Clik here to view.
សមាគមរោងចក្រកាត់ដេរនៅកម្ពុជា ហៅកាត់ថា ជីម៉ាក់ (GMAC) ប្រតិកម្មចំពោះសម្ព័ន្ធសហជីពចលនាកម្មករថា បានចោទប្រកាន់រោងចក្រសៅលែន (Southland Cambodia Co., Ltd.) ដោយគ្មាន មូលដ្ឋានច្បាស់លាស់ និងទាមទារឲ្យសហជីពផ្ដល់ភស្តុតាងចំពោះការចោទ ប្រកាន់។ ការប្រតិកម្ម នេះបន្ទាប់ពី សម្ព័ន្ធសហជីពចេញសេចក្ដីថ្លែងការណ៍ចោទប្រកាន់រោងចក្រពីបទរើសអើងសហជីព និងស្នើឲ្យក្រសួងការងារ និងអង្គការពលកម្មអន្តរជាតិខាងការងារ រួមទាំងអ្នកបញ្ជាទិញ ឲ្យអន្តរាគមន៍ដាក់សម្ពាធរោងចក្រដែលបញ្ឈប់ថ្នាក់ដឹកនាំសហជីព ១០នាក់ ដោយសារធ្វើកូដកម្មសុំឈប់សម្រាកបន្ថែមនៅថ្ងៃបោះឆ្នោត។
សមាគមរោងចក្រកាត់ដេរនៅកម្ពុជា បដិសេធថា ការព្យួរការងារកម្មករចំនួន ១០នាក់ដោយរោងចក្រសៅលែន មិនមែនជាការរើសអើងសហជីពឡើយ ប៉ុន្តែជាការអនុវត្តវិធានការវិន័យរបស់និយោជកចំពោះកម្មករដែលអាចប្រព្រឹត្តកំហុសធ្ងន់ដោយសារសកម្មភាពញុះញង់កម្មករតវ៉ា។
សមាគមរោងចក្រកាត់ដេរនៅកម្ពុជា បានចេញសេចក្ដីថ្លែងការណ៍ឆ្លើយតប និងបំភ្លឺទៅសម្ព័ន្ធសហជីពចលនាកម្មករ ថ្ងៃទី៩ មិថុនា ថា ដោយសារកម្មករទាំង ១០នាក់ បានធ្វើសកម្មភាពដើរបិទភ្លើង ញុះញង់កម្មករមិនឲ្យធ្វើការដើម្បីចូលរួមធ្វើកូដកម្មកាលពីថ្ងៃទី២ មិថុនា ទាមទាររោងចក្រផ្ដល់ការឈប់សម្រាកបន្ថែមចំនួនពីរថ្ងៃមុន និងក្រោយថ្ងៃបោះឆ្នោត គឺថ្ងៃទី៣ និងថ្ងៃទី៥ មិថុនា ហើយសុំផ្លាស់ប្ដូរថ្ងៃឈប់សម្រាកព្រះរាជពិធីចម្រើនព្រះជន្មសម្ដេចម៉ែ ដែលនឹងលើកទៅឈប់នៅថ្ងៃទី១៩ មិថុនា និងសុំឲ្យរោងចក្រគិតលុយចំនួន ៥០%។ ដូច្នេះសមាគមរោងចក្រកាត់ដេរ សន្និដ្ឋានថា មិនមែនជាករណីរើសអើងសហជីពប្រឆាំងនឹងការបង្កើតសហជីពឡើយ ប៉ុន្តែជាការអនុវត្តសិទ្ធិរបស់និយោជកក្នុងការព្យួរកិច្ចសន្យារបស់ថ្នាក់ដឹកនាំសហជីព ប្រសិនបើរកឃើញមានកំហុសធ្ងន់ដើម្បីរង់ចាំអនុញ្ញាតលើការបញ្ឈប់ជាមុនពីអធិការកិច្ចការងារ និងស្នើឲ្យក្រសួងការងារចាត់វិធានការចំពោះសហជីពណាដែលមិនគោរពច្បាប់។
ឆ្លើយតបបញ្ហានេះ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា ជីម៉ាក់ ធ្វើនេះមិនខុសនោះទេ ព្រោះជាសមាគមរោងចក្រដែលត្រូវមាននិន្នាការខាងនិយោជកដែលត្រូវតែការពារសមាជិកខ្លួន។ ប៉ុន្តែលោកយល់ថា សមាគមដែលចេញសេចក្ដីថ្លែងការណ៍នេះគឺជាចេតនាមួយមិនបានស្វែងរកដំណោះស្រាយបញ្ចប់វិវាទនោះទេ។
