អយ្យការអមសាលាដំបូងខេត្តតាកែវ បានចេញដីកាកោះហៅសកម្មជន បេក្ខជនជំទប់ឃុំ និងបេក្ខជនក្រុមប្រឹក្សាឃុំរបស់គណបក្សសង្គ្រោះជាតិ ចំនួន ៦នាក់ នៅឃុំព្រៃខ្លា ស្រុកកោះអណ្ដែត ជាលើកទី២ ដើម្បីឲ្យចូលខ្លួនសាកសួរពីបទបរិហារកេរ្តិ៍ ជេរប្រមាថជាសាធារណៈ និងញុះញង់ឲ្យប្រព្រឹត្តបទឧក្រិដ្ឋ។ គណបក្សសង្គ្រោះជាតិ នៅថ្នាក់ឃុំ និងខេត្ត ហៅដីកាកោះនោះថាជារឿងនយោបាយ។ ឯសង្គមស៊ីវិល ស្នើឲ្យថ្នាក់ដឹកនាំឃុំ ចាប់ដៃគ្នាធ្វើការ ដើម្បីអភិវឌ្ឍឃុំព្រៃខ្លា ជាជាងគុំកួនប្ដឹងផ្ដល់គ្នាបែបនេះ។
សកម្មជនទាំង ៦នាក់នៅមូលដ្ឋានរបស់គណបក្សសង្គ្រោះជាតិ ឲ្យដឹងថា ពួកគាត់នឹងចូលខ្លួនទៅបំភ្លឺនៅតុលាការនៅថ្ងៃទី៣ កក្កដា តាមដីកាកោះរបស់តំណាងអយ្យការ។
បេក្ខជនជំទប់ឃុំទី២ ជាប់ឆ្នោតឃុំព្រៃខ្លា និងជាជនសង្ស័យម្នាក់ក្នុងចំណោម ៦នាក់ ដែលអយ្យការអមសាលាដំបូងខេត្តតាកែវ កោះហៅ គឺលោក កែវ អ៊ាត ចាត់ទុកករណីនេះជារឿងនយោបាយ និងគ្មានជម្រើសអ្វីក្រៅពីទៅបំភ្លឺតាមដីកាកោះរបស់តុលាការនោះទេ៖ «ភ័យបារម្ភ វាភ័យៗពេកហើយ ក៏ប៉ុន្ដែឥឡូវនេះបើយើងភ័យបារម្ភ អាម៉េចមួយ អាម៉េចពីរទៀត ក៏មិនដឹងធ្វើម៉េចទេ ទៅតាមដំណើរទៅ ទៅតាមតែមេទៅ (គណបក្សសង្គ្រោះជាតិ ថ្នាក់លើ) បើមេអាចជួយបានក៏ជួយ បើមិនអាចជួយបានទេ អាហ្នឹងជារឿងរបស់ជាតិ ធ្វើម៉េចទៅតាមដំណើរ បើទៅដល់ណាក៏ចេះតែទៅៗ... បើថាទៅដល់គេសម្រួលឲ្យយើងចប់ត្រឹមហ្នឹង អាហ្នឹងគឺវាជោគជ័យរបស់យើងត្រឡប់មកវិញមក បើថាគេ (អយ្យការអមសាលាដំបូងខេត្តតាកែវ) មិនឲ្យចប់ទេ គេដាក់ទៅណាទៀត ចេះតែទៅទៀតទៅ»។
សកម្មជនគណបក្សសង្គ្រោះជាតិ ទាំង ៦នាក់នោះមាន ៥នាក់ធ្លាប់បានព្រះរាជអាជ្ញាចេញដីកាកោះឲ្យទៅបំភ្លឺម្ដងរួចមកហើយកាលពីថ្ងៃទី៣១ ឧសភា តែត្រូវបានលើកពេល ដោយសារអ្នកទាំង ៥នាក់សុំពន្យារពេល ដោយសាររកមេធាវីការពារខ្លួនមិនបាន។ ចំណែកមួយរូបទៀត គឺជាមនុស្សទី៦ ដែលតំណាងអយ្យការទើបចេញដីកាកោះឲ្យចូលបំភ្លឺជាលើកទី១ នៅថ្ងៃទី៣ កក្កដា ដែរនោះ គឺអ្នកស្រី សុខ រឿន។
