ពលរដ្ឋខ្មែរនៅក្រៅប្រទេស គ្រោងធ្វើបុណ្យខួបគម្រប់មួយឆ្នាំនៃការបាញ់សម្លាប់លោកបណ្ឌិត កែម ឡី។ នៅប្រទេសអូស្ត្រាលី (Australia) សហគមន៍ខ្មែរនៅទីក្រុងអាដឺឡែត (Adelaide) នឹងធ្វើពិធីនេះនៅថ្ងៃសុក្រ ទី៧ ខែកក្កដា។ រីឯនៅទីក្រុងម៉ែលប៊ន (Melbourne) រដ្ឋវ៉ិចតូរីយ៉ា (Victoria) មានវត្តខ្មែរចំនួន៥ នឹងរួមគ្នារៀបចំពិធីបុណ្យខួបនេះនៅថ្ងៃអាទិត្យ ទី៩ ខែកក្កដា។ ចំណែកឯនៅសហរដ្ឋអាមេរិកឯណេះវិញ ពលរដ្ឋខ្មែរនៅរដ្ឋម៉ារីឡែន (Maryland) ជាប់រដ្ឋធានីវ៉ាស៊ីនតុន ក៏នឹងរៀបចំពិធីបុណ្យនេះនៅវត្តពុទ្ធិការាម ហៅវត្តម៉ារីឡែន នៅថ្ងៃអាទិត្យ ទី៩ ខែកក្កដា។
លោក ទឹង យ៉ាប់ តំណាងអ្នករៀបចំពិធីនៅរដ្ឋម៉ារីឡែន បញ្ជាក់ប្រាប់ថា បុណ្យនេះធ្វើរួមគ្នាជាមួយមហាសន្និបាតខ្មែរនៅឯនាយសមុទ្រ ដែលអញ្ជើញអ្នកដឹកនាំខ្មែរមកពីរដ្ឋផ្សេងៗដើម្បីមកជជែកគ្នាអំពីរឿងប្រយោជន៍ខ្មែរ៖ «គោលបំណងធំ គឺយើងគោរពវិញ្ញាណក្ខន្ធរបស់គាត់ ព្រោះគាត់ជាអ្នកខ្នះខ្នែងមួយជួយសង្គមខ្មែរ។ គាត់ជាខ្មែរស្នេហាជាតិ។ បើសិនជាបងប្អូនណាចង់ចូលថវិកា ជួយទៅក្រុមគ្រួសារលោក កែម ឡី ហើយនិងការធ្វើសកម្មភាពបន្តរបស់ កែម ឡី យើងនឹងស្វាគមន៍»។
ឯពលរដ្ឋខ្មែរនៅក្រុងឡូវែល (Lowell) រដ្ឋម៉ាសាឈូសេត (Massachusetts) ឯណោះ គ្រោងនឹងប្រារព្ធពិធីនេះនៅថ្ងៃអាទិត្យ ទី១៦ ខែកក្កដា នៅភោជនីយដ្ឋានសាន់នីដា។ លោក ម៉ាន់ សារុន តំណាងឲ្យអ្នកចាត់ចែងពិធីបុណ្យ ចាត់ទុកលោកបណ្ឌិត កែម ឡី ជាមនុស្សដែលគួរឲ្យគោរព និងចងចាំជានិច្ច៖ «គោលបំណង គឺយើងរំឭកនឹកដល់គុណគាត់ ដែលគាត់ហ៊ានលះបង់ជីវិត លះបង់សព្វគ្រប់ដើម្បីជាតិ។ ម្ល៉ោះហើយ យើងមិនអាចបំភ្លេចគាត់បានទេ។ យើងត្រូវតែធ្វើបុណ្យតបស្នងសងគុណជូនគាត់។ យើងនឹងយកថវិកាទៅធ្វើបុណ្យបង្សុកូលនៅផ្នូរគាត់ និងជូនដល់ម្តាយគាត់។ បើថវិកាហ្នឹងបានក្រាស់ក្រែល យើងនឹងយកទៅជូនដល់ភរិយា និងកូនរបស់គាត់»។
លោកបណ្ឌិត កែម ឡី ត្រូវបានពលរដ្ឋខ្មែរនៅសហរដ្ឋអាមេរិក ជាច្រើនចាត់ទុកថា ជាវីរបុរសតំណាងឲ្យការទាមទារសិទ្ធិពលរដ្ឋ។ លោកជាអ្នកវិភាគស្ថានការណ៍សង្គម និងនយោបាយដោយឥតសំចៃមាត់ និងហ៊ានរិះគន់ប្រព័ន្ធដឹកនាំប្រទេសរបស់គណបក្សប្រជាជនកម្ពុជា និងការគ្រប់គ្រងជំនួញធំៗរបស់គ្រួសារត្រកូលហ៊ុន។ លោកគឺជាបុគ្គលចុងក្រោយដែលត្រូវបានឃាតកបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦ នៅក្នុងហាងលក់ទំនិញស្ដារម៉ាត (Star Mart) ស្ថានីយប្រេងឥន្ធនៈកាល់តិច (Caltex) ជិតស្តុបបូកគោ ខណ្ឌចំការមន រាជធានីភ្នំពេញ។ គិតចាប់ពីថ្ងៃបាញ់ប្រហាររហូតមកដល់ពេលនេះ គឺមានជនសង្ស័យតែម្នាក់គត់ ដែលសមត្ថកិច្ចចាប់ខ្លួនពាក់ព័ន្ធរឿងក្ដីនេះ៕