បណ្ដឹងប្រឆាំងអ្នកកាសែតនៅខេត្តរតនគិរី កើនឡើងដល់ ៦នាក់ហើយ បន្ទាប់ពីអ្នកបើកបររថយន្តដឹកជញ្ជូន រួមទាំងអ្នកជំនួញឈើ និងគ្រឿងសង្ហារិមដាក់ពាក្យបណ្ដឹងអ្នកកាសែតទាំងនោះទៅអយ្យការសាលាដំបូងកាលពីសប្ដាហ៍មុន។ អ្នកកាសែតទាំង ៦នាក់ មាន ៤នាក់កំពុងជាប់ឃុំខ្លួននៅពន្ធនាគារខេត្តរតនគិរី និងពីរនាក់ទៀតសំណុំរឿងឋិតក្នុងចំណាត់ការរបស់អយ្យការនៅឡើយ។
ការបន្ថែមបណ្ដឹងពីក្រុមអ្នកជួញដូរឈើនេះ ធ្វើឡើងក្រោយពេលកងរាជអាវុធហត្ថបានឃាត់ខ្លួនអ្នកកាសែតទាំង ៤រូប និងបញ្ជូនឲ្យតុលាការយកទៅឃុំខ្លួនពីបទសង្ស័យកំហែងទារប្រាក់ពីក្រុមអ្នកដឹកឈើជន្លង់ម្រេច និងឈើជន្លង់ស្រកានាគ។
មន្ត្រីលេខាធិការដ្ឋានរដ្ឋបាលអយ្យការសាលាដំបូងខេត្តរតនគិរី ឲ្យដឹងនៅថ្ងៃទី២១ ខែមិថុនា ថា ពាក្យបណ្ដឹងប្រឆាំងអ្នកកាសែតចំនួន ១០បណ្ដឹងទៀតបានដាក់ចូលការិយាល័យរដ្ឋបាលរួចហើយ។ ដើមបណ្ដឹងទាំង ១០នាក់ ខ្លះជាអ្នកបើកបររថយន្ត ខ្លះជាអ្នកជំនួញឈើជ្រុង និងគ្រឿងសង្ហារិម មានទីលំនៅក្នុងក្រុងបានលុង ខេត្តរតនគិរី បានប្ដឹងអ្នកកាសែត ២នាក់ ក្នុងចំណោម ៤នាក់ដែលកំពុងជាប់ឃុំនៅពន្ធនាគារពីរនាក់ គឺឈ្មោះ យ៉ន ទិត្យ បុគ្គលិកគេហទំព័រឈ្មោះ "យុវជនខ្មែរព័ត៌មាន" និងស្ត្រីឈ្មោះ ច័ន្ទ ណារ៉ា បុគ្គលិកទូរទស្សន៍អនឡាញ សង្កេតការណ៍។ រីឯអ្នកកាសែត ២រូបទៀតដែលរងការប្ដឹង គឺឈ្មោះ ជ័យ ចាន់ដាវី និងឈ្មោះ មឿន វណ្ណា ជាបុគ្គលិក ធី.អិន.អឹម អនឡាញ (TNM Online)។
អ្នកនាំពាក្យអយ្យការសាលាដំបូងខេត្តរតនគិរី លោក ហាក់ ហ័ន បញ្ជាក់ថា ព្រះរាជអាជ្ញាបានទទួលពាក្យបណ្ដឹងទាំង១០ នោះហើយ និងកំពុងបែងចែងពាក្យប្ដឹងនេះទៅឲ្យព្រះរាជអាជ្ញារងពិនិត្យ និងចាត់ការបន្ត៖ «មកដល់ហើយឥឡូវព្រះរាជអាជ្ញាកំពុងចែកសំណុំរឿងគ្នា»។
លោក មេធាវី ម៉ៅ សារី ដែលការពារក្ដីឲ្យអ្នកកាសែត បីរូបក្នុងចំណោម ៤រូប កំពុងជាប់ឃុំបញ្ជាក់ថា លោកមិនទាន់បានទទួលដំណឹងពីការដាក់ពាក្យប្ដឹងកូនក្ដីលោកបន្ថែម និងអ្នកកាសែតផ្សេងទៀតនោះទេ ខណៈដែលលោកកំពុងរៀបចំឯកសារស្នើសុំធានាកូនក្ដីលោកឲ្យបាននៅក្រៅការឃុំខ្លួនបណ្ដោះអាសន្ន៖ «រឿងថ្មីយើងអត់ដឹងៗតែមួយរឿងអ៊ីចឹងណា! យើងកំពុងស្នើសុំសម្ភារៈរបស់គាត់សិនរឿងសុំនៅក្រៅឃុំក៏យើងកំពុងរៀបចំស្នើដែរ»។
