អភិបាលខេត្តព្រះសីហនុ បានអះអាងថា បញ្ហាដែលកើតឡើងរវាងចៅសង្កាត់លេខ១ ថ្មីមកពីគណបក្សប្រឆាំង ជាមួយអតីតចៅសង្កាត់ និងស្មៀនសាលាសង្កាត់នេះពាក់ព័ន្ធនឹងការដណ្ដើមបន្ទប់គ្នាធ្វើការ បានដោះស្រាយសម្របសម្រួលរួចហើយដោយមន្ត្រីម្នាក់ៗ បានបង្ហាញឆន្ទៈចង់រួមសហការគ្នាធ្វើការងារបម្រើប្រជាពលរដ្ឋក្នុងមូលដ្ឋានឲ្យបានប្រសើរ ដើម្បីឈានដល់រួមចំណែកអភិវឌ្ឍសង្គមជាតិឲ្យរីកចម្រើនថែមទៀត។ អ្នកឃ្លាំមើលសង្គមគាំទ្រការបញ្ចប់ការពាក់មុខយក្សដាក់គ្នានៅពេលនេះ។
អភិបាលខេត្តព្រះសីហនុ លោក យន្ត មីន មានប្រសាសន៍ថា បញ្ហាទាស់ទែងដណ្ដើមបន្ទប់ធ្វើការងាររបស់អតីតចៅសង្កាត់ និងចៅសង្កាត់លេខ១ ទើបជាប់ឆ្នោតថ្មី បានដោះស្រាយរួចហើយ។ ជាងនេះទៀត ចំពោះបញ្ហាខ្វែងគំនិត ឬមិនទាន់យល់ចិត្តគ្នារវាងចៅសង្កាត់លេខ១ ថ្មី លោក អ៊ុក ចេត្តនី ជាមួយអ្នកស្រី សុខ ស៊ីថា ស្មៀនសង្កាត់លេខ១ ក៏បានដោះស្រាយរួចហើយដែរ។
ថ្លែងប្រាប់អាស៊ីសេរី នៅព្រឹកថ្ងៃសុក្រ ទី១៤ ខែកក្កដា អ្នកស្រី សុខ ស៊ីថា ស្មៀនសាលាសង្កាត់លេខ១ បានលើកដៃសំពះស្នើសុំការអភ័យទោសដល់ប្រជាពលរដ្ឋទូទៅទាំងក្នុង និងក្រៅប្រទេសចំពោះកំហុសឆ្គងរបស់អ្នកស្រី ដែលជ្រុលជ្រួសប្រើពាក្យសម្ដីមិនសមរម្យទៅលើចៅសង្កាត់លេខ១ ថ្មី លោក អ៊ុក ចេត្តនី។ ស្មៀនសង្កាត់លេខ១ រូបនេះ មិនចង់បកស្រាយវែងឆ្ងាយទៅលើខ្លឹមសារផ្សេងៗ មុនឈានដល់អ្នកស្រីផ្ទុះកំហឹង ហើយបានប្រើកាយវិការ និងពាក្យសម្ដីដែលត្រូវគេថតវីដេអូបង្ហោះតាមបណ្ដាញសង្គម លើវិវាទជាមួយចៅសង្កាត់ថ្មីនេះទៀតទេ ដោយគ្រាន់តែបញ្ជាក់ខ្លីថា មានភ្លើងទើបមានផ្សែង។
យ៉ាងនេះក្តី អ្នកស្រី សុខ ស៊ីថា បញ្ជាក់ថា អ្នកស្រីបានបំភ្លេចចោលភាពមិនចុះសម្រុងគ្នារវាងរូបអ្នកស្រីជាមួយលោកចៅសង្កាត់លេខ១ ថ្មី លោក អ៊ុក ចេត្តនី ហើយងាកមករួមសហការគ្នា ធ្វើការងារតាមតួនាទីបម្រើប្រជាពលរដ្ឋក្នុងមូលដ្ឋានឲ្យរីកចម្រើនជំនួសវិញ៖ «ដំបូងឡើយគឺសកម្មភាពដែលកើតមានឡើងនៅក្នុងបណ្ដាញសង្គមហ្វេសប៊ុក (Facebook) ដែលគេបង្ហោះប៉ុន្មានថ្ងៃមកហ្នឹង គឺជាសកម្មភាពនៃការជួបជជែកគ្នារវាងខ្ញុំជាមួយលោកចៅសង្កាត់ថ្មីចុងក្រោយគេបំផុត មិនមែនជាសកម្មភាពទើបកើតឡើងដំបូងនោះទេ។ សកម្មភាពចុងក្រោយនៅក្នុងកំហឹងរបស់នាងខ្ញុំហ្នឹងគឺនៅចំណុចចុងក្រោយនៃការជួបជជែកគ្នា ហើយត្រូវបានបានបងប្អូនទាំងអស់គ្នាលើកយកត្រង់ចំណុចចុងក្រោយតែបន្តិចដែលចង្អុលមុខចៅសង្កាត់ហ្នឹង យកមកបកស្រាយចោទ និងតិះដៀលមកលើនាងខ្ញុំ ប៉ុន្តែបងប្អូនមិនបានដឹងរឿងកន្លង មុននឹងនាងខ្ញុំផ្ទុះកំហឹងកើតឡើងហ្នឹងនោះទេ»។
ចំណែកចៅសង្កាត់លេខ១ ទើបជាប់ឆ្នោតថ្មី លោក អ៊ុក ចេត្តនី ផ្ដល់សម្ភាសន៍ថា រូបលោកក៏បានលះបង់ចោលការទាមទារបន្ទប់ការិយាល័យធ្វើការងារដែលអតីតចៅសង្កាត់ចាស់ធ្លាប់អង្គុយធ្វើការងារ ៣អាណត្តិមកហើយនោះចោលដែរ ដោយទុកបន្ទប់ចាស់នោះជូនអតីតចៅសង្កាត់ លោក ឈិត សុផាត ដែលបច្ចុប្បន្នជាជំទប់ទី២ ជូនលោកនៅកន្លែងដដែល ហើយលោកសុខចិត្តជ្រើសយកបន្ទប់ធ្វើការងារថ្មីជំនួសវិញ។
ចៅសង្កាត់លេខ១ ថ្មីមកពីគណបក្សសង្គ្រោះជាតិរូបនេះ អំពាវនាវដល់សមាជិកក្រុមប្រឹក្សាសង្កាត់ទាំងជំទប់ទី១ ទី២ និងស្មៀនសង្កាត់ទាំងអស់ ឲ្យងាកមករួមសហការធ្វើការងារបម្រើប្រជាពលរដ្ឋក្នុងមូលដ្ឋានឲ្យបានឆាប់រហ័សវិញ៖ «ខ្ញុំក៏អរគុណដល់សមាជិក សមាជិកា និងបងប្អូនប្រជាពលរដ្ឋទាំងអស់ក្នុងមូលដ្ឋានសង្កាត់លេខ១ ស្នើឲ្យចូលរួមសហការគ្នាដើម្បីជំរុញឲ្យមូលដ្ឋានយើងរីកចម្រើនទាំងអស់គ្នា»។
មន្ត្រីឃ្លាំមើលការអភិវឌ្ឍសង្គម បានស្វាគមន៍ការសម្របសម្រួលគ្នារបស់សមាជិកក្រុមប្រឹក្សាសង្កាត់លេខ១ នៅពេលនេះ។
អ្នកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ ចាត់ទុកករណីឈ្លោះទាស់ទែងដណ្ដើមបន្ទប់ការិយាល័យធ្វើការងាររបស់អតីតចៅសង្កាត់ និងចៅសង្កាត់លេខ១ ទើបជាប់ឆ្នោតថ្មី ថាជារឿងតូចតាច និងត្រូវតែបញ្ចប់ឲ្យបានឆាប់។
