ពលរដ្ឋរស់នៅខ្សែទឹកខាងក្រោមនៃទន្លេស្រែពក ក្នុងស្រុកសេសាន ខែត្រស្ទឹងត្រែង ភ័យព្រួយពីការធ្លាក់ចុះទិន្នផលត្រីឆ្នាំនេះ ធ្វើឲ្យប៉ះពាល់របរចិញ្ចឹមជីវិតរបស់អ្នកភូមិ ខណៈពលរដ្ឋរស់នៅទីនោះ ប្រមាណ ៧០ភាគរយ ពឹងផ្អែកលើផលនេសាទ។ អ្នកភូមិថា បើក្រុមហ៊ុនសាងសង់ទំនប់វារីអគ្គិសនីសេសានក្រោម២ បិទទ្វារទឹក វានឹងធ្វើឲ្យស្ថានភាពទឹកប្រែប្រួល នឹងរាំងខ្ទប់ដំណើររបស់ត្រី។
ការបារម្ភនេះ ក្រោយពីក្រុមហ៊ុនទំនប់វារីអគ្គិសនីសេសានក្រោម២ បានជូនដំណឹងស្ដីពីការបិទទ្វារទឹកសាកល្បងនៅថ្ងៃទី១៥ ខែកក្កដា បង្កឲ្យពលរដ្ឋមានមុខរបរនេសាទ និងពលរដ្ឋរស់នៅតាមដងទន្លេ ប្រឈមការធ្លាក់ចុះប្រាក់ចំណូល បញ្ហាផ្លូវចិត្ត សន្តិសុខស្បៀង និងប៉ះពាល់បំណិនជីវិតជាដើម។
ពលរដ្ឋរស់នៅខ្សែទឹកខាងក្រោមនៃទន្លេស្រែពក នៃស្រុកសេសាន លោក ម៉ៃ វាសនា ឲ្យដឹងនៅថ្ងៃទី១២ ខែកក្កដា ថា រយៈពេលប៉ុន្មានខែចុងក្រោយនេះ អ្នកនេសាទនៅឃុំភ្លុក និងឃុំកំភុន មិនអាចចាប់ត្រីបរិភោគបានដូចឆ្នាំមុនៗឡើយ។ អ្នកភូមិមួយចំនួនត្រូវចំណាយប្រាក់ទិញត្រីពីផ្សារមកបរិភោគ ហើយពលរដ្ឋមានទម្លាប់នេសាទលក្ខណៈគ្រួសារ ផ្គត់ផ្គង់ការហូបចុកប្រចាំថ្ងៃ ក៏កំពុងប្រឈមដែរ ព្រោះពួកគេពុំសូវចាប់ត្រីបានសោះ ហើយបើចាប់ត្រីបានគឺបានតែត្រីល្អិត ឬតូចៗ៖ «ភាគច្រើនអ្នករកត្រីអត់សូវបានភាគច្រើនគឺទិញត្រីដែលគេជិះម៉ូតូដើរលក់ អ្នកខ្លះបង់ពីរទៅបីថ្ងៃអត់បាន ត្រីអ្នកនេសាទឥឡូវលែងមានហើយ ភាគច្រើនទិញត្រីចិញ្ចឹមយកមកលក់។ អត់ដូចពីមុន ពីមុនទៅដេកមួយយប់ យើងបង់សំណាញ់ដាក់មងអីបានត្រីច្រើន»។
បុរសដដែលមើលឃើញថា ការធ្លាក់ចុះទិន្នផលត្រី ដោយសារការសាងសង់ទំនប់វារីអគ្គិសនីសេសានក្រោម២ បង្កឲ្យរាំងខ្ទប់ដំណើររបស់ត្រី និងប៉ះពាល់ជម្រកត្រីពងកូន ហេតុនេះពួកគេចង់ឲ្យរាជរដ្ឋាភិបាល បញ្ចុះតម្លៃអគ្គិសនីជូនអ្នកភូមិដែលរងគ្រោះបញ្ហានេះ ដើម្បីបង់រំលោះផ្លូវចិត្តពលរដ្ឋ។
លិខិតចុះថ្ងៃទី៥ ខែមិថុនា ឆ្នាំ២០១៧ របស់ក្រុមហ៊ុនទំនប់វារីអគ្គិសនីសេសានក្រោម២ បញ្ជាក់ថា ប្រសិនបើក្រុមហ៊ុនបិទទ្វារទឹកសាកល្បងនៅពាក់កណ្ដាលខែកក្កដា ឆ្នាំ២០១៧ កម្រិតទឹកនឹងឡើងដល់ ៧២ម៉ែត្រ បណ្ដាលឲ្យលិចលង់ភូមិក្បាលរមាស និងភូមិស្រែគរចាស់។ ក្រុមហ៊ុនចាត់ទុកការបិទទ្វារទឹកសាកល្បង គឺជាទិសដៅនៃការអនុវត្តគម្រោង។ ចំណែកមន្ត្រីសង្គមស៊ីវិលវាយតម្លៃថា ស្ថានភាពទឹកទន្លេស្រែពក ផ្នែកខាងក្រោមទំនប់ កន្លែងខ្លះនឹងរីងរាក់ខុសប្រក្រតី បង្កឲ្យប៉ះពាល់ធ្ងន់ធ្ងរដល់ទីតាំងជម្រករបស់ជីវចម្រុះ។
