សន្ទស្សន៍សន្តិភាពពិភពលោក (Global Peace Index) ប្រចាំឆ្នាំ២០១៧ ដែលបង្ហាញដោយវិទ្យាស្ថានសន្តិភាព និងសេដ្ឋកិច្ច បានដាក់ពិន្ទុប្រទេសកម្ពុជា ថាជាប្រទេសមានសន្តិភាពមធ្យម ដោយឈរលេខរៀងទី៨៩ ក្នុងចំណោមប្រទេសទាំង ១៦៣ នៅទូទាំងពិភពលោក។ ការចាត់ចំណាត់ថ្នាក់ចុងក្រោយនេះ គឺបង្ហាញថា សន្តិភាពនៅកម្ពុជា មានភាពកាន់តែល្អប្រសើរជាងកាលពីឆ្នាំ២០១៦ បើទោះជានៅមានបញ្ហាមួយចំនួនបង្កឡើងដោយសាររឿងនយោបាយក្ដី។
បើទោះបីជាលោកនាយករដ្ឋមន្ត្រី ហ៊ុន សែន ប្រកាសជារឿយៗថា សង្គ្រាមនឹងអាចផ្ទុះឡើងវិញគ្រប់ពេលវេលានៅកម្ពុជា ប្រសិនបើគណបក្សកាន់អំណាចរបស់លោកបាត់បង់អំណាចក្ដី ប៉ុន្តែសន្ទស្សន៍សន្តិភាពពិភពលោកប្រចាំឆ្នាំ២០១៧ បង្ហាញថា សន្តិភាពរបស់កម្ពុជា នៅពេលនេះ មានភាពកាន់តែល្អប្រសើរ បើប្រៀបធៀបពីឆ្នាំ២០១៦ ដែលស្ថិតនៅលេខរៀងទី១០៤ និងមកដល់ឆ្នាំ២០១៧ នេះ ថយចុះមកនៅត្រឹមលេខរៀង៨៩។
ការសិក្សាបង្ហាញបន្តថា សន្តិភាពរបស់កម្ពុជា ដែលកាន់តែល្អប្រសើរនេះ ដោយសារកត្តាមួយចំនួន ដូចជាការធ្លាក់ចុះការតវ៉ារបស់កម្មករ ការបញ្ជូនកងកម្លាំង និងហិរញ្ញវត្ថុចូលរួមតួនាទីរក្សាសន្តិភាពពិភពលោកនៅតាមប្រទេសមានជម្លោះមួយចំនួនជាមួយអង្គការសហប្រជាជាតិ និងការបញ្ចប់ជម្លោះព្រំដែនជាមួយប្រទេសថៃ ចាប់តាំងពីឆ្នាំ២០១១។
ទោះជាយ៉ាងណា ស្ថិរភាពក្នុងប្រទេសកម្ពុជា ពេលនេះ ហាក់នៅមានកម្រិតនៅឡើយ ដោយសារការតវ៉ាមួយចំនួនត្រូវបានបង្ក្រាបពីកងកម្លាំងរដ្ឋាភិបាលដឹកនាំដោយគណបក្សប្រជាជនកម្ពុជា និងហានិភ័យបង្កឡើងដោយសារភាពតានតឹងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ជាពិសេសបានកើតឡើងនៅអំឡុងរដូវកាលបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ និងការបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ ខាងមុខ។
ពាក់ព័ន្ធនឹងការដាក់ពិន្ទុ និងចាត់ចំណាត់ថ្នាក់សន្តិភាពរបស់កម្ពុជា ពីខាងសន្ទស្សន៍សន្តិភាពពិភពលោកប្រចាំឆ្នាំ២០១៧ នេះ ត្រូវបានលោក ផៃ ស៊ីផាន មន្ត្រីនាំពាក្យនៃទីស្ដីការគណៈរដ្ឋមន្ត្រីឆ្លើយតបថា លោកមិនដែលឱ្យតម្លៃចំពោះការដាក់ពិន្ទុបែបនេះឡើយ ព្រោះលោកមិនដឹងថា តើការដាក់ពិន្ទុនោះ អាចធ្វើឡើងត្រឹមត្រូវតាមក្បួនខ្នាតលក្ខណៈវិទ្យាសាស្ត្រពិតដែរឬទេ?