វិវាទនេះបានកើតមានក្រោយការប្រកាសសុពលភាពចៅសង្កាត់លេខ១ ទើបជាប់ឆ្នោតអាណត្តិទី៣ ចូលកាន់តំណែង កាលពីថ្ងៃទី៣ ខែកក្កដា ដោយអតីតចៅសង្កាត់លេខ១ លោក ឈិត សុផាត ដែលចាញ់ឆ្នោត បានក្រាញននៀលមិនព្រមប្រគល់បន្ទប់ការិយាល័យធ្វើការរបស់ខ្លួនធ្លាប់អង្គុយរយៈពេល ៣អាណត្តិមកហើយនោះ ទៅឲ្យចៅសង្កាត់ទើបជាប់ឆ្នោត លោក អ៊ុក ចេត្តនី នោះទេ។ ការមិនប្រគល់បន្ទប់នេះ លោក ឈិត សុផាត សំអាងថា អគារសាលាសង្កាត់នេះ ត្រូវបានគណបក្សប្រជាជនកម្ពុជា និងសប្បុរសជនជាអ្នកចេញថវិកាសាងសង់។ ក្នុងនោះបន្ទប់ធ្វើការរបស់លោក លោកក៏បានចេញលុយផ្ទាល់ខ្លួនទិញសម្ភារៈតុបតែងភ្លើង និងមានតុទូដាក់ឯកសារផ្ទាល់ខ្លួនច្រើននៅក្នុងបន្ទប់ធ្វើការនេះ ដែលមានផលវិបាកក្នុងការរុះរើចេញ។
ក្រោយមកទៀត នៅល្ងាចថ្ងៃទី១១ ខែកក្កដា ក៏មានការបង្ហោះឃ្លិបវីដេអូខ្លីមួយ ដែលបង្ហាញអំពីសកម្មភាពរបស់ស្មៀនសាលាសង្កាត់លេខ១ ឈ្មោះ សុខ ស៊ីថា បានប្រើពាក្យសម្ដី និងកាយវិការមិនសមរម្យទៅលើលោក អ៊ុក ចេត្តនី ចៅសង្កាត់លេខ១ ទើបជាប់ឆ្នោតថ្មី ដែលបានទាមទារពិនិត្យត្រា នៅចុងម៉ោងធ្វើការងារ ដែលត្រូវអ្នកស្រី សុខ ស៊ីថា ចោទចៅសង្កាត់ថ្មីរូបនេះថា មិនគោរពតួនាទី ឬជ្រៀតជ្រែកពេលម៉ោងធ្វើការងាររបស់ខ្លួន ព្រោះម៉ោងនោះអ្នកស្រីបានបិទទ្វារបន្ទប់ការិយាល័យ និងត្រៀមចេញពីបរិវេណសាលាសង្កាត់ទៅហើយនោះ។
យ៉ាងណាក៏ដោយចុះ វិវាទដែលកើតមាននៅក្នុងសាលាសង្កាត់លេខ១ នេះ ត្រូវលោក យន្ត មីន អភិបាលខេត្តព្រះសីហនុ និងភាគីជម្លោះពាក់ព័ន្ធ មានអតីតចៅសង្កាត់ ចៅសង្កាត់ទើបជាប់ឆ្នោតថ្មី និងស្មៀនសាលាសង្កាត់លេខ១ អះអាងថា បានព្រមព្រៀងស្រុះស្រួលគ្នាបញ្ចប់វិវាទរួចហើយ ហើយងាកមករួមសហការគ្នាធ្វើការងារតាមតួនាទី ដើម្បីបម្រើសេចក្ដីត្រូវការជូនប្រជាពលរដ្ឋក្នុងមូលដ្ឋាន ចាប់ពីថ្ងៃសុក្រ ទី១៤ ខែកក្កដា ឆ្នាំ២០១៧ តទៅ៕