ក្រុមអង្គការសង្គមស៊ីវិលជាង ៣០ស្ថាប័ន សម្ដែងការមិនពេញចិត្តចំពោះការបដិសេធការថែទាំសុខភាពសម្រាប់អ្នកការពារសិទ្ធិមនុស្សចំនួន ៣នាក់ នៅក្នុងចំណោមអ្នកទាំង ៥នាក់ដែលកំពុងជាប់ឃុំ។ លើសពីនេះ ពួកគេហៅការបដិសេធដែលធ្វើដោយអគ្គនាយកដ្ឋានពន្ធនាគារនោះ ថាជាការរើសអើង និងពុំមានតម្លាភាព។
មន្ត្រីជាន់ខ្ពស់ផ្នែកពន្ធនាគារបញ្ជាក់ថា សំណុំរឿងនេះឋិតក្នុងដៃតុលាការ ដែលតាមនីតិវិធី រាល់ការពិនិត្យ និងថែទាំសុខភាពពួកគេ គឺទាល់តែមានការអនុញ្ញាតពីតុលាការ។
ក្រុមអង្គការសង្គមស៊ីវិល ស្នើដល់អគ្គនាយកដ្ឋានពន្ធនាគារ ចាត់វិធានការដើម្បីឲ្យការទទួលបានការពិនិត្យ និងថែទាំសុខភាពមានតម្លាភាព ដ្បិតការរឹតបន្តឹងតាមអំពើចិត្ត និងរបៀបរបបស្មុគស្មាញ បានធ្វើឲ្យសុខភាព និងអាយុជីវិតរបស់អ្នកជាប់ឃុំ ត្រូវប្រឈមនឹងគ្រោះថ្នាក់។
ក្រុមនេះក៏បានអំពាវនាវដល់អាជ្ញាធរ បន្តអនុញ្ញាតឲ្យក្រុមគ្រូពេទ្យ និងអ្នកឃ្លាំមើលពន្ធនាគារទាំងឡាយ អាចចូលទៅពិនិត្យសួរសុខទុក្ខអ្នកជាប់ឃុំទាំងអស់ដោយពុំមានការរឹតត្បិត។
អ្នកនាំពាក្យនៃសមាគមការពារសិទ្ធិមនុស្សអាដហុក (ADHOC) លោក សំ ច័ន្ទគា មានប្រសាសន៍ថា ក្នុងចំណោមមន្ត្រីអាដហុកទាំង ៤នាក់ និងអគ្គលេខាធិការរង គ.ជ.ប មួយរូបដែលកំពុងជាប់ឃុំ គឺមាន ៣នាក់ដែលត្រូវអាជ្ញាធររឹតត្បិតមិនអាចឲ្យពួកគេទទួលបានសេវាពិនិត្យ និងថែទាំសុខភាពសមស្របឡើយ។ លោកថារាល់ការពិនិត្យសុខភាពពួកគេ ត្រូវឆ្លងកាត់ការស្នើសុំការអនុញ្ញាតពីតុលាការ៖ «មកទល់ពេលនេះ គឺនៅតែមានការសុំអនុញ្ញាតពីតុលាការនៅឡើយក្នុងការចូលទៅពិនិត្យ (សុខភាព) អ្នកទាំង ៣ ហ្នឹង។ វាខុសពីអ្នកផ្សេងទៀត ខាងពន្ធនាគារគេអនុញ្ញាតឲ្យគ្រូពេទ្យអង្គការលីកាដូ (LICADHO) ហ្នឹង ពិនិត្យមើលតាមកម្មវិធីដែលលីកាដូបានដាក់»។
សេចក្ដីថ្លែងការណ៍រួមរបស់ក្រុមអង្គការសង្គមស៊ីវិលទាំងជាតិ និងអន្តរជាតិចំនួន ៣៣ស្ថាប័នដែលចេញនៅថ្ងៃទី២៨ ខែមិថុនា លើកឡើងថា អ្នកជាប់ឃុំចំនួន ៣នាក់ដែលជាអ្នកការពារសិទ្ធិមនុស្សរបស់សមាគមការពារសិទ្ធិមនុស្សអាដហុក គឺលោក នី សុខា លោក ណៃ វ៉ង់ដា និងលោក យី សុខសាន្ត មានបញ្ហាសុខភាពដុនដាប ប៉ុន្តែពួកគេពុំទទួលបានការថែទាំសុខភាពឡើយ នៅពេលដែលខាងពន្ធនាគារបានរឹតបន្តឹងមិនឲ្យក្រុមគ្រូពេទ្យនៃអង្គការសិទ្ធិមនុស្សលីកាដូ (LICADHO) ចូលទៅពិនិត្យសុខភាពសួរសុខទុក្ខពួកគេតាំងពីខែមេសា ឆ្នាំ២០១៧ មក។