គេហទំព័រក្នុងស្រុកសរសេរនៅថ្ងៃ២១ ខែមិថុនា ថា អ្នកកាសែតមួយក្រុមប្រចាំការនៅខេត្តរតនគិរី បានធ្វើដំណើរមកភ្នំពេញ កាលពីថ្ងៃទី២០ ខែមិថុនា ដើម្បីស្វែងរកកិច្ចអន្តរាគមន៍ពីរដ្ឋមន្ត្រីក្រសួងព័ត៌មានទាក់ទងការចាប់ និងការដាក់ពាក្យប្ដឹងអ្នកកាសែត និងបានដកស្រង់ប្រភពអ្នកកាសែតមិនបញ្ជាក់អត្តសញ្ញាណដែលចោទប្រកាន់មន្ត្រីអាជ្ញាធរវិញថា បច្ចុប្បន្នឈ្មួញជនជាតិវៀតណាម ដឹកជញ្ជូនឈើឆ្លងដែនទៅប្រទេសវៀតណាម ដោយគ្មានសមត្ថកិច្ច និងអាជ្ញាធរណាបង្ក្រាប។
ទាក់ទិនករណីនេះ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក អ៊ុក គឹមសេង ទទួលស្គាល់ថា អ្នកកាសែតជាង ៤០នាក់ កាលពីថ្ងៃទី២០ ខែមិថុនា បានដាក់ញត្តិជូនរដ្ឋមន្ត្រីសុំអន្តរាគមន៍បញ្ហាឃុំខ្លួនអ្នកកាសែត ៤នាក់ នៅខែត្ររតនគិរី និងបង្ហាញពីរឿងចម្រូងចម្រាសដែលកំពុងកើតមានទាក់ទិនការចាប់ខ្លួនអ្នកកាសែត។
លោកបន្តថា រដ្ឋមន្ត្រីក្រសួងព័ត៌មានកំពុងចាត់មន្ត្រីធ្វើរបាយការណ៍ករណីទាំងអស់នេះជូនក្រសួងយុត្តិធម៌ ដើម្បីស្វែងរកយុត្តិធម៌ផ្លូវច្បាប់ជូនក្រុមអ្នកកាសែតដែលកំពុងជាប់ឃុំទាំងនោះ៖ «ប្រសិនបើមិនមែនក្នុងវិជ្ជាជីវៈលោកគិតថា ជាការដោះស្រាយរបស់សមត្ថកិច្ចផ្សេង មិនមែនជាសមត្ថកិច្ចរបស់ក្រសួងព័ត៌មានទេ។ យ៉ាងម៉េចក៏ដោយ ឯកឧត្ដមរដ្ឋមន្ត្រីបានប្រាប់ឲ្យមន្ត្រីក្រសួងព័ត៌មានរៀបចំរបាយការណ៍មួយផ្ញើទៅក្រសួងយុត្តិធម៌ពិនិត្យមើលថា តើត្រូវរកដំណោះស្រាយតាមផ្លូវច្បាប់យ៉ាងម៉េចដើម្បីរកយុត្តិធម៌ឲ្យអ្នកកាសែត»។
ទោះបីជាយ៉ាងនេះក្ដី ដើមបណ្ដឹងពីរនាក់មានមុខរបរជាអ្នកបើកបររថយន្ត និងអាជីវករដឹកជញ្ជូនគ្រឿងសង្ហារិមនៅខេត្តរតនគិរី ទទួលស្គាល់ថា លោកបានបង់ប្រាក់ ១០ម៉ឺនរៀលទៅឲ្យអ្នកកាសែតចំនួនបួនទៅប្រាំលើក នៅពេលអ្នកកាសែតគំរាមប្ដឹងសមត្ថកិច្ចឲ្យចាប់រថយន្តប្រសិនមិនបង់ប្រាក់ទៅឲ្យពួកគេ។ ដើមបណ្ដឹងបន្តថា ការប្ដឹងអ្នកកាសែតនេះដើម្បីឲ្យពួកគេបញ្ឈប់ការកំហែងយកប្រាក់បន្ត និងមិនចង់ឲ្យមានការចាប់ខ្លួនអ្នកកាសែតនោះទេ៕