Clik here to view.
មេឃុំសំអាង ស្រុកថាឡាបរិវ៉ាត់ ខែត្រស្ទឹងត្រែង រងការចោទថាចុះហត្ថលេខាឲ្យឈ្មួញកាប់ព្រៃសហគមន៍បំពានច្បាប់ព្រៃឈើ។ ការចោទប្រកាន់នេះ ក្រោយពីជនជាតិដើមភាគតិចកួយ កាលពីពេលថ្មីៗនេះរកឃើញលិខិតមួយច្បាប់ បង្ហាញថាមេឃុំសំអាង និងមេប៉ុស្តិ៍រដ្ឋបាល ឃុបឃិតចុះហត្ថលេខាអនុញ្ញាតឲ្យឈ្មួញកាប់ព្រៃសហគមន៍ចំនួន ៨ម៉ែត្រគូបជាឈើគ្រឿងផ្ទះ។ តែការអនុវត្តជាក់ស្តែងវិញ ក្រុមឈ្មួញបានសម្រុកកាប់ព្រៃសហគមន៍អស់រាប់រយម៉ែត្រគូបតាមអំពើចិត្ត រួមទាំងដើមឈើផលិតជ័រទឹកផង។
ជនជាតិដើមភាគតិចកួយ និងអង្គការសង្គមស៊ីវិល ចាត់ទុកលិខិតរបស់មេឃុំសំអាង លោក ញឿន ផុន ដែលអនុញ្ញាតឲ្យឈ្មួញកាប់ព្រៃសហគមន៍ដោយមិនបានឆ្លងកាត់មន្ត្រីជំនាញរដ្ឋបាលព្រៃឈើ និងគណៈកម្មការសហគមន៍នោះ ថាជាទង្វើល្មើសនីតិវិធីរដ្ឋបាលសាធារណៈ និងល្មើសច្បាប់ស្ដីពីព្រៃឈើ ហេតុនេះពួកគេទាមទារឲ្យមេឃុំ និងអ្នកពាក់ព័ន្ធទទួលខុសត្រូវ។
ជនជាតិដើមភាគតិចកួយ រស់នៅភូមិឆ្វាំង ឃុំសំអាង ស្រុកថាឡាបរិវ៉ាត់ លោក អ៊ុក ម៉ៅ ឲ្យដឹងនៅថ្ងៃទី២១ មិថុនា ថា នៅពេលដែលឈ្មួញបានទទួលលិខិតអនុញ្ញាតពីមេឃុំ និងមេប៉ុស្តិ៍ឲ្យកាប់ព្រៃសហគមន៍ចំនួន ៨ម៉ែត្រគូប ក្រុមឈ្មួញបានសម្រុកកាប់ឈើធំៗក្នុងព្រៃសហគមន៍តាមអំពើចិត្តអស់រាប់រយម៉ែត្រគូប រួមទាំងដើមឈើផលិតជ័រទឹកអស់រាប់រយដើម។ លោកថា អ្នកភូមិគ្រោងប្ដឹងអ្នកកាប់បំផ្លាញដើមឈើផលិតជ័រទឹក ទៅស្ថាប័នអយ្យការ៖ «មេឃុំស៊ីញេឲ្យ និងមេប៉ុស្តិ៍ស៊ីញេឲ្យគាត់កាប់ឈើ មិនមែនអារឈើធ្វើគ្រឿងផ្ទះទេ។ ឈ្មួញហ្នឹងទៅកាប់ឈើលក់តែម្តង ហើយទន្ទ្រានហ្នឹងក្នុងដីសហគមន៍ទៀត ហើយឈើមិនមែន ៨ម៉ែត្រគូបទេ គឺរាប់ម៉ឺនម៉ែត្រគូប ដឹងមុនបោះឆ្នោតមួយយប់ រថយន្តសាំយ៉ុងដឹក ១០គ្រឿង យ៉ាងទាបបំផុត ៥គ្រឿង។ និយាយរួម ម្ខាងព្រៃសហគមន៍កាប់អស់រលីងម៉ង»។
ជនជាតិដើមភាគតិចម្នាក់ទៀតរស់នៅឃុំសំអាង លោកស្រី ចាន់ គីម ត្អូញថា គ្រួសារលោកស្រីមានដើមឈើផលិតជ័រទឹកជាង ៣០០ដើមឋិតក្នុងព្រៃសហគមន៍ ត្រូវបានគេកាប់បំផ្លាញអស់ស្ទើរទាំងស្រុងនៅប៉ុន្មានខែចុងក្រោយនេះ។ ការកាប់បំផ្លាញដើមឈើផលិតជ័រទឹកនេះ ធ្វើឲ្យប៉ះពាល់ជីវភាពធ្ងន់ធ្ងរ ត្បិតគ្រួសារលោកស្រីនៅជំពាក់បំណុលមីក្រូហិរញ្ញវត្ថុជាច្រើនលានរៀល។ លោកស្រីរំឭកថា កន្លងទៅ គ្រួសារលោកស្រីពឹងផ្អែកលើការដងជ័រទឹកដែលក្នុងមួយខែដងបាន ១៦កាន ហើយក្នុងមួយកានអាចលក់បានប្រាក់ ១០ម៉ឺនរៀល៖ «កាប់ព្រៃច្បោះខ្ញុំអស់រលីង អត់មានសល់ទេ សង្ឃឹមបានចិញ្ចឹមជីវិតទិញប៊ីចេង និងទិញអំបិល បានច្បោះហ្នឹងឯង។ ដល់តែឥឡូវគេកាប់អស់ហើយ អត់មានសល់ទេ មិនដឹងរកអ៊ីដាក់អីទេខ្ញុំ! ចុងក្រោយគេកាប់អស់មិនដឹងធ្វើម៉េច»។
ឆ្លើយតបបញ្ហានេះ មេឃុំសំអាង លោក ញៀន ផុន បដិសេធថា ការចោទប្រកាន់នេះដោយលើកហេតុផលថា អាជ្ញាធរឃុំមិនដែលចុះហត្ថលេខាឲ្យគេកាប់ព្រៃសហគមន៍នោះទេ។ តែយ៉ាងណា លោកទទួលស្គាល់ថា អាជ្ញាធរឃុំធ្លាប់ទទួលសំណើពីពលរដ្ឋចំនួន ៣គ្រួសារកាលពីឆ្នាំ២០១៦ ដោយស្នើសុំកាប់ឈើធ្វើផ្ទះតិចតួច ហើយលោកបានជំរុញឲ្យពលរដ្ឋដាក់ពាក្យស្នើសុំតាមឋានានុក្រម ដោយមានមន្ត្រីជំនាញរដ្ឋបាលព្រៃឈើពិនិត្យសម្រេច។ លោកបញ្ជាក់ថា សំណើនោះគឺឋិតនៅក្រៅបរិវេណព្រៃសហគមន៍ភ្នំជម្រកសត្វទេ៖ «ឥឡូវខ្ញុំបានឃើញហើយ និងបានបញ្ជូនទៅមន្ត្រីរដ្ឋបាលព្រៃឈើ តែគាត់ឲ្យរដ្ឋបាលព្រៃឈើអត់? ខ្ញុំអត់ដឹងទេ! ខ្ញុំមើលលិខិតផ្ទាល់ មិនមែនឲ្យទៅកាប់ព្រៃសហគមន៍ទេ ដាច់ខាតហើយអាហ្នឹង»។
ព្រៃសហគមន៍ភ្នំជម្រកសត្វមានផ្ទៃដីចំនួនជាង ៤ពាន់ហិកតារ (៤.៤៤៦,១៦ហិកតារ) ត្រូវបានអាជ្ញាធរខែត្រស្ទឹងត្រែង ទទួលស្គាល់ជាផ្លូវការនៅដើមឆ្នាំ២០១៥ ឋិតក្រោមការគ្រប់គ្រងរបស់មន្ទីរកសិកម្ម ដែលមានមន្ត្រីរដ្ឋបាលព្រៃឈើជាស្ថាប័នស្នូល។ អ្នកភូមិថារហូតមកទល់ពេលនេះ ព្រៃនៅតំបន់នោះត្រូវបានគេកាប់អស់ជាងពាក់កណ្ដាល និងមានផ្នែកខ្លះបានក្លាយជាដីកម្មសិទ្ធិឯកជនមានដាំដំណាំស្វាយចន្ទី និងដំឡូងមី ជាដើម។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល ពន្យល់ថា មេឃុំ និងមេប៉ុស្តិ៍រដ្ឋបាល ពុំមានសិទ្ធិចេញលិខិតស្នាមអនុញ្ញាតឲ្យកាប់ព្រៃសហគមន៍នោះទេ គឺមានសិទ្ធិត្រឹមបញ្ជូនសំណើរបស់ពលរដ្ឋទៅមន្ត្រីជំនាញរដ្ឋបាលព្រៃឈើពិនិត្យសម្រេច និងមានការសម្របសម្រួលពីគណៈកម្មការសហគមន៍ផង។ លោកថា ពលរដ្ឋមានសិទ្ធិប្ដឹងមេឃុំ និងអ្នកពាក់ព័ន្ធទៅស្ថាប័នអយ្យការពីបទចេញលិខិតអនុញ្ញាតខុសនីតិវិធីរដ្ឋបាល និងបំពានច្បាប់ព្រៃឈើ៕