ករណីដែលនាំឲ្យមានការប្ដឹងសកម្មជនទាំង ៦រូបរបស់គណបក្សសង្គ្រោះជាតិ នៅឃុំព្រៃខ្លា គឺក្រោយពេលមានជម្លោះកើតឡើងក្នុងអំឡុងពេលហែក្បួនឃោសនាបក្សកាលពីថ្ងៃទី២០ ឧសភា។ គណៈកម្មការឃុំព្រៃខ្លារៀបចំការបោះឆ្នោត ធ្លាប់ហៅភាគីទាំងពីរទៅសម្របសម្រួលគ្នាម្ដងរួចហើយ ប៉ុន្តែលទ្ធផលនៃការសម្របសម្រួលភាគីទាំងពីរ គឺតំណាងគណបក្សប្រជាជនកម្ពុជា និងតំណាងគណបក្សសង្គ្រោះជាតិ នៅឃុំព្រៃខ្លា មិនព្រមទទួលយកទាំងពីរភាគី ហើយសកម្មជនគណបក្សប្រជាជនកម្ពុជា បានដាក់ពាក្យប្ដឹងទៅសាលាដំបូងខែត្រតាកែវ តែម្ដង។
ប្រធានគណៈកម្មការប្រតិបត្តិគណបក្សសង្គ្រោះជាតិ ខេត្តតាកែវ លោក ម៉ៅ សុផល ប្រាប់ថា គណបក្សសង្គ្រោះជាតិ បានត្រៀមមេធាវីម្នាក់ដើម្បីការពារក្ដីឲ្យសកម្មជនទាំង ៦នាក់ ហើយមកដល់ពេលនេះ ខាងលោកនៅតែខ្វះមេធាវីសម្រាប់ជួយអ្នកទាំង ៦រូប។ ប្រធានគណៈកម្មការប្រតិបត្តិខេត្តតាកែវ រូបនេះនៅតែចាត់ទុកការចោទប្រកាន់នេះ គឺជារឿងនយោបាយ និងសង្ឃឹមថាតុលាការទម្លាក់បទចោទលើសកម្មជនទាំង ៦នាក់៖ «នៅក្នុងការចោទប្រកាន់ហ្នឹង វាទៅលើការញុះញង់អីណា ប៉ុន្តែយើងមើលទៅវាអត់មានការញុះញង់អីទេ អត់មានបញ្ហាអីនៅពេលយុទ្ធនាការរហូតមកដល់ម៉ោងនេះ ដូចអត់មានអីទេ។ ចឹងខ្ញុំយល់ថាជារឿងនយោបាយ ប៉ុន្តែយើងចាំមើលស្អែកទៀត បើសភាពការណ៍វាយ៉ាងម៉េច ខ្ញុំនៅសង្ឃឹមថាពួកគាត់នឹងបានរួចខ្លួនពីការចោទប្រកាន់»។
លោក ម៉ៅ សុផល នៅតែងឿងឆ្ងល់ថា គ.ជ.ប បានបិទបញ្ចប់លទ្ធផលជាផ្លូវការរួចហើយ ប៉ុន្តែតុលាការនៅតែកោះហៅសកម្មជនបក្សលោកទៅសាកសួរទៀត។ ប៉ុន្តែអ្នកនាំពាក្យ គ.ជ.ប លោកបណ្ឌិត ហង្ស ពុទ្ធា ធ្លាប់បញ្ជាក់ថា ក្រោយការបិទបញ្ចប់ការដោះស្រាយពាក្យបណ្ដឹងពាក់ព័ន្ធនឹងការបោះឆ្នោត គ.ជ.ប បង្វែរបណ្ដឹងទាក់ទងរឿងក្ដីព្រហ្មទណ្ឌឲ្យទៅម្ចាស់បណ្ដឹងវិញ។
