អង្គការជនពិការកម្ពុជា លើកឡើងថា ស្ថាប័នឯកជននៅតែរើសអើងចំពោះជនពិការក្នុងការផ្តល់ការងារធ្វើ ហើយជាងនេះទៅទៀត ជនពិការជាមុខសញ្ញាដែលក្រុមហ៊ុនត្រូវបញ្ឈប់មុនគេ។ ការលើកឡើងបែបនេះ ក្នុងសិក្ខាសាលាមួយនៅថ្ងៃទី១៤ ខែកក្កដា ស្តីពីការលើកកម្ពស់សិទ្ធិជនពិការ។
ទោះច្បាប់ស្ដីពីជនពិការបានចូលជាធរមានជាច្រើនឆ្នាំហើយក្តី ប៉ុន្តែអ្នកធ្វើការងារទាក់ទងជនពិការនៅតែរកឃើញថា ជនពិការរងការរើសអើង និងជួបបញ្ហានៅពេលជនពិការមិនទាន់ទទួលបានការយកចិត្តដាក់ខ្ពស់ពីមជ្ឈដ្ឋានទូទៅបានទូលំទូលាយនៅឡើយ។
ប្រធានអង្គការជនពិការកម្ពុជា លោក ងិន សៅរ័ត្ន លើកឡើងពីករណីជាក់ស្ដែងមួយថា កាលពីពេលថ្មីៗនេះ ក្រុមហ៊ុនបរទេសមួយបានបញ្ឈប់ជនពិការចំនួន ៨នាក់មុនដំបូងគេនៃបុគ្គលិកទាំងអស់នោះ ដោយលើកហេតុផលថា ក្ស័យធន។ លោកឲ្យដឹងទៀតថា រដ្ឋាភិបាលបានយកចិត្តទុកដាក់លើជនពិការច្រើន ប៉ុន្តែវិស័យឯកជននៅតែរើសអើងជនពិការដដែល៖ «អ៊ីចឹងការរើសអើងយើងឃើញថា ការបញ្ឈប់ពីការងារគឺជនពិការត្រូវបានគេផ្ដល់អាទិភាពបញ្ឈប់មុនអ្នកមិនពិការទៅវិញ»។
ទិន្នន័យសកលលោកក្នុងបណ្ដាប្រទេសកំពុងអភិវឌ្ឍន៍បង្ហាញថា បច្ចុប្បន្នក្នុងចំណោមជនពិការ ១០នាក់ មានជនពិការ ៨នាក់ កំពុងរស់នៅក្នុងភាពក្រីក្របំផុត ហើយពួកគេរស់នៅក្នុងភាពឯកោដែលទាមទារឲ្យប្រទេសកំពុងអភិវឌ្ឍន៍ទាំងនោះយកចិត្តទុកដាក់លើឱកាសការងារជូនពួកគេ។
ប្រធានអង្គការជនពិការកម្ពុជា លោក ងិន សៅរ័ត្ន ស្នើឲ្យមានការផ្សព្វផ្សាយច្បាប់ស្ដីពីសិទ្ធិជនពិការឲ្យបានទូលំទូលាយ ដើម្បីបញ្ឈប់ ឬកាត់បន្ថយការរើសអើងជនពិការ។ លោកថា រដ្ឋាភិបាលជាអ្នកដើរតួនាទីមុនគេក្នុងការលើកកម្ពស់សិទ្ធិជនពិការ៕