រដ្ឋមន្ត្រីក្រសួងមហាផ្ទៃ លោក ស ខេង អះអាងថា ការរក្សាសន្តិសុខក្នុងអំឡុងពេលបោះឆ្នោតឃុំ-សង្កាត់ និងថ្ងៃបោះឆ្នោត ទទួលបានជោគជ័យ ព្រោះគ្មានអ្នករបួស ស្លាប់ និងគ្មានការគំរាមកំហែងដែលប៉ះពាល់អ្នកបោះឆ្នោត។ បក្សប្រឆាំង និងសង្គមស៊ីវិល ក៏សង្កេតឃើញដូច្នេះដែរ ប៉ុន្តែស្នើឲ្យការធានាសន្តិសុខក្នុងការបោះឆ្នោតឆ្នាំ២០១៨ ខាងមុខ មានភាពល្អប្រសើរដូចគ្នានេះដែរ។
ការទទួលបានជោគជ័យនៃកិច្ចការពារសន្តិសុខក្នុងអំឡុងពេលបោះឆ្នោត និងជាពិសេសក្នុងថ្ងៃបោះឆ្នោត ត្រូវបានរដ្ឋមន្ត្រីក្រសួងមហាផ្ទៃ លោក ស ខេង ពន្យល់ថា ព្រោះមានការចូលរួមពីសមត្ថកិច្ចចម្រុះ កងទ័ព មន្ត្រីរាជការ គណបក្សនយោបាយ និងជាពិសេសនោះ គឺភាពចាស់ទុំផ្នែកនយោបាយរបស់ប្រជាពលរដ្ឋ។ លោកថា ការរក្សាសន្តិសុខក្នុងការបោះឆ្នោតអាណត្តិនេះ គឺមានលក្ខណៈល្អប្រសើរជាងអាណត្តិមុនៗ៖ «តាមរយៈលទ្ធផលនៃការការពារសន្តិសុខនេះ បានលើកកម្ពស់កិត្យានុភាពកិត្តិយសប្រទេសកម្ពុជា យើងនៅលើឆាកអន្តរជាតិ។ ខ្ញុំក៏សូមថ្លែងអំណរគុណដល់បងប្អូនប្រជាពលរដ្ឋ និងបងប្អូនជនរួមជាតិយើងទាំងអស់»។
ថ្លែងប្រាប់ក្រុមអ្នកសារព័ត៌មាននៅព្រឹកថ្ងៃទី១៥ ខែមិថុនា ឆ្នាំ២០១៧ ក្រោយកិច្ចប្រជុំគណៈបញ្ជាការសន្តិសុខអចិន្ត្រៃយ៍កិច្ចការពារសន្តិសុខ សណ្ដាប់ធ្នាប់ និងសុវត្ថិភាព នៃដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ រដ្ឋមន្ត្រីក្រសួងមហាផ្ទៃ លោក ស ខេង ថ្លែងការពារចំណាត់ការដែលដាក់ពង្រាយសមត្ថកិច្ចនៅក្នុងបរិវេណនៃការិយាល័យបោះឆ្នោតថា នេះជារឿងធម្មតាដែលដូចទៅនឹងប្រទេសដទៃទៀតដែរ ដែលប្រើកងកម្លាំងក្នុងថ្ងៃបោះឆ្នោត ដើម្បីការពារសុវត្ថិភាពក្នុងថ្ងៃបោះឆ្នោត៖ «សមត្ថកិច្ចមិនឲ្យពង្រាយ មិនដឹងថាបង្កើតកម្លាំងដើម្បីអី? ខ្ញុំយល់ថាបើកម្លាំងនេះធ្វើល្អត្រឹមត្រូវ មិនត្រូវរិះគន់ទេ»។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ឬហៅថាអង្គការនិកហ្វិច (NICFEC) និងជាសមាជិកនៃបន្ទប់ស្ថានការណ៍បោះឆ្នោត លោក សំ គន្ធាមី ក៏សង្កេតឃើញពីភាពវិជ្ជមាននៃកិច្ចការពារសន្តិសុខក្នុងថ្ងៃបោះឆ្នោត។
យ៉ាងណាក៏ដោយចុះ ទោះគ្មានករណីហិង្សាដូចការលើកឡើងរបស់រដ្ឋមន្ត្រីក្រសួងមហាផ្ទៃ លោក ស ខេង ក្តី អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) រកឃើញថា ការបោះឆ្នោតឃុំ-សង្កាត់កាលពីថ្ងៃទី៤ ខែមិថុនា គឺធ្វើឡើងទាំងក្នុងបរិយាកាសគំរាមកំហែងទៅដល់សិទ្ធិបញ្ចេញមតិ និងការចូលរួមក្នុងនយោបាយ ដែលអាចចាត់ទុកការបោះឆ្នោតនេះថា គឺមិនបានធ្វើឡើងដោយសេរី និងយុត្តិធម៌ឡើយ។
អនុប្រធានគណបក្សសង្គ្រោះជាតិ លោក អេង ឆៃអ៊ាង និយាយថា ទោះមិនឃើញមានអំពើហិង្សាកើតឡើងគួរឲ្យកត់សម្គាល់ ប៉ុន្តែលោកស្នើឲ្យបរិយាកាសនយោបាយចាប់ពីពេលនេះរហូតដល់ថ្ងៃបោះឆ្នោតឆ្នាំ២០១៨ ខាងមុខ មានដំណើរការល្អ គ្មានការបំភិតបំភ័យ គ្មានហិង្សា និងគ្មានការគំរាមកំហែង៖ «ដើម្បីធ្វើយ៉ាងម៉េចឲ្យបរិយាកាសបោះឆ្នោតឆ្នាំ២០១៨ ជាការបរិយាកាសមួយល្អ អ្នកចាញ់ ចាញ់ដោយអស់ចិត្ត ហើយអ្នកឈ្នះ ឈ្នះដោយកិត្តិយស»។
ដូចគ្នានេះដែរ រដ្ឋមន្ត្រីក្រសួងមហាផ្ទៃ លោក ស ខេង រំពឹងថាអ្នកពាក់ព័ន្ធទាំងអស់ដែលបានចូលរួមក្នុងកិច្ចការពាររក្សាសន្តិសុខក្នុងអំឡុងពេលបោះឆ្នោតឃុំ-សង្កាត់ នឹងបន្តចូលរួមការពារសន្តិសុខក្នុងការបោះឆ្នោតជ្រើសរើសសមាជិករដ្ឋសភា ឆ្នាំ២០១៨ ខាងមុខ៕