាប់ថា គេចាប់នាងទៅឆ្ងាយ រួចជនសង្ស័យបានប្រើកូនស្រីគាត់ឲ្យហៅមកម្ដងទៀត និងបញ្ជាឲ្យផ្ញើលុយតាមវីង ឲ្យជនសង្ស័យចំនួន ៤ពាន់ដុល្លារ។ បញ្ហានេះទើបប៉ូលិសឈានទៅចាប់ខ្លួនបាននៅថ្ងៃទី២២ កក្កដា៕
