Clik here to view.
ថ្ងៃទី៧ ខែកក្កដា ឆ្នាំ២០១៧ គឺជាខួបលើកទី៩ នៃការចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក។ នៅចំថ្ងៃខួបលើកទី៩ រដ្ឋាភិបាលកម្ពុជា មិនបានប្រារព្ធពិធីអបអរសាទរអ្វីធំដុំឡើយ ខណៈដែលស្ថានភាពនៅតំបន់ប្រាសាទព្រះវិហារ ក៏កំពុងមានសភាពស្ងប់ស្ងាត់។
ទោះជាយ៉ាងណា អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថ្លែងនៅថ្ងៃទី៧ ខែកក្កដា ថា នៅពេលនេះកម្ពុជា កំពុងអនុវត្តគម្រោងអភិរក្ស និងជួសជុលប្រាសាទព្រះវិហារ ឡើងវិញ ដោយមានភាគីចិន និងឥណ្ឌា ជាសហប្រធាន។ ក្នុងពេលជាមួយគ្នា កម្ពុជាក៏ធ្វើកិច្ចសហប្រតិបត្តិការជាមួយភាគីថៃ ដើម្បីធ្វើឲ្យតំបន់ប្រាសាទព្រះវិហារ ក្លាយជាព្រំដែនសន្តិភាព និងកិច្ចសហប្រតិបត្តិការក្នុងនាមជាប្រទេសជិតខាងល្អ។
លោក ផៃ ស៊ីផាន៖ «គោលនយោបាយរបស់សម្ដេចអគ្គមហាសេនាធិបតីតេជោ ហ៊ុន សែន យើងឈរលើសន្តិភាពនិយម ទី២ យើងឈរលើកិច្ចសហប្រតិបត្តិការល្អ ទី៣ យើងឈរលើគោលការណ៍អ្នកជិតខាងល្អ ធ្វើយ៉ាងម៉េចដើម្បីដោះស្រាយ និងបញ្ចប់វិវាទ បង្កើតបាននូវខ្សែសីមាព្រំដែនមួយដែលជាខ្សែសហប្រតិបត្តិការសន្តិភាព និងអភិវឌ្ឍ»។
កាលពីឆ្នាំ១៩៦២ តុលាការយុត្តិធម៌អន្តរជាតិ (ICJ) បានសម្រេចឲ្យកម្ពុជា ឈ្នះក្ដីលើភាគីថៃ ក្នុងបណ្ដឹងប្រាសាទព្រះវិហារ ដោយបញ្ជាឲ្យប្រទេសថៃ ដកទ័ពចេញពីតំបន់ប្រាសាទព្រះវិហារ។ តែនៅថ្ងៃទី៧ ខែកក្កដា ឆ្នាំ២០០៨ នៅពេលអង្គការយូណេស្កូ (UNESCO) ដាក់ប្រាសាទព្រះវិហារក្នុងបញ្ជីបេតិកភណ្ឌពិភពលោកតាមការស្នើសុំរបស់កម្ពុជា ប្រទេសថៃ បានលើកទ័ពចូលតំបន់ប្រាសាទព្រះវិហារ រហូតឈានដល់ការផ្ទុះអាវុធដាក់គ្នារវាងកងទ័ពប្រទេសទាំង២ នៅថ្ងៃទី១៥ ខែកក្កដា។ ដើម្បីបញ្ចប់ជម្លោះនេះ កម្ពុជាបានស្នើឲ្យតុលាករយុត្តិធម៌អន្តរជាតិ បកស្រាយឡើងវិញនូវការសម្រេចឆ្នាំ១៩៦២។ នៅថ្ងៃទី១១ វិច្ឆិកា ឆ្នាំ២០១៣ តុលាការបានសម្រេចឲ្យកម្ពុជា ឈ្នះក្តីជាថ្មី។
ទោះជាយ៉ាងណា រហូតមកទល់ពេលនេះ ប្រទេសថៃ មិនទាន់បានអនុវត្តពេញលេញតាមការសម្រេចរបស់តុលាការយុត្តិធម៌អន្តរជាតិនៅឡើយទេ៕
