ជំទប់ទី២ នៃឃុំកោះសំពាយ ស្រុកសៀមបូក ខែត្រស្ទឹងត្រែង ចោទមេឃុំមកពីគណបក្សប្រជាជនកម្ពុជាថា បែងចែកតួនាទីដោយមានការរើសអើងនិន្នាការនយោបាយ។ ការចោទប្រកាន់នេះ ធ្វើឡើងក្រោយពីមេឃុំកោះសំពាយ លោក សួយ ខាំវៀន បានប្រជុំអនុម័តចែកតួនាទីជូនជំទប់ទី២ មកពីគណបក្សសង្គ្រោះជាតិ ឲ្យទទួលភារកិច្ចតែមួយមុខ គឺផ្នែកសន្តិសុខ។
ជំទប់ទី២ ឃុំកោះសំពាយ មកពីគណបក្សសង្គ្រោះជាតិ ចាត់ទុកការបែងចែកតួនាទីដោយមេឃុំកោះសំពាយ លោក សួយ ខាំវៀន ថាមិនត្រឹមត្រូវតាមក្របខ័ណ្ឌច្បាប់។
ជំទប់ទី២ ឃុំកោះសំពាយ លោក ប៉ែន ថូន រំឭកថា កាលពីថ្ងៃទី៥ ខែកក្កដា មេឃុំកោះសំពាយ លោក សូ ខាំវៀន បានប្រជុំអនុម័តចែកតួនាទីជូនជំទប់ទី១ មកពីគណបក្សប្រជាជនកម្ពុជា អនុវត្តភារកិច្ចផ្នែកសេដ្ឋកិច្ច និងហិរញ្ញវត្ថុ។ ចំណែកជំទប់ទី២ មកពីគណបក្សសង្គ្រោះជាតិ ត្រូវទទួលភារកិច្ចផ្នែកសន្តិសុខតែមួយ ហើយសមាជិកក្រុមប្រឹក្សាឃុំមកពីគណបក្សប្រជាជនកម្ពុជា បែរជាមានភារកិច្ចជំនួសជំទប់ទី២ ទៅវិញ ដូចជាអនុវត្តកិច្ចការរដ្ឋបាល សង្គមកិច្ច សេវាសាធារណៈ និងសណ្ដាប់ធ្នាប់ជាដើម។
លោកចាត់ទុកបញ្ហានេះថា ជាការរំលោភអំណាច បង្កប៉ះពាល់ការផ្ដល់សេវាសាធារណៈជូនពលរដ្ឋ៖ «តំណែងជំទប់ទី១ គាត់ផ្ដល់ឲ្យតែសេវាសន្តិសុខមួយគត់ នេះជាការរំលោភអំណាច ព្រោះអីវាបញ្ច្រាសពីក្រសួងមហាផ្ទៃ។ បើសិនជាគាត់មិនព្រមប្រគល់ឲ្យខ្ញុំ ខ្ញុំនឹងប្ដឹងទៅក្រសួងមហាផ្ទៃ បន្តទៀត»។
ឃុំកោះសំពាយមាន ៥ អាសនៈ និងមានគណបក្សនយោបាយចំនួន២ ដាក់បេក្ខជនឈរឈ្មោះក្រុមប្រឹក្សាឃុំ-សង្កាត់ គឺគណបក្សប្រជាជនកម្ពុជា និងគណបក្សសង្គ្រោះជាតិ។ លទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ បង្ហាញថា គណបក្សប្រជាជនកម្ពុជា ទទួលបាន ៤អាសនៈ និងគណបក្សសង្គ្រោះជាតិ ទទួលបាន ១អាសនៈ។
ឆ្លើយតបការចោទប្រកាន់នេះ មេឃុំកោះសំពាយ លោក សួយ ខាំវៀន ថ្លែងបញ្ជាក់ថា អាជ្ញាធរឃុំពុំទាន់អនុម័តបែងចែកតួនាទីជាផ្លូវការនៅឡើយទេ ដោយគ្រាន់តែប្រជុំពិភាក្សាសួរនាំទៅជំទប់ទី២ មានវ័យក្មេងជាងគេ ឲ្យទទួលភារកិច្ចផ្នែកសន្តិសុខ ក៏ប៉ុន្តែបើសាមីជនបដិសេធលោកក៏មិនបង្ខំដែរ។
លោកថា ក្នុងនាមលោកជាមេឃុំ មានបំណងចង់សហការគ្នាឲ្យល្អគ្រប់បក្សនយោបាយ ក្នុងការអភិវឌ្ឍមូលដ្ឋាន ដោយពុំប្រកាន់និន្នាការនយោបាយនោះទេ៖ «បើគាត់ទទួលហើយ ម្ដងនេះគាត់ថា គាត់មិនលើកដៃម៉េច បើក្រុមប្រឹក្សាឃុំ ឃើញគាត់លើកដៃ។ អត់មានការរើសអើងអីទេ ចង់ឲ្យធ្វើការងារជាមួយគ្នាឲ្យបានល្អ»។
អ្នកសម្របសម្រួលផ្នែកអង្កេតនៃគណៈកម្មាធិការខុមហ្វ្រែល (COMFREL) លោក កន សាវាង្ស យល់ថា ការបែងចែកតួនាទីត្រូវតែអនុវត្តតាមច្បាប់កំណត់ តែបើការបែងចែកពុំបានត្រឹមត្រូវ នឹងប៉ះពាល់ដល់ដំណើរការអភិវឌ្ឍមូលដ្ឋាន និងការផ្ដល់សេវាសាធារណៈដល់ពលរដ្ឋ។ លោកថា តួនាទីរបស់អាជ្ញាធរឃុំនីមួយៗ មានអំណាច និងភារកិច្ចផ្សេងៗគ្នា។ ប្រសិនបើបែងចែកតួនាទី ឲ្យក្រុមប្រឹក្សាឃុំអនុវត្តភារកិច្ចជំនួសជំទប់ទី២ ជារឿងមិនត្រឹមត្រូវ៖ «ការចាត់ចែងតួនាទីភារកិច្ចត្រូវតែអនុវត្តដែលមានក្នុងផ្លូវតែច្បាប់។ កាលណាវាអត់សមស្របទេ វាប៉ះពាល់ទៅដល់ការបម្រើសេវាសាធារណៈ និងការអនុវត្តតួនាទីភារកិច្ចរបស់ខ្លួន»។
ច្បាប់ស្ដីពីការគ្រប់គ្រងរដ្ឋបាលឃុំសង្កាត់ មាត្រា៤០ ចែងថា ជំទប់ ឬចៅសង្កាត់ជាជំនួយការមេឃុំ/ចៅសង្កាត់ ក្នុងការអនុវត្តភារកិច្ចដែលមេឃុំប្រគល់ឲ្យ និងជំនួសមេឃុំតាមឋានានុក្រម នៅគ្រាដែលមេឃុំ/ចៅសង្កាត់អវត្តមាន។ ជំទប់ទី១ ឬចៅសង្កាត់រងទី១ ទទួលបន្ទុកផ្នែកសេដ្ឋកិច្ច និងហិរញ្ញវត្ថុ។ ជំទប់ទី២ ឬចៅសង្កាត់រងទី២ ទទួលបន្ទុកអនុវត្តការងារផ្នែកកិច្ចការរដ្ឋបាល សង្គមកិច្ច សេវាសាធារណៈ និងសណ្ដាប់ធ្នាប់៕