Clik here to view.
ប្រតិភូរាជរដ្ឋាភិបាលទទួលបន្ទុករដ្ឋបាលជលផល លោក អេង ជាសាន អះអាងប្រាប់អាស៊ីសេរី នៅថ្ងៃទី២៧ មិថុនា ថា កម្ពុជា គ្រោងស្នើសុំជំនួយបច្ចេកទេស និងថវិកាពីប្រទេសចិន ដើម្បីយកមកអភិរក្សសត្វផ្សោតដែលជាប្រភេទសត្វកំពុងទទួលរងគ្រោះថ្នាក់ផុតពូជ។
លោកអះអាងថា មូលហេតុមានគម្រោងស្នើសុំថវិកានេះ ដោយសារប្រទេសចិន បានហុចដៃដើម្បីផ្ដល់កិច្ចសហការជាមួយភាគីកម្ពុជា លើការងារអភិរក្សជលផល។ ទោះជាយ៉ាងណា មន្ត្រីជលផលរូបនេះបញ្ជាក់ថា ភាគីកម្ពុជា នៅមិនទាន់ដឹងអំពីទំហំទឹកប្រាក់ដែលខ្លួនត្រូវការពីប្រទេសចិន នៅឡើយទេ៖ «យើងមិនទាន់ដឹងថាចំនួនប៉ុនណាទេ នៅក្នុងកិច្ចសហការហ្នឹង ព្រោះចាំភាគីចិន សិក្សាថាតើមានលទ្ធភាពជួយមកភាគីកម្ពុជា បានប៉ុនណា»។
តួលេខពីអង្គការមូលនិធិសកលសម្រាប់អភិរក្សធនធានធម្មជាតិ ប្រចាំកម្ពុជា ហៅកាត់ថា WWF-Cambodia ឲ្យដឹងថា ចាប់ពីឆ្នាំ១៩៩៧ ដល់ឆ្នាំ២០១៥ សត្វផ្សោតទន្លេមេគង្គរបស់កម្ពុជា បានថយចុះពីចំនួន ២០០ក្បាលមកនៅត្រឹមចំនួន ៨០ក្បាល។ អង្គការមួយនេះឲ្យដឹងទៀតថា គម្រោងសាងសង់ទំនប់វារីអគ្គិសនីជាបន្តបន្ទាប់នៅតាមដងទន្លេមេគង្គ ជាពិសេសទំនប់វារីអគ្គិសនីសាយ៉ាបូរី (Xayaburi) និងទំនប់វារីអគ្គិសនីដនសាហុង (Don Sahong) របស់ប្រទេសឡាវ គឺជាការគំរាមកំហែងដ៏ធំមួយទៅដល់ការរស់នៅរបស់សត្វផ្សោតទាំងនេះ៕
