សហគមន៍ខ្មែរក្រោម នឹងពិភាក្សាគ្នាអំពីជំហររបស់ខ្លួនជុំវិញករណីសាលារាជធានីភ្នំពេញ មិនអនុញ្ញាតឲ្យហែក្បួនដាក់ញត្តិទៅរដ្ឋសភា ក្នុងពិធីរំឭកខួប ៦៨ឆ្នាំនៃការបាត់បង់ទឹកដី។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍ថា នៅថ្ងៃទី២២ មិថុនា លោក និងគណៈកម្មការរៀបចំពិធីបុណ្យ នឹងពិភាក្សាគ្នាចំពោះការបដិសេធនេះ។ លោកថា នៅថ្ងៃទី២៦ មិថុនា សហគមន៍ខ្មែរកម្ពុជាក្រោមប្រមាណ ២០០នាក់ គ្រោងដង្ហែក្បួនដាក់ញត្តិដោយអហិង្សាពីវត្តចាស់ត្រើយខាងកើតទល់មុខព្រះបរមរាជវាំង ទៅកាន់រដ្ឋសភា ដើម្បីស្នើសុំបញ្ចូលថ្ងៃទី៤ មិថុនា ជាទិវាកាន់ទុក្ខជាតិខ្មែរ៖ «យើងបានដាក់ពាក្យស្នើសុំហែទៅសភាតែ ២០០នាក់ទេ ក៏លោកមិនឲ្យហែដែរ។ អ្វីជាហេតុផលសណ្ដាប់ធ្នាប់សាធារណៈ ខ្ញុំឃើញអ៊ីចឹងវាភ្ញាក់ផ្អើលដែរ សាលាក្រុងអសមត្ថភាពអ៊ីចឹងបានជាគ្រឿងញៀនច្រើន ហើយចោរច្រើន បានជាពលរដ្ឋមួយរយពីររយនាក់ហែញត្តិដោយសន្តិវិធី ការពារមិនបានផងហ្នឹង។ យើងសោកស្ដាយដែរ ជាសមត្ថកិច្ចរបស់ដែលមិនអាចផ្ដល់ការការពារប្រជាពលរដ្ឋក្នុងការប្រើប្រាស់សិទ្ធិរបស់ខ្លួន ក្នុងការធ្វើបាតុកម្ម ជាការសោកស្ដាយដែរសម្រាប់អាជ្ញាធរក្រុងភ្នំពេញ»។
លោក ថាច់ សេដ្ឋា បញ្ជាក់ថា ញត្តិនេះមានបំណងឲ្យរដ្ឋសភាពិចារណាចំពោះសំណើសុំបញ្ចូលថ្ងៃទី៤ ខែមិថុនា ឆ្នាំ១៩៤៩ ជាទិវាកាន់ទុក្ខជាតិខ្មែរ ពីព្រោះវាជាថ្ងៃដែលប្រជាពលរដ្ឋ និងក្មេងជំនាន់ក្រោយគួរតែចងចាំអំពីប្រវត្តិសាស្ត្រដ៏ឈឺចាប់ ជូរចត់ និងទុក្ខក្រៀមក្រំបំផុតដែលបារាំង បានកាត់ទឹកដីកម្ពុជាក្រោម ទៅឲ្យវៀតណាម និងជាការរំឭកដឹងគុណចំពោះវីរបុរសខ្មែរដែលបានតស៊ូពលីជីវិតនៅក្នុងបុព្វហេតុការពារទឹកដី និងប្រទេសជាតិ។
នៅថ្ងៃមុនការហែញត្តិនេះ នៅថ្ងៃទី២៤ ខែមិថុនា សហគមន៍ខ្មែរកម្ពុជាក្រោម ក៏នឹងប្រារព្ធពិធីរំឭកខួប ៦៨ឆ្នាំនៃការបាត់បង់ទឹកដីកម្ពុជាក្រោម នៅវត្តចាស់ ស្ថិតនៅសង្កាត់ជ្រោយចង្វារ ខណ្ឌឫស្សីកែវ ដោយរៀបចំពិធីរាប់បាត្រព្រះសង្ឃចំនួន ១.៩៤៩អង្គ។
ជារៀងរាល់ឆ្នាំនៅថ្ងៃទី៤ ខែមិថុនា សហគមន៍ខ្មែរកម្ពុជាក្រោម តែងតែប្រារព្ធពិធីរំឭកខួបនៃការបាត់បង់ទឹកដីកម្ពុជាក្រោម ប៉ុន្តែដោយឡែកឆ្នាំ២០១៧ នេះ ប្រទេសកម្ពុជា មានការរៀបចំបោះឆ្នោតឃុំ-សង្កាត់ចំថ្ងៃទី៤ មិថុនា ដូច្នេះហើយសហគមន៍ខ្មែរកម្ពុជាក្រោម សម្រេចលើកពេល និងយកថ្ងៃទី២៤ មិថុនា ជំនួសវិញ៕