សេចក្ដីថ្លែងការណ៍ដដែលលើកឡើងថា ក្រុមគ្រូពេទ្យរបស់អង្គការលីកាដូទើបបានចូលទៅពិនិត្យសុខភាពអ្នកទាំង ៣ នោះឡើងវិញនៅក្រោយពេលដែលលោក នី សុខា បានដួលសន្លប់ក្នុងបន្ទប់ទឹកក្នុងពន្ធនាគារកាលពីថ្ងៃទី១៨ ខែមិថុនា។ ក្រុមអង្គការសង្គមស៊ីវិលដដែលលើកឡើងថា បញ្ហាសុខភាពរបស់ពួកគេកាន់តែដុនដាបបែបនោះ ក៏ដោយសារតែពួកគេពុំទទួលបានសេវាពិនិត្យ និងថែទាំសុខភាពបានជាប់ជាប្រចាំ ព្រមទាំងស្ថានភាពនៅក្នុងពន្ធនាគារព្រៃស ឬ ម១ មិនអំណោយផលដល់សុខភាពពួកគាត់ផង។
អ្នកនាំពាក្យនៃសមាគមការពារសិទ្ធិមនុស្សអាដហុក (ADHOC) លោក សំ ច័ន្ទគា មានប្រសាសន៍បន្ថែមថា ចាំបាច់ណាស់ដែលពួកគាត់ត្រូវទទួលបានការថែទាំសុខភាពដោយពុំមានការរើសអើង៖ «គឺឲ្យមានការព្យាបាល ការបើកទូលាយឲ្យទាំងគ្រូពេទ្យទាំងការយកចិត្តទុកដាក់របស់ពេទ្យនៅក្នុងពន្ធនាគារ ហើយបើសិនជាសុខភាពពួកគាត់កាន់តែធ្ងន់ទៅៗ ត្រូវតែអនុញ្ញាតឲ្យពួកគាត់បានចេញមកព្យាបាលនៅមន្ទីរពេទ្យរដ្ឋខាងក្រៅ»។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា មានប្រសាសន៍ឆ្លើយតបថា ចំពោះអ្នកដែលកំពុងជាប់នីតិវិធីនៅតុលាការ គឺចាំបាច់ត្រូវសុំការអនុញ្ញាតពីតុលាការ៖ «អ្នកផ្សេងចូលបានហ្នឹងគេអត់មានជាប់នីតិវិធីតុលាការផង។ គាត់ជាប់នីតិវិធីតុលាការហ្នឹងហើយ ទើបខាងពន្ធនាគារមិនអាចសម្រេចបានទេ»។
ក្រៅពីស្នើសុំឲ្យមានការយល់ព្រមឲ្យអ្នកជាប់ឃុំទាំង ៣នាក់បានទទួលសេវាពិនិត្យ និងថែទាំសុខភាព ក្រុមគ្រួសារក៏បានដាក់សំណើទៅតុលាការ សុំលទ្ធភាពក្នុងការនាំអ្នកទាំងនោះមករកសេវាព្យាបាលនៅមន្ទីរពេទ្យខាងក្រៅដែរ ប៉ុន្តែសំណើនេះពុំទាន់មានការឆ្លើយតបនៅឡើយ។
មន្ត្រីការពារសិទ្ធិមនុស្សនៃសមាគមអាដហុក ចំនួន ៤រូប មានលោក នី សុខា លោក យី សុខសាន្ត លោក ណៃ វ៉ង់ដា អ្នកស្រី លឹម មុន្នី និងលោក នី ចរិយា អគ្គលេខាធិការរងនៃ គ.ជ.ប ត្រូវបានអង្គភាពប្រឆាំងអំពើពុករលួយរបស់លោក ឱម យ៉ិនទៀង ចោទប្រកាន់ និងចាប់ខ្លួនក្រោមហេតុផលសមគំនិត និងសូកប៉ាន់សាក្សីកាលពីចុងខែមេសា ឆ្នាំ២០១៦ ជុំវិញស្នេហាដែលគេចោទរវាងលោក កឹម សុខា និងអ្នកនាង ខុម ចាន់តារាទី ហៅស្រីមុំ។ តុលាការបានឃុំខ្លួនអ្នកទាំង ៥រូបជាងមួយឆ្នាំទៅហើយដោយមិនទាន់កាត់ក្តី។
បើទោះជាយ៉ាងណា ក្រុមអង្គការសង្គមស៊ីវិលជាតិ និងអន្តរជាតិ រួមទាំងអង្គការសហប្រជាជាតិផង ចាត់ទុកការឃុំខ្លួននេះថាជាការឃុំខ្លួនតាមតែអំពើចិត្ត។
ក្នុងករណីបញ្ហាសុខភាពនេះវិញ ក្រុមអង្គការសង្គមស៊ីវិលលើកឡើងថា សិទ្ធិទទួលបានការថែទាំសុខភាពឲ្យបានគ្រប់គ្រាន់ មានចែងនៅក្នុងមាត្រា២៥ នៃសេចក្ដីប្រកាសជាសកលរបស់អង្គការសហប្រជាជាតិស្ដីពីសិទ្ធិមនុស្ស ហើយសិទ្ធិនេះមិនត្រូវបានគេកាត់បន្ថយដោយគ្រាន់តែពួកគេជាប់ពន្ធនាគារឡើយ៕