ទោះជាយ៉ាងណា លោក ប៉ាវ ស៊ីណា បញ្ជាក់ថា ក្រសួងការងារដែលបានអន្តរាគមន៍ដល់ថ្នាក់ដឹកនាំសហជីព ១០រូប និងកម្មករមួយរូបបានចូលធ្វើការវិញហើយ នៅថ្ងៃទី១០ មិថុនា៖ «ខ្ញុំមិនគាំទ្រចំពោះសកម្មភាពទាំងឡាយណាជាការធ្វើខុសទេ។ ប៉ុន្តែកម្មករមិនបានប្រព្រឹត្តកំហុសទេ ព្រោះបញ្ហានេះវាមានការរើសអើងយ៉ាងពិតប្រាកដ ព្រោះថា គាត់បានព្យាយាមចងក្រងការចុះបញ្ជីក្នុងរោងចក្រនេះ តាំងពីចុងឆ្នាំ២០១៥ តែអត់ទាន់មានអាជ្ញាប័ណ្ណពីក្រសួងនៅឡើយទេ ដោយសាររោងចក្រតែងប្រើប្រាស់រូបភាពផ្សេងៗក្នុងការទប់ស្កាត់ការចុះបញ្ជី»។
លោក ប៉ាវ ស៊ីណា ក៏បានរងបណ្ដឹងពីរោងចក្រនេះ ចំនួន ២បណ្ដឹងដែរ។ កាលពីឆ្នាំ២០១៣ រោងចក្រនេះបានប្ដឹងលោកពីបទ ញុះញង់ កម្មករឲ្យមានកូដកម្មខុសច្បាប់ និងឆ្នាំ២០១៦ ប្ដឹងពីបទក្លែងបន្លំលិខិតស្នាម និងផ្ដល់ព័ត៌មានមិនពិត ពាក់ព័ន្ធនឹងការបញ្ជូនឈ្មោះបេក្ខជនសហជីពទៅរោងចក្រខុសអក្ខរាវិរុទ្ធ ដែលបញ្ហានេះលោកយល់ថា ជាចេតនារបស់រោងចក្រមិនចង់ឲ្យសហជីពចុះបញ្ជី។
ដើមហេតុដែលនាំឲ្យមានការផ្ទុះតវ៉ារបស់កម្មករកាលពីថ្ងៃទី២ មិថុនា គឺបន្ទាប់ពីភាគីរោងចក្រសៅលែន មិនព្រមអនុញ្ញាតឲ្យពួកគេដែលជាកម្មករបានឈប់សម្រាកមុននិងក្រោយថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់ គឺនៅថ្ងៃទី៤ មិថុនា និងថែមទាំងគំរាមកាត់ប្រាក់ខែរបស់កម្មករ ប្រសិនបើពួកគេមិនអាចវិលត្រឡប់ពីបោះឆ្នោតនៅឯស្រុកកំណើត និងចូលបំពេញការងារទាន់ពេល។ បន្ទាប់ពីកម្មករ បានវិលត្រឡប់មកពីបោះឆ្នោតពួកគេបាននាំគ្នាតវ៉ាបន្តទៀតនៅថ្ងៃទី៦ មិថុនា ទាមទារឲ្យភាគីរោងចក្រកុំកាត់ប្រាក់ឈ្នួលពួកគេនៅថ្ងៃឈប់សម្រាកដើម្បីទៅបោះឆ្នោត។ ក្រោយមកភាគីរោងចក្រ និងសហជីពខ្មែរ ក៏បានសម្រេចកិច្ចព្រមព្រៀងមួយ ដើម្បីឲ្យកម្មករចូលធ្វើការធម្មតានៅថ្ងៃទី៧ មិថុនា ប៉ុន្តែថ្ងៃដដែលស្រាប់តែភាគីរោងចក្រចេញលិខិតព្យួរការងារថ្នាក់ដឹកនាំ និងសកម្មជនសហជីពចំនួន ១០នាក់ ដោយចោទថា ញុះញង់កម្មករ។
ថ្វីបើយ៉ាងនេះក្ដី ជីម៉ាក់ ក៏បានសង្កត់ធ្ងន់នៅក្នុងចេញសេចក្ដីថ្លែងការណ៍របស់ខ្លួនដែរថា សម្ព័ន្ធសហជីពចលនាកម្មករនៅក្នុងរោងចក្រសៅលែន ស្ថិតនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ជាសហជីពដែលពុំមានបញ្ជីការនៅឡើយ ដែលមានន័យថា សកម្មភាពដែលបានធ្វើឡើងក្នុងរោងចក្រមិនស្របតាមច្បាប់ស្ដីពីសហជីពទេ។
សំណុំរឿងនេះ ត្រូវបានមន្ត្រីក្រសួងការងារចេញលិខិតកោះហៅភាគីរោងចក្រសៅលែន ដើម្បីទៅពិភាក្សាដោះស្រាយជុំវិញការតវ៉ារបស់កម្មករក្នុងរោងចក្រនេះ នៅថ្ងៃចន្ទ ទី១២ ខែមិថុនា ខាងមុខ នៅឯទីស្ដីការក្រសួង៕