តុលាការក្រុងភ្នំពេញ បានបង្គាប់ជាថ្មីទៀតឲ្យនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ នាំខ្លួនស្ត្រីម្នាក់ដែលប្រមាថលោកនាយករដ្ឋមន្ត្រី ហ៊ុន សែន និងក្រុមគ្រួសាររបស់លោកថា មានបាតដៃប្រឡាក់ឈាម ព្រោះតែបាញ់សម្លាប់លោកបណ្ឌិត កែម ឡី មកសាកសួរ។ អង្គការផ្នែកសិទ្ធិមនុស្សយល់ឃើញថា ការអនុវត្តច្បាប់នៅកម្ពុជា នៅតែមើលឃើញថា ធ្វើឡើងមានស្តង់ដារ២នៅឡើយ បើទោះជាក្នុងពេលកន្លងទៅតុលាការថ្លែងការពារថា ច្បាប់គឺច្បាប់ ហើយអ្នកប្រព្រឹត្តបទល្មើសត្រូវតែអនុវត្តទៅតាមទោសទណ្ឌ។
ចៅក្រមស៊ើបសួរនៃតុលាការក្រុងភ្នំពេញ សម្រេចចេញដីកាឃុំខ្លួនបណ្ដោះអាសន្ននៅពន្ធនាគារព្រៃសភ្លាមៗ ក្រោយបញ្ចប់ការសាកសួរប្រឆាំងស្ត្រីឈ្មោះ ហេង លក្ខិណា ដែលចោទលោក ហ៊ុន សែន និងក្រុមគ្រួសាររបស់លោកថា ជាអ្នកដែលបាញ់សម្លាប់លោកបណ្ឌិត កែម ឡី។
នៅថ្ងៃទី១៣ ខែកក្កដា តំណាងអយ្យការអមសាលាដំបូងរាជធានីភ្នំពេញ លោក សៀខ សុខ សម្រេចចោទប្រកាន់ជនចាប់ចោទពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៤ និងមាត្រា ៤៥៩ នៃព្រហ្មទណ្ឌ។ ភ្លាមៗ ក្រោយពេលព្រះរាជអាជ្ញារង បញ្ចប់ការសាកសួរ និងចោទប្រកាន់ប្រឆាំងស្ត្រីឈ្មោះ ហេង លក្ខិណា ដែលជាឈ្មោះនៅក្នុងបណ្ដាញទំនាក់ទំនងសង្គមហ្វេសប៊ុក (Facebook) ត្រូវបានចៅក្រមស៊ើបសួរលោក វ៉ាន់ សែនវិសុទ្ធ ចេញដីកាឃុំខ្លួនបណ្ដោះអាសន្ននៅមណ្ឌលកែប្រែម២ ភ្លាមដែរ។
នគរបាលយុត្តិធម៌បានចាប់ខ្លួនជនជាប់ចោទនៅក្នុងទីក្រុងភ្នំពេញ កាលពីថ្ងៃទី១២ កក្កដា។ការចាប់ខ្លួននេះ ធ្វើឡើង ៤ថ្ងៃ បន្ទាប់ពីលោកស្រី ហេង លក្ខិណា ថត និងបង្ហោះនៅក្នុងបណ្ដាញសង្គមហ្វេសប៊ុក ដោយចោទថា លោក ហ៊ុន សែន និងក្រុមគ្រួសាររបស់លោកបាតដៃប្រឡាក់ឈាម ក្នុងឃាតកម្មលើលោកបណ្ឌិត កែម ឡី។
នៅក្នុងដីកាឃុំខ្លួនបណ្ដោះអាសន្នរបស់ចៅក្រមស៊ើបសួរ លោក វ៉ាន់ សែនវិសុទ្ធ ស្ត្រីជាប់ចោទមានឈ្មោះពិតថា ហ៊ិន វ៉ាន់ស្រីពៅ មុខរបរលក់ដូរ និងមានទីលំនៅក្នុងភូមិតាងួន ខេត្តកណ្ដាល។ ប៉ុន្តែ អាសយដ្ឋានសព្វថ្ងៃរស់នៅក្រុងប៉ោយប៉ែត ខេត្តបន្ទាយមានជ័យ។