ប៉ុន្តែលោក ផៃ ស៊ីផាន បញ្ជាក់ថា មានតែពលរដ្ឋកម្ពុជា ប៉ុណ្ណោះ ដែលអាចវាយតម្លៃចំពោះសន្តិភាព និងការអភិវឌ្ឍ ដែលពួកគេកំពុងទទួលបាននៅពេលនេះ៖ «មានតែប្រជាពលរដ្ឋកម្ពុជាទេ ដែលមានអារម្មណ៍ថា ពួកគេកំពុងរីករាយជាមួយសន្តិភាព និងការអភិវឌ្ឍ»។
មន្ត្រីរដ្ឋាភិបាលរូបនេះបន្ថែមទៀតថា បើធ្វើការប្រៀបធៀបសន្តិភាពរបស់កម្ពុជា នៅពេលនេះ ហាក់ឈានដល់ចំណុចកំពូលមួយដែលកម្ពុជា មានឱកាសអភិវឌ្ឍ និងរក្សាបាននូវកំណើនសេដ្ឋកិច្ច។ ក្រៅពីនេះ លោកបន្តថា ក្រុមអង្គការជាតិ-អន្តរជាតិ ក៏វាយតម្លៃថា ការបោះឆ្នោតចុងក្រោយនេះ ធ្វើឡើងដោយរលូន ហើយពលរដ្ឋជិត ៩០ភាគរយ បានចេញទៅបោះឆ្នោត។
នៅក្នុងការចាត់ថ្នាក់ពីសន្ទស្សន៍សន្តិភាពបានឱ្យដឹងទៀតថា ចំពោះសន្តិភាពនៅតំបន់អាស៊ី-ប៉ាស៊ីហ្វិក (ASIA-PACIFIC) ដែលមាន ១៩ប្រទេស គឺប្រទេសកម្ពុជា បានឈរលេខរៀងទី១៣ គឺលើប្រទេសដែលជាសមាជិកអាស៊ានដូចគ្នាតែចំនួន ៣ប្រទេសប៉ុណ្ណោះ គឺលើប្រទេសមីយ៉ាន់ម៉ា ឬភូមា ប្រទេសថៃ និងប្រទេសហ្វីលីពីន។
អ្នកស្រាវជ្រាវផ្នែកសន្តិភាព លោក ឆាំ ប៊ុនថេត ថ្លែងថា ថ្វីត្បិតកម្ពុជា ត្រូវបានគេដាក់ពិន្ទុថា មានសន្តិភាពល្អប្រសើរជាងឆ្នាំ២០១៦ ប៉ុន្តែលោកយល់ថា សន្តិភាពនៅពេលនេះ ហាក់មិនមានភាពល្អប្រសើរឡើយ ព្រោះតួលេខកើនឡើងសម្រាប់កម្ពុជា ដោយសារប្រទេសមួយចំនួនដែលធ្លាប់មានសន្តិភាពមធ្យមបានកើតឡើងជម្លោះប៉ុណ្ណោះ ទើបធ្វើឱ្យតួលេខកម្ពុជា កើនឡើងបែបនេះ៖ «ដូចជានៅមជ្ឈិមបូព៌ាមួយចំនួន បញ្ហាជម្លោះបានធ្វើឱ្យប្រទេសមានសន្តិភាពគ្រាន់បើ ទៅជាប្រទេសមានជម្លោះ»។
លោក ឆាំ ប៊ុនថេត បន្ថែមថា បើទោះជាកម្ពុជា មានសន្តិភាពអវិជ្ជមាន ឬហៅថា សន្តិភាពគ្មានជម្លោះប្រដាប់អាវុធ ប៉ុន្តែកម្ពុជា នៅតែមិនទាន់មានសន្តិភាពវិជ្ជមាន ព្រោះពលរដ្ឋសព្វថ្ងៃនៅតែទទួលរងភាពភ័យខ្លាច និងការព្រួយបារម្ភចំពោះជីវភាពខ្វះខាត ដែលបញ្ហានេះទាមទារឱ្យរដ្ឋាភិបាល គិតគូរបន្ថែមលើជីវភាពពួកគាត់ និងត្រូវពង្រឹងសន្តិសុខនៅមូលដ្ឋានឱ្យបានប្រសើរជាងមុន។
នៅក្នុងចំណោមប្រទេសទាំង ១៦៣ ដែលត្រូវបានសន្ទស្សន៍សន្តិភាពពិភពលោកយកវាយតម្លៃនៅពេលនេះ គឺបែងចែកប្រទេសដែលមានសន្តិភាពកម្រិតខ្ពស់បំផុតចំនួន ១២ប្រទេស ប្រទេសដែលមានសន្តិភាពកម្រិតខ្ពស់ចំនួន ៤៦ប្រទេស ប្រទេសដែលមានសន្តិភាពកម្រិតមធ្យមមានចំនួន ៧២ ប្រទេសមានសន្តិភាពកម្រិតទាបចំនួន ១៩ និងប្រទេសដែលមានសន្តិភាពកម្រិតទាបបំផុតមានចំនួន១៤។
ចំពោះប្រទេសដែលឈរកំពូលតារាងដែលមានសន្តិភាពបំផុត គឺទី១ ប្រទេសអ៊ីស្លង់ (Iceland) ទី២ ប្រទេសនូវែលហ្សេឡង់ (New Zealand) និងទី៣ ប្រទេសព័រទុយហ្គាល់ (Portugal) រីឯប្រទេសដែលមានសន្តិភាពកម្រិតទាបជាងគេបំផុត គឺប្រទេសស៊ីរី (Syria)។
ដោយឡែកចំពោះប្រទេសមហាអំណាចធំៗមួយចំនួន ដូចជាសហរដ្ឋអាមេរិក ឈរចំណាត់លេខរៀងទី១១៤ ប្រទេសចិន ឈរលេខរៀងទី១១៦ ប្រទេសរុស្ស៊ី លេខរៀងទី១៥១ ស្របពេលប្រទេសកូរ៉េខាងជើង ឈរលេខរៀងទី១៥០ ហើយប្រទេសកូរ៉េខាងត្បូង ឈរលេខរៀងទី៤៧ និងប្រទេសអង់គ្លេស ឈរលេខរៀងទី៤១៕