ក្នុងឱកាសបុណ្យរុក្ខទិវាថ្ងៃទី៩ ខែកក្កដា ព្រះមហាក្សត្រ និងរដ្ឋាភិបាល អំពាវនាវឲ្យប្រជាពលរដ្ឋចូលរួមដាំដុះ ការពារព្រៃឈើ ហើយត្រូវចូលរួមបញ្ឈប់ការកាប់រានដីព្រៃ និងការកាប់ឈើខុសច្បាប់ និងការបរបាញ់គ្រប់រូបភាព។ រីឯអង្គការសង្គមស៊ីវិល ចង់ឃើញរដ្ឋាភិបាលមានការប្ដេជ្ញាចិត្តពិតប្រាកដក្នុងការទប់ស្កាត់ការកាប់បំផ្លាញព្រៃឈើខុសច្បាប់ ជាជាងគ្រាន់តែអំពាវនាវបង្គ្រប់កិច្ច និងយកប្រជាប្រិយភាព។
ព្រះមហាក្សត្រព្រះបាទសម្ដេចព្រះបរមនាថ នរោត្តម សីហមុនី នៅថ្ងៃទី៩ ខែកក្កដា ឆ្នាំ២០១៧ បានយាងជាព្រះរាជអធិបតីក្នុងរុក្ខទិវាលើកទី២៧ ដែលប្រារព្ធឡើងនៅភូមិក្រាំងក្រូច ឃុំទួលព្រេច ស្រុកអង្គស្នួល ខេត្តកណ្ដាល។ ពិធីនោះ គឺមានការដាំកូនឈើប្រភេទគ្រញូង ធ្នង់ និងគីនីន ជិត ១ម៉ឺនដើម (៨.៨៣០ដើម) នៅលើផ្ទៃដីប្រមាណ ១០ហិកតារ។
ក្នុងឱកាសនោះ ព្រះមហាក្សត្រក៏បានអំពាវនាវឲ្យជនរួមជាតិទាំងអស់ មេត្តារួមគ្នាការពារភ្លើងឆេះព្រៃ បញ្ឈប់ការកាប់រានដីព្រៃឈើជាកម្មសិទ្ធិ ការកាប់ឈើខុសច្បាប់ ការបរបាញ់ ការដាក់អន្ទាក់ចាប់សត្វព្រៃ និងចូលរួមដាំដើមឈើឲ្យបានច្រើនជាអតិបរមា ដើម្បីបង្កើនគម្របព្រៃឈើឡើងវិញសម្រាប់កូនចៅជំនាន់ក្រោយៗទៀត។ ព្រះមហាក្សត្រមានព្រះរាជបន្ទូលបញ្ជាក់ទៀតថា ការដាំឈើ និងរុក្ខជាតិគ្រប់ប្រភេទ គឺផ្តល់នូវបុណ្យកុសលដ៏ប្រពៃសម្រាប់មនុស្សគ្រប់ៗរូប ហើយធ្វើឲ្យមូលដ្ឋានមានទេសភាពពណ៌បៃតង និងរស់រវើកគ្រប់ពេលរដូវកាល។
ទន្ទឹមគ្នានេះ លោកនាយករដ្ឋមន្ត្រី ហ៊ុន សែន ក៏បានបង្ហោះសារនៅលើទំព័រហ្វេសប៊ុក (facebook) របស់លោក ចូលរួមអបអរសាទរបុណ្យរុក្ខទិវា ៩ កក្កដា ដែរ។ លោក ហ៊ុន សែន សរសេរអំពាវនាវឲ្យប្រជាពលរដ្ឋចូលរួមបណ្ដុះគំនិតនៃការស្រឡាញ់ដើមឈើ និងចូលរួមដាំដុះ ថែរក្សា ការពារព្រៃឈើ និងបរិស្ថានធម្មជាតិឲ្យបានគ្រប់ៗគ្នា ដើម្បីជាប្រយោជន៍ដល់ការរស់នៅរបស់ខ្លួនផង សហគមន៍ផង និងជីវិតសត្វព្រៃគ្រប់ប្រភេទ ព្រមទាំងប្រព័ន្ធជីវចម្រុះដែរ។ លោកបន្តថា ប្រទេសជាតិដែលសម្បូរព្រៃឈើ គឺបានជួយយ៉ាងច្រើនដល់បញ្ហាកាត់បន្ថយការបម្រែបម្រួលអាកាសធាតុ។
ទោះបីជាមានការអំពាវនាវរាល់ឆ្នាំក្តី ប៉ុន្តែសកម្មជនព្រៃឈើ នៅតែត្រូវបានរកឃើញថា ព្រៃឈើកម្ពុជា នៅតែរងការកាប់ជួញដូរខុសច្បាប់យ៉ាងគគ្រឹកគគ្រេងចូលទៅប្រទេសវៀតណាម និងប្រទេសចិន។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង ស្វាគមន៍ចំពោះបុណ្យរុក្ខទិវា ៩ កក្កដា ប៉ុន្តែលោកថា ការការពារព្រៃឈើមិនមែនធ្វើឡើងតែមួយថ្ងៃ ដោយគ្រាន់តែដាំដើមឈើ ហើយថតផ្សាយក្នុងទូរទស្សន៍នោះទេ។ លោក អ៊ូច ឡេង មើលឃើញថា ការអំពាវនាវរបស់រដ្ឋាភិបាល គ្រាន់តែបង្ហាញដើម្បីយកប្រជាប្រិយភាព និងជាការធ្វើបង្គ្រប់កិច្ចប៉ុណ្ណោះ។ ការលើកឡើងដូចនេះ ដោយលោកសំអាងថា មានមន្ត្រីថ្នាក់ក្រោមមួយចំនួនសុទ្ធតែជាអ្នករកស៊ីឈើ រហូតក្លាយជាអ្នកមាន និងឧកញ៉ា។ លោកបន្តថា ប្រសិនបើរដ្ឋាភិបាលមានឆន្ទៈពិតប្រាកដនោះ គឺត្រូវបិទអាជីវកម្មរកស៊ីឈើ ជាពិសេសត្រូវតែបិទរោងចក្រអារឈើ សិប្បកម្មកែច្នៃឈើទាំងអស់ និងបិទការនាំចេញឈើទៅប្រទេសវៀតណាម និងប្រទេសចិន ដែលជាប្រទេសចម្បងក្នុងការនាំចេញឈើពីប្រទេសកម្ពុជា៖ «»។
នៅលើទំព័រហ្វេសប៊ុក លោក ហ៊ុន សែន រម្លឹកថា បុណ្យរុក្ខទិវាបានបង្កើតឡើងនៅក្នុងឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតនកោដ្ឋ ព្រះបាទសម្ដេចព្រះនរោត្តម សីហនុ ក្នុងគោលបំណងបំផុសចលនាដាំដើមឈើឡើងវិញ និងការថែរក្សាសម្បត្តិព្រៃឈើ ជាពិសេសដើម្បីថែរក្សា ការពារ និងបណ្ដុះគំនិតស្រឡាញ់ព្រៃឈើ និងបរិស្ថានធម្មជាតិ។ ពិធីបុណ្យនេះ ក៏មានគោលដៅបង្កើនគម្របព្រៃឈើ និងដើម្បីកាត់បន្ថយកម្ដៅភពផែនដីផងដែរ។
ទោះបីបុណ្យរុក្ខទិវានេះមានអាយុកាលយូរយ៉ាងណាហើយក្តី ប៉ុន្តែការស្រាវជ្រាវអំពីព្រៃឈើបានបង្ហាញថា ក្នុងរយៈពេលជាង ៣០ឆ្នាំចុងក្រោយនេះ ប្រទេសកម្ពុជា បានបាត់បង់ព្រៃឈើជាបន្តបន្ទាប់។
របាយការណ៍របស់អង្គការទីភ្នាក់ងារស៊ើបអង្កេតបរិស្ថាន ឬ EIA (Environmental Investigation Agency) ដែលចេញផ្សាយនៅថ្ងៃទី៨ ខែឧសភា និងឯកសារភស្តុតាងបន្ថែមស្ដីពីការនាំចេញឈើពីកម្ពុជា ទៅវៀតណាម ដែលចេញផ្សាយនៅថ្ងៃទី១៦ ខែឧសភា ឆ្នាំ២០១៧ បានរកឃើញថា គ្រាន់តែពីខែមករា ឆ្នាំ២០១៦ ដល់ត្រឹមខែមីនា ឆ្នាំ២០១៧ មន្ត្រីគយវៀតណាម បានកត់ត្រាឯកសារពន្ធគយលើការនាំឈើ និងគ្រឿងធ្វើពីឈើចេញពីប្រទេសកម្ពុជា ទៅវៀតណាម មានទឹកប្រាក់រហូតដល់ជិត ៣០០លានដុល្លារអាមេរិក។ ឯកសារផ្លូវការរបស់គយវៀតណាម ដដែលបញ្ជាក់ទៀតថា ឈើដែលនាំចេញពីប្រទេសកម្ពុជា ជាង ២,៣ម៉ឺនម៉ែត្រគូប (២៣០.០០០ម៉ែត្រគូប) ត្រូវបានកត់ត្រាក្នុងបញ្ជីវិក្កយបត្រលក់ និងដឹកជញ្ជូនទៅប្រទេសវៀតណាម។
អង្គការនេះរកឃើញការកាប់បំផ្លាញព្រៃយ៉ាងរង្គាលនៅក្នុងតំបន់ព្រៃការពារ ក្នុងឧទ្យានជាតិវីរជ័យ ខេត្តរតនគិរី នៅជាប់ព្រំដែនវៀតណាម នៅក្នុងរយៈពេលស៊ើបអង្កេតខាងលើ ដែលក្នុងរយៈពេលនេះ គឺស្ថិតក្នុងអំឡុងពេលដែលរដ្ឋាភិបាលកម្ពុជា បានចេញសេចក្ដីណែនាំស្ដីពីវិធានការទប់ស្កាត់ និងបង្ក្រាបបទល្មើសព្រៃឈើ៕