ស្របពេលតុលាការក្រុងភ្នំពេញ បានបញ្ចប់ការសាកសួរលោកស្រី ហ៊ិន វ៉ាន់ស្រីពៅ ឬ ហេង លក្ខិណា ដែលចោទលោកនាយករដ្ឋមន្ត្រី និងក្រុមគ្រួសារថា ជាអ្នកបាញ់សម្លាប់លោកបណ្ឌិត កែម ឡី គេហទំព័រអគ្គស្នងការនគរបាលជាតិ បានសរសេរថា មានយុវជនម្នាក់ទៀតឈ្មោះ ពេជ រដ្ឋា អាយុៈ ២៤ឆ្នាំ មានមុខរបរជាអ្នកបើករថយន្តដឹកបុគ្គលិកឲ្យកាស៊ីណូ នៅខេត្តព្រះសីហនុ ត្រូវនគរបាលចាប់ខ្លួន និងបញ្ជូនមកទីក្រុងភ្នំពេញ។
ជនសង្ស័យរូបនេះ ត្រូវជាប់ចោទពីបទគំរាមបាញ់សម្លាប់លោក ហ៊ុន សែន តាមបណ្ដាញសង្គមហ្វេសប៊ុក ដែរ។ ប៉ុន្តែ គេហទំព័ររបស់នគរបាលជាតិ បញ្ជាក់ថា ចម្លើយសារភាពនៅចំពោះមុខនគរបាល យុវជន ពេជ រដ្ឋា បដិសេធថា រូបគេពុំបានប្រមាថជីវិតលោកនាយករដ្ឋមន្ត្រីដូចព័ត៌មានដែលបានបែកធ្លាយឡើយ ហើយអ្វីដែលបានកើតឡើងនោះ គឺមានអ្នកលួចប្រើប្រាស់ហ្វេសប៊ុក ផ្ទាល់ខ្លួនរបស់គេប៉ុណ្ណោះ រួចធ្វើការវាយប្រហារតែម្ដង។យ៉ាងណា មន្ត្រីនគរបាលអះអាងថា នឹងពិនិត្យឲ្យរកឃើញការពិតថា តើអ្វីឲ្យប្រាកដដែលស្ថិតនៅពីក្រោយរឿងនេះ។
លោក អំ សំអាត ប្រធានគ្រប់គ្រងផ្នែកអង្កេតនៃអង្គការលីកាដូ ចាត់ទុកថា ការអនុវត្តច្បាប់នៅកម្ពុជា នៅតែមិនទាន់មានតម្លាភាព។ លោកបន្តថា កន្លងទៅក៏ធ្លាប់មានការប្រមាថអាយុជីវិតថា នឹងបាញ់សម្លាប់អ្នកនេះ ឬអ្នកនោះជាដើម ប៉ុន្តែកម្រឃើញមន្ត្រីនគរបាលយុត្តិធម៌ ឬតុលាការអនុវត្តច្បាប់ឲ្យមានប្រសិទ្ធភាព ដូចសំណុំរឿងលោក ហ៊ុន សែន នេះណាស់៖ «ការប្រមាថ ឬការគំរាមកំហែងតាមប្រព័ន្ធបណ្ដាញសង្គម ឬអ៊ីនធឺណិតនេះ ដូចជាការគំរាមកំហែងរកសម្លាប់ឯកឧត្ដម កឹម សុខា និងការគំរាមកំហែងទៅលើបុគ្គលមួយចំនួនទៀត វាហាក់ដូចជាការអនុវត្តមិនមានប្រសិទ្ធភាពដូចគ្នា។ បានន័យថា បើសិនជាយើងអនុវត្តឲ្យមានតម្លាភាពទៅហើយ បើថាវាជាបទល្មើសប្រហាក់ប្រហែលគ្នា យើងអនុវត្តឲ្យមានស្តង់ដារតែមួយទៅ»។
ទាក់ទងការប្រមាថអាយុជីវិត និងអ្នករិះគន់លោកនាយករដ្ឋមន្ត្រី ហ៊ុន សែន នេះមានមនុស្ស ៥រូបហើយត្រូវរងការចោទប្រកាន់ ចាប់ខ្លួន និងរស់នៅដោយនិរទេសខ្លួន ពាក់ព័ន្ធឃាតកម្មលើលោកបណ្ឌិត កែម ឡី រួមទាំងអ្នកដែលគំរាមថា នឹងបាញ់សម្លាប់លោក ហ៊ុន សែន នេះផង៕