មេឃុំភ្លុក ស្រុកសេសាន លោក ទូន ថាំង កត់សម្គាល់ថា ពលរដ្ឋរស់នៅឃុំភ្លុក ៧០ភាគរយ មានមុខរបរនេសាទចិញ្ចឹមជីវិតក្នុងនោះ ១០ភាគរយ នេសាទលក្ខណៈគ្រួសារ។ លោកបារម្ភដែរថា បើក្រុមហ៊ុនបិទទ្វារទឹកពលរដ្ឋរស់នៅខ្សែទឹកខាងក្រោមនឹងប្រឈមការខ្វះខាតត្រីចិញ្ចឹមជីវិតប្រចាំថ្ងៃ និងបាត់បង់មុខរបរអ្នកភូមិ។ ហេតុនេះអាជ្ញាធរឃុំមានគម្រោង ប្រើកញ្ចប់ថវិកាមូលនិធិឃុំ ឲ្យអ្នកភូមិធ្វើកសិកម្មចិញ្ចឹមជីវិតជំនួសដោយការនេសាទ៖ «ខ្ញុំមានគម្រោងឆ្នាំក្រោយ ខ្ញុំនឹងយកលុយអភិវឌ្ឍន៍ជីកស្រះឲ្យពលរដ្ឋ ដើម្បីប្តូរមកជាកសិកម្មវិញ ហើយមុខរបរនេសាទគាត់ប្រហែលជាអាចបាត់បង់ខ្លះ»។
របាយការណ៍ស្រាវជ្រាវរបស់អង្គការសម្ពន្ធភាពដើម្បីអភិរក្សធនធានជលផល កាលពីឆ្នាំ២០១៣ បង្ហាញថា ប្រសិនបើទំនប់វារីអគ្គិសនីសេសានក្រោម២ បើកឲ្យដំណើរការ នឹងបង្កឲ្យបរិមាណត្រីក្នុងអាងទន្លេមេគង្គ និងទន្លេសាបធ្លាក់ចុះប្រមាណ ១០% (៩,៣%) និងកាត់បន្ថយលំហូរដីល្បាប់ប្រហែល ៦% ទៅ ៨% ហើយពលរដ្ឋរាប់ម៉ឺននាក់រស់នៅតាមដងទន្លេមេគង្គ ប្រឈមការប៉ះពាល់ជីវភាព និងសន្តិសុខស្បៀង។
មន្ត្រីសម្របសម្រួលអង្គការបណ្ដាញការពារទន្លេបី លោក លាង ប៊ុនលាភ យល់ថា បើក្រុមហ៊ុនបិទទ្វារទឹកសាកល្បង បណ្ដាលឲ្យផ្ទៃទឹកទន្លេផ្នែកខាងលើមានកម្ពស់ខ្ពស់ ពុំអនុញ្ញាតឲ្យត្រីធ្វើចរាចរណ៍បានទេ ជាពិសេសគំរាមកំហែងលក្ខខណ្ឌជីវសាស្ត្ររបស់ត្រី។ លោកថា តំបន់ទន្លេស្រែពក ជាជម្រកត្រីកម្រក្នុងតំបន់រស់នៅ និងពងកូន ហេតុនេះការបិទទន្លេទាំងស្រុងបង្កការរាំងខ្ទប់ដំណើរឡើងចុះរបស់ត្រីគ្រប់ប្រភេទ និងប្រព័ន្ធជីវចម្រុះក្នុងទន្លេ នឹងនាំឲ្យត្រីកម្រក្នុងតំបន់មួយចំនួនផុតពូជ៖ «ខ្ញុំគិតថា គួរណាស់តែរួមគ្នាធ្វើម៉េចគិតពីសុខទុក្ខពលរដ្ឋ ដែលគាត់បាត់បង់ធនធាន។ គួរណាស់តែយើងមានអ្វីជំនួសគាត់ អាចទទួលផលវិញបានសម្រាប់ចិញ្ចឹមជីវភាពប្រចាំថ្ងៃ»។
តំបន់ទន្លេបី រួមមានទន្លេសេសាន ទន្លេស្រែពក និងទន្លេសេកុង គឺជាប្រភពនៃជម្រកត្រីក្នុងតំបន់ រួមមានត្រីប៉ាសេអ៊ី ត្រីប៉ាវ៉ាមុខពីរ ឬត្រីប៉ាកក និងត្រីក្អែកជាដើម ហើយត្រីទាំងនោះច្រើនរស់នៅចំណុចប្រសព្វគ្នារវាងទន្លេសេសាន និងទន្លេស្រែពក ជាតំបន់សម្បូរថ្ម និងដង្ហើមទឹកហូរធម្មជាតិ មានអុកស៊ីហ្សែនខ្ពស់ ក៏ប៉ុន្តែបើទន្លេសេសាន និងទន្លេស្រែពក ត្រូវបានបិទទាំងស្រុង នឹងប៉ះពាល់ដល់លក្ខខណ្ឌជីវសាស្ត្ររបស់ត្រី និងប្រព័ន្ធជីវចម្រុះក្នុងទន្លេ៕