មន្ត្រីផ្នែកច្បាប់ និងអង្កេតនៃអង្គការខុមហ្វ្រែល (Comfrel) លោក យឿង សុធារ៉ា មើលឃើញវីដេអូឃ្លីបដែលបង្ហោះក្នុងបណ្ដាញសង្គមហ្វេសប៊ុក ថាមានព្យសនកម្ម ឬផលប៉ះពាល់ដែលកើតចេញពីជម្លោះតិចតួច។ លោកផ្ដល់យោបល់ថា គួរតែសម្របសម្រួលគ្នា ឬរកយន្តការផ្សះផ្សាគ្នា ជៀសវាងការប្ដឹងទៅតុលាការនាំឲ្យមានរឿងវែងឆ្ងាយ។ លោក យឿង សុធារ៉ា យល់ថា ការប្ដឹងនេះមិនបានចំណេញសម្រាប់គណបក្សកាន់អំណាចនោះទេ ព្រោះអាចរងការចោទប្រកាន់ផ្សេងៗពីសាធារណជនលើប្រព័ន្ធតុលាការ៖ «កុំឲ្យតែរឿងហ្នឹងមានវាព្យសនកម្មកើតមកវាមហន្តរាយដល់សង្គម ដល់សន្តិសុខជាតិ ដល់សណ្ដាប់ធ្នាប់សាធារណៈធ្ងន់ធ្ងរ អាហ្នឹងបង្កមហន្តរាយដល់សណ្ដាប់ធ្នាប់សាធារណៈអីធ្ងន់ធ្ងរ អាហ្នឹងវាគួរខ្លះ ដើម្បីចាត់តាមផ្លូវតុលាការ។ តែយ៉ាងណា យើងលើកទឹកចិត្តឲ្យភាគីដោះស្រាយគ្នាតាមវិធានការណាមួយអាចដោះស្រាយបាន បើសិនជារឿងហ្នឹងអាចត្រូវបានបញ្ចប់ ហើយភាគីណាមួយអាចទទួលសុំអភ័យទោសជាសាធារណៈ អាចជាជម្រើសល្អដែរ»។
សង្គមស៊ីវិលយល់ថា តំណាងគណបក្សនយោបាយទាំងពីរដែលកំពុងប្ដឹងគ្នាទៅតុលាការ សុទ្ធតែបានឈ្នះតំណែងថ្នាក់ដឹកនាំឃុំព្រៃខ្លា នៃស្រុកកោះអណ្ដែត ដូច្នេះគួរតែកុំបង្ហាញពីរូបភាពប្ដឹងគ្នា តែគួរបង្ហាញពីភាពល្អូកល្អើនចាប់ដៃធ្វើការជាមួយគ្នា ដើម្បីធ្វើការរួមគ្នាអភិវឌ្ឍឃុំព្រៃខ្លា។
ប្រធានគណៈកម្មការប្រតិបត្តិគណបក្សសង្គ្រោះជាតិ ខេត្តតាកែវ លោក ម៉ៅ សុផល ឲ្យដឹងថា ដើមបណ្ដឹងដែលប្ដឹងបេក្ខជនជំទប់ទី២ ជាប់ឆ្នោត និងក្រុមប្រឹក្សាឃុំព្រៃខ្លា គឺជាក្រុមប្រឹក្សាឃុំមកពីគណបក្សប្រជាជនកម្ពុជា ដែលនឹងត្រូវចូលធ្វើការជាមួយគ្នានៅពេលខាងមុខ។
បេក្ខជនជំទប់ទី២ ជាប់ឆ្នោតឃុំព្រៃខ្លា លោក កែវ អ៊ាត ធ្លាប់ប្រាប់ថា វីដេអូដែលចែកចាយក្នុងបណ្ដាញសង្គមហ្វេសប៊ុក ឃើញរូបលោកប្រកែកគ្នាជាមួយខាងគណបក្សប្រជាជនកម្ពុជា គឺខាងគណបក្សកាន់អំណាចថតតែឈុតអវិជ្ជមានរបស់លោក មិនបានថតនៅពេលដែលខាងគណបក្សប្រជាជនកម្ពុជា ឈ្លោះប្រកែក ឬជេរតបវិញទេ។ លោក កែវ អ៊ាត សង្ឃឹមថា តំណាងគណបក្សប្រជាជនកម្ពុជា ដកពាក្យបណ្ដឹងវិញ ដើម្បីបញ្ចប់រឿងទំនាស់កន្លងទៅ៕