ក្រុមប្រឹក្សាជំនុំជម្រះតុលាការកំពូលបានបើកការជំនុំជម្រះលើបណ្ដឹងសាទុក្ខរបស់អ្នកការពារសិទ្ធិមនុស្សអាដហុក (ADHOC) ៤រូប នៅព្រឹកថ្ងៃទី២១ ខែមិថុនា។ សាលដីកាសុំនៅក្រៅឃុំនេះ តុលាការកំពូលមិនទាន់ប្រកាសសាលដីកាភ្លាមៗទេ ដោយរក្សាទុកនឹងប្រកាសនៅចុងខែមិថុនា ខាងមុខនេះ។
ប្រធានក្រុមប្រឹក្សាជំនុំជម្រះនៃតុលាការកំពូល គឺអ្នកស្រី គឹម សុថាវី បានសម្រេចភ្លាមៗថា សាលដីកាក្នុងសំណុំរឿងក្ដីសុំនៅក្រៅឃុំបណ្ដោះអាសន្ននេះ នឹងត្រូវប្រកាសនៅព្រឹកថ្ងៃទី២៨ ខែមិថុនា បន្ទាប់ពីចំណាយពេលស្ដាប់ការលើកពីទឡ្ហីករណ៍ខ្លះៗ របស់ក្រុមមេធាវីការពារសិទ្ធិជនត្រូវចោទ និងអ្នកការពារសិទ្ធិមនុស្សទាំង ៤រូប អំពីមូលហេតុដែលស្នើសុំនៅក្រៅឃុំនេះ។
ថ្លែងប្រាប់ក្រុមអ្នកកាសែតនៅខាងក្រៅបរិវេណតុលាការកំពូល កាលពីព្រឹកថ្ងៃទី២១ ខែមិថុនា លោក ឡោ ជុនធី សង្កេតឃើញថា ក្រុមប្រឹក្សាហាក់បើកទូលាយ និងយកចិត្តទុកដាក់ចំពោះការលើកហេតុផលអំពីនីតិវិធីមួយចំនួនដែលស្នើសុំនៅក្រៅឃុំបណ្ដោះអាសន្នខុសពីសភាស៊ើបសួរនៃសាលាឧទ្ធរណ៍។ ជាងនេះទៅទៀត សេចក្ដីជូនអំពីការបិទការស៊ើបសួររបស់តុលាការក្រុងភ្នំពេញនេះ លោកមើលឃើញថា ប្រហែលអាចការបើកផ្លូវមួយដែរសម្រាប់បណ្ដឹងសាទុក្ខរបស់លោកដែលស្នើសុំក្រៅឃុំលើកនេះ៖ «ក្រុមប្រឹក្សាចៅក្រមបានន័យថា គាត់ខិតខំពិចារណា បានន័យថា ស្ដាប់ គាត់ពិចារណា ហើយគាត់បានយកការជូនដំណឹងនៃការបិទសំណុំរឿងពីម្សិលមិញនេះ ដែលយើងបានជូនទៅគាត់ដើម្បីឲ្យគាត់ពិចារណាថា តើអ្វីដែលជាការឃុំខ្លួនរហូតមកដល់ពេលនេះវាជាបរិបថមួយដែលអាចឲ្យកូនក្ដីយើងបាននៅក្រៅឃុំហើយ ឬនៅ?»។
ការស្នើសុំនៅក្រៅឃុំបណ្ដោះអាសន្នរបស់អ្នកការពារសិទ្ធិមនុស្សសមាគមអាដហុកទាំង ៤រូប វាពុំមែនជាលើកទី១ទេ ពោលគឺមានការស្នើសុំបែបនេះ ២លើករួចមកហើយ ប៉ុន្តែត្រូវបានសាលាឧទ្ធរណ៍ និងតុលាការកំពូលច្រានចោលរហូត។
គិតមកដល់ពេលនេះ ការឃុំខ្លួនមន្ត្រីការពារសិទ្ធិមនុស្សអាដហុក ទាំង ៤រូប រួមទាំងលោក នី ចរិយា ម្នាក់ផង មានរយៈពេល ១ឆ្នាំ ២ខែមកហើយ។ អ្នកទាំង ៥ ត្រូវបានអង្គភាពប្រឆាំងអំពើពុករលួយរបស់លោក ឱម យ៉ិនទៀង ចោទប្រកាន់ និងចាប់ខ្លួនក្រោមហេតុផលសមគំនិត និងសូកប៉ាន់សាក្សី កាលពីចុងខែមេសា ឆ្នាំ២០១៦ ជុំវិញការចោទប្រកាន់រឿងអាស្រូវស្នេហារវាងលោក កឹម សុខា និងអ្នកនាង ខុម ចាន់តារាទី ហៅស្រីមុំ។
នៅក្នុងបន្ទប់ជំនុំជម្រះរួមគ្នាតែមួយ មានលោក គឹម សុខ និងលោក វ៉ែន វ៉ន សកម្មជនតំបន់អារ៉ែងផង កាលពីព្រឹកថ្ងៃទី២១ ខែមិថុនា លោក នី សុខា បានលើកឡើងនៅក្នុងអង្គសវនាការថា មកដល់ពេលនេះមិនដឹងជាអ្នកណាជាដើមបណ្ដឹងឲ្យប្រាកដ។ ទាំងលោក កឹម សុខា និងអ្នកនាង ខុម ចាន់តារាទី ហៅស្រីមុំ ដែលគេចោទថា ជាដើមហេតុនៃរឿងក្ដីនេះ រួមទាំងអតីតមេឃុំ លោក ស៊ាង ចែត បែរជាត្រូវរួចខ្លួន។ ផ្ទុយទៅវិញ អ្នកការពារសិទ្ធិមនុស្សសមាគមអាដហុក ទាំង ៤រូប ដែលមានលុយជំនួយត្រឹម ២០៤ដុល្លារ និងលោក នី ចរិយាផង បែរជាត្រូវជាប់ឃុំលើសការកំណត់ដូចនេះទៅវិញ។
