អង្គការតម្លាភាពកម្ពុជា (Transparency international Cambodia) បង្ហាញលទ្ធផលបឋមអំពីចំនួនតួលេខអ្នកមកបោះឆ្នោត និងចំនួនសន្លឹកឆ្នោតនៃគណបក្សនយោបាយធំៗចំនួនពីរ ដែលទទួលបានទូទាំងប្រទេស តាមរយៈការសង្កេតការណ៍បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ដោយផ្អែកទៅលើសំណាកគំរូវិទ្យាសាស្ត្រស្ថិតិ។ ការរកឃើញរបស់អង្គការនេះ បង្ហាញថា គណបក្សប្រជាជនកម្ពុជា និងគណបក្សសង្គ្រោះជាតិ ទទួលបានសន្លឹកឆ្នោតប្រកៀកប្រកិតគ្នា។
អង្គការតម្លាភាពកម្ពុជា ប៉ាន់ប្រមាណថា អត្រាសន្លឹកឆ្នោតដែលគណបក្សប្រជាជនកម្ពុជា ទទួលបានទូទាំងប្រទេសគឺស្ថិតនៅចន្លោះពី ៤៧,៩% ទៅ ៥០,៩% រីឯចំនួនសន្លឹកឆ្នោតដែលគណបក្សសង្គ្រោះជាតិ ទទួលបានគឺស្ថិតអត្រានៅចន្លោះពី ៤១,៨% ទៅ ៤៤,៦%។
ប្រធានអង្គការតម្លាភាពកម្ពុជា ហៅកាត់ថា ធី.អាយ (TI) លោក ព្រាប កុល មានប្រសាសន៍ថា អង្គការនេះបានជ្រើសរើសយកគណបក្សទាំង២ មកធ្វើវិភាគដោយសារតែពួកគេបានដាក់បេក្ខជនទូទាំងប្រទេស។ លោកថា ក្នុងចំណោមការិយាល័យតាមឃុំ-សង្កាត់ សរុបចំនួន ២២.១៤៨ ក្នុង ២៥ខេត្ត រាជធានី មានគំរូសំណាកចំនួន ៤១១ការិយាល័យដែលជ្រើសមកវិភាគ។
លោកថា អង្គការតម្លាភាពចូលរួមលើកកម្ពស់តម្លាភាព សុចរិតភាព នៅក្នុងដំណើរការបោះឆ្នោត ដូច្នេះបើសិនអ្វីៗប្រព្រឹត្តទៅដោយត្រឹមត្រូវ និងរលូន លោកសង្ឃឹមថា តួលេខលទ្ធផលនេះធ្វើឲ្យប្រជាពលរដ្ឋ និងសាធារណជនអាចស្ងប់ចិត្ត អាចបង្កើនការជឿទុកចិត្ត និងបង្កើតការជឿជាក់ថែមទៀត៖ «តួលេខនេះគឺយើងនិយាយតែចំនួនភាគរយនៃអ្នកបោះឆ្នោតឲ្យគណបក្សទាំង២។ យើងអត់បង្ហាញពីការឈ្នះចាញ់ទេ ទុកការងារនេះឲ្យ គ.ជ.ប គាត់អ្នកប្រកាសជាផ្លូវការ។ ចង់និយាយថា សន្លឹកឆ្នោតមានប៉ុណ្ណឹង បោះឲ្យគណបក្សប្រជាជន និងគណបក្សសង្គ្រោះជាតិ។ គណបក្សដទៃមូលហេតុដែលអត់បានដោយសារគាត់អត់បានដាក់គ្រប់ចំនួនឃុំទាំងអស់ទេ»។
លោកថ្លែងបែបនេះនៅក្នុងសន្និសីទសារព័ត៌មានស្ដីពីការចេញផ្សាយលទ្ធផលជាបឋមនៃភាគរយរបស់គណបក្សនយោបាយ និងចំនួនអ្នកបោះឆ្នោតដែលបានរកឃើញតាមរយៈការសង្កេតការណ៍ដោយផ្អែកលើសំណាកវិទ្យាសាស្ត្រស្ថិតិ នៅថ្ងៃទី២២ មិថុនា របស់អង្គការតម្លាភាពកម្ពុជា។
ឆ្លើយតបបញ្ហានេះ អ្នកនាំពាក្យ គ.ជ.ប លោក ហង្ស ពុទ្ធា យល់ឃើញថា ការធ្វើការស្រាវជ្រាវគឺមិនប្រាកដថា ត្រឹមត្រូវ ១០០% នោះទេ។ លោកថា គ.ជ.ប មិនអាចបញ្ជាក់បានឡើយចំពោះតួលេខជាក់លាក់ផ្លូវការ គ.ជ.ប នឹងចេញផ្សាយនៅថ្ងៃទី២៥ មិថុនា ខាងមុខ៖ «ការចូលរួមក្នុងវិស័យបោះឆ្នោតដោយអង្គការមិនមែនរដ្ឋាភិបាល ឬក៏ស្ថាប័នផ្សេងៗ នោះគឺជាស្មារតីមួយល្អសម្រាប់ការចូលរួម ក៏សម្រាប់ឲ្យការបោះឆ្នោតប្រព្រឹត្តទៅបានល្អប្រសើរដែរ»។
ការស្រាវជ្រាវរបស់ ធី.អាយ ក៏បង្ហាញពីអត្រានៃពលរដ្ឋទូទាំងប្រទេសបានទៅបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ កាលពីថ្ងៃទី៤ មិថុនា មានចំនួនចន្លោះពី ៨៩,៧% ទៅ ៩០,៧% អត្រានេះគឺស្រដៀងគ្នា លទ្ធផលបឋមដែលប្រកាសដោយគ.ជ.ប ថា មានអត្រានៃពលរដ្ឋបានទៅបោះឆ្នោតចំនួន ៨៩.៥២% នោះ។
មួយវិញទៀត អង្គការតម្លាភាពក៏បានដាក់ពង្រាយអ្នកសង្កេតការណ៍ចំនួន ២០០នាក់ នៅការិយាល័យបោះឆ្នោតចំនួន ១០០ការិយាល័យ នៅក្នុងឃុំសង្កាត់ចំនួន ៣ មានសង្កាត់ចោមចៅ៣ រាជធានីភ្នំពេញ សង្កាត់បាវិត ខេត្តស្វាយរៀង និងឃុំដំដែក ខេត្តសៀមរាប។ ចំនួនសន្លឹកឆ្នោតដែលអ្នកសង្កេតការណ៍បានផ្ទៀងផ្ទាត់ក្នុងឃុំសង្កាត់ចំនួន ៣ នេះ គឺត្រូវគ្នានឹងលទ្ធផលរបស់ គ.ជ.ប ដែលឆ្លុះបញ្ចាំងអំពីចំនួនសន្លឹកឆ្នោតពិតប្រាកដដូចដែលបានរាប់នៅក្នុងការិយាល័យបោះឆ្នោត។
លោក ព្រាប កុល បញ្ជាក់ថា ការជ្រើសយកឃុំ-សង្កាត់ចំនួន៣នេះ គឺដោយសារឃុំ-សង្កាត់នេះ មានការចាប់អារម្មណ៍ខ្លាំងពីការប្រកួតប្រជែងគ្នា និងមានភាពប្រទាញប្រទង់គ្នាកាលពីអាណត្តិមុនៗ។ ក្រៅពីនេះ ក៏ចង់ផ្ទៀងផ្ទាត់ការរាប់សន្លឹកឆ្នោត និងការសង្កេតការណ៍តួលេខរវាងអង្គការនេះ និងគ.ជ.ប៕