អ្នកភូមិរាប់រយនាក់នាំគ្នាតវ៉ារឿងតម្លៃពោតកំពុងចុះថោក បានសម្រេចរំសាយ និងបើកផ្លូវចរាចរណ៍ធម្មតាវិញ បន្ទាប់ពីមន្ត្រីអាជ្ញាធរខេត្តបាត់ដំបង សន្យាថា នឹងដោះស្រាយបញ្ហានេះជូនពួកគាត់នៅ ៣ថ្ងៃទៀត បន្ទាប់ពីបានបិទផ្លូវប្រមាណ ៨ម៉ោង។
ពលរដ្ឋរាប់រយនាក់ នាំគ្នាតវ៉ាតាំងពីម៉ោងប្រមាណ ៨ព្រឹក រហូតដល់ម៉ោង ៤រសៀលទើបរំសាយទៅវិញ។ ការតវ៉ានោះពលរដ្ឋប្រើរថយន្តប្រហែល ១០០គ្រឿង បិទផ្លូវលើចំណុចផ្លូវបំបែកលេខ៣០ ដែលជាទីប្រជុំនៃចរាចរណ៍កុះករ ស្ថិតក្នុងឃុំតាគ្រី ស្រុកកំរៀង ក្រោយពីតម្លៃពោតរបស់ពួកគេបានធ្លាក់ចុះយ៉ាងខ្លាំងដែលនាំឲ្យពួកគាត់ប្រឈមមុខនឹងការរឹបអូសដីធ្លីពីធនាគារ។
ពលរដ្ឋម្នាក់ក្នុងចំណោមអ្នកតវ៉ា លោក នាក់ វណ្ណី ថ្លែងនៅថ្ងៃទី១៣ ខែកក្កដា ថា ពីរឆ្នាំជាប់គ្នាហើយដែលលោកខាតបង់ដោយសារពោតធ្លាក់ថ្លៃនេះ ដែលលោកថា មិនតិចជា ២ម៉ឺនដុល្លារក្នុងមួយឆ្នាំៗ នោះទេ។ បញ្ហានេះលោកថា ពលរដ្ឋស្នើសុំឲ្យអាជ្ញាធរអន្តរាគមន៍ធ្វើយ៉ាងណាឲ្យតម្លៃពោតអាចលក់ចេញបានយ៉ាងហោចបាន ៣បាតកន្លះ ទៅ ៥បាត ឬថា ពី ៤០០ ទៅ ៦០០រៀល ក្នុង១គីឡូក្រាម ទើបអាចទប់ទល់ថ្លៃដើមបាន។
លោកបញ្ជាក់ថា ពលរដ្ឋតវ៉ានេះដើម្បីដាក់សម្ពាធឲ្យអាជ្ញាធរពាក់ព័ន្ធអន្តរាគមន៍ ប៉ុន្តែអាជ្ញាធរខេត្តបានសន្យាថា នឹងដោះស្រាយជូនពួកគាត់ ៣ថ្ងៃទៀត ទើបអ្នកភូមិសម្រេចចិត្តរំសាយទៅវិញ៖ «អភិបាលខេត្តរងបាត់ដំបង សូមពន្យារពេល ៣ថ្ងៃដើម្បីដោះស្រាយ ប៉ុន្តែខាងប្រជាពលរដ្ឋខុសចិត្តរំសាយមែន តែមុខស្ងួតដល់ហើយ បើ ៣ថ្ងៃនេះដោះស្រាយអត់បាយគឺអាចធ្វើម្ដងទៀត»។
ពលរដ្ឋដដែលបន្តថា ពីមុនឈ្មួញថៃ ទិញពោតស្នូលសំងួតជាមធ្យមពីពួកគេក្នុង ១គីឡូក្រាមតម្លៃ ៥បាត ដែលស្មើប្រហែល ៦០០រៀល ប៉ុន្តែពេលនេះឈ្មួញថៃ ព្រមទិញក្នុងតម្លៃតែ ៣បាត ប្រហែលនឹង ៤០០រៀល ក្នុង១គីឡូក្រាម ឬថោកជាងនេះ មិនអាចទូទាត់ថ្លៃចំណាយ និងឈ្នួលកម្មករបានឡើយ៕