លោក សំ ច័ន្ទគា អ្នកនាំពាក្យសមាគមការពារសិទ្ធិមនុស្សអាដហុក យល់ឃើញថា ប្រសិនបើតុលាការធ្វើសេចក្ដីសម្រេចដោយផ្អែកលើអង្គហេតុ និងសុភវិនិច្ឆ័យមួយដ៏ត្រឹមត្រូវ អ្នកទាំង ៥ អាចបាននៅក្រៅឃុំតាមការស្នើសុំ៖ «ប្រសិនបើតុលាការគាត់ហ៊ានប្រើឆន្ទានុសិទ្ធិរបស់ខ្លួនខ្ញុំជឿថា គាត់នឹងទម្លាក់ការចោទប្រកាន់ដល់មន្ត្រីអាដហុក»។
ពេលនេះ នៅបរិវេណផ្នែកខាងក្នុងនៃតុលាការកំពូល អ្នកកាសែតលែងបានថតរូបដូចលើកមុនទៀតហើយ។ ទាំងក្រុមអ្នកកាសែត និងអ្នកសង្កេតការណ៍ត្រូវបានឆ្មាំយាមតុលាការបង្គាប់ឲ្យទុកទូរស័ព្ទ និងឧបករណ៍ថតរូប បើមិនដូច្នេះទេមិនអនុញ្ញាតឲ្យចូលឡើយ សូម្បីបរិវេណខាងក្នុងតុលាការកំពូលក៏ដោយចុះ។
កាលពីថ្ងៃទី២០ ខែមិថុនា តុលាការក្រុងភ្នំពេញ បានចេញសេចក្ដីជូនដំណឹងស្ដីពីការបិទការស៊ើបសួរទៅលើអ្នកការពារសិទ្ធិមនុស្សនេះហើយ។ ប៉ុន្តែមេធាវីការពារក្តីអះអាងថា ការជូនដំណឹងពីការបិទការស៊ើបសួរនេះ មិនមែនមានន័យថា បិទការស៊ើបអង្កេតជាស្ថាពរឡើយ ពោលបើមេធាវី ឬតំណាងអយ្យការយល់ឃើញថា នៅមានភាពមន្ទិលសង្ស័យណាមួយអាចស្នើសុំឲ្យស៊ើបអង្កេតឡើយវិញបាន។
ក្រុមអង្គការផ្នែកសិទ្ធិមនុស្សបានចាត់ទុកថា រឿងក្ដីរបស់អ្នកការពារសិទ្ធិមនុស្សអាដហុកនេះ គឺជារឿងនយោបាយជាជាងនីតិវិធីតាមផ្លូវការតុលាការ។ ទាក់ទិនរឿងនេះ កាលពីខែធ្នូ ឆ្នាំ២០១៦ ក្នុងពេលស្ថានភាពនយោបាយ ហាក់វិលទៅរកភាពប្រសើរនោះ លោក ស ខេង រដ្ឋមន្ត្រីក្រសួងមហាផ្ទៃ បានប្រាប់អ្នកកាសែត នៅវិមានរដ្ឋសភាថា អ្នកការពារសិទ្ធិមនុស្សទាំងនោះ អាចនឹងត្រូវដោះលែងនៅចុងខែធ្នូ ឆ្នាំ២០១៦ ក្រោយពីមានការប្រជុំពិភាក្សាបន្តទៀត។ ប៉ុន្តែនៅមានប្រតិកម្មរបស់លោក ហ៊ុន សែន លុបចោលក្រុមមតិភាគតិច និងមតិភាគច្រើននៅរដ្ឋសភា ហើយការឃុំខ្លួនអ្នកទាំង ៥រូប ត្រូវបន្តរហូតដល់សព្វថ្ងៃក្រោមហេតុផលរង់ចាំការស៊ើបអង្កេតតាមផ្លូវតុលាការ។
ប្រតិកម្មនឹងការស៊ើបអង្កេតនេះ លោក នី សុខា បានជម្រាបអង្គជំនុំជម្រះថា មកដល់ពេលនេះតុលាការទើបបញ្ចប់ការសាកសួរបានមនុស្សតែម្នាក់នៅឡើយប៉ុណ្ណោះ។ តុលាការក្រុងភ្នំពេញ បានចេញដីកាឃុំខ្លួន អ្នកការពារសិទ្ធិមនុស្សអាដហុក ៤រូប និងលោក នី ចរិយា ៦ខែបន្តទៀត កាលពីថ្ងៃទី២៧ ខែមេសា។ អ្នកការពារសិទ្ធិមនុស្សយល់ឃើញថា ការឃុំខ្លួន និងដាក់ឲ្យស្ថិតក្រោមការត្រួតពិនិត្យតាមផ្លូវតុលាការនៅពេលនេះ គឺជាការលេងសើចណាស់ពេកហើយ ប្រឆាំងអ្នកគាំពារផ្នែកសិទ្ធិមនុស្សបែបនេះ៕