លោក កឹម សុខា ប្រធានគណបក្សសង្គ្រោះជាតិ អះអាងថា គណបក្សសង្គ្រោះជាតិ បានកំណត់នៅក្នុងគោលដៅរបស់ខ្លួនដាក់យុវជនឲ្យបានច្រើនក្នុងការប្រកួតប្រជែងបោះឆ្នោតជ្រើសរើសតំណាងរាស្ត្រឆ្នាំ២០១៨ ខាងមុខ។ ការអះអាងនេះ ក្រោយពេលបេក្ខជនមេឃុំវ័យក្មេងរបស់គណបក្សនេះដណ្ដើមបានជ័យជំនះលើមេឃុំវ័យចំណាស់របស់គណបក្សកាន់អំណាចក្នុងការបោះឆ្នោតកាលពីពេលថ្មីៗនេះ។
លោក កឹម សុខា ប្រធានគណបក្សសង្គ្រោះជាតិ ឲ្យដឹងថា យុទ្ធសាស្ត្រជំរុញឲ្យយុវជនទៅជាអ្នកដឹកនាំទទួលបានជោគជ័យក្នុងការបោះឆ្នោតជ្រើសរើសប្រឹក្សាឃុំ-សង្កាត់ ដូច្នេះការបោះឆ្នោតឆ្នាំ២០១៨ ខាងមុខ គណបក្សនឹងពិនិត្យលទ្ធភាពជំរុញថែមទៀត។ ប្រធានគណបក្សប្រឆាំងរូបនេះមិនទាន់ឲ្យដឹងពីចំនួនយុវជនដែលគណបក្សគ្រោងដាក់បញ្ចូលទៅក្នុងសមាសភាពថ្នាក់ដឹកនាំនៅក្នុងគណបក្សនៅឡើយទេ៖ «យើងបានកំណត់ក្នុងគោលដៅគណបក្សសង្រ្គោះជាតិថា ជំរុញនឹងលើកទឹកចិត្តឲ្យយុវជនចូលឲ្យបានជាអ្នកដឹកនាំឲ្យបានច្រើន ហើយយុទ្ធសាស្ត្រហ្នឹងឃើញថា យើងទទួលបានជោគជ័យក្នុងការបោះឆ្នោតឃុំ-សង្កាត់ ដោយសារសកម្មភាពគាត់ល្អ ហើយពលរដ្ឋក៏ស្រលាញ់ចូលចិត្ត»។
លោក កឹម សុខា និយាយដូច្នេះ ក្រោយពេលជួបអនាគតមេឃុំ-សង្កាត់ របស់គណបក្សសង្គ្រោះជាតិ និងអ្នកគាំទ្ររបស់ខ្លួនប្រមាណ ២.០០០នាក់ នៅសង្កាត់គីឡូម៉ែត្រលេខ៦ ខណ្ឌឫស្សីកែវ ក្រុងភ្នំពេញ ថ្ងៃទី១០ ខែមិថុនា។
ប្រធានអង្គការអប់រំយុវជនដើម្បីអភិវឌ្ឍន៍ និងសន្តិភាព (YEDP) លោក បូ ពៅ ស្វាគមន៍គណបក្សនយោបាយណាដែលមានកម្មវិធីយកយុវជនដាក់បញ្ចូលក្នុងសមាសភាពជាអ្នកដឹកនាំ ព្រោះលោកយល់ថា យុវជនមានភាពរហ័សរហួន ទទួលបានចំណេះដឹងពីប្រទេសជឿនលឿន ជាអ្នកស្រលាញ់សេរីភាព និងប្រជាធិបតេយ្យជាដើម។ ប៉ុន្តែលោកព្រួយបារម្ភថា បើយុវជនគ្មានជំហរច្បាស់លាស់ មិនបានសិក្សាពីកំហុសរបស់ខ្លួន និងពង្រឹងចំណេះដឹងរបស់ខ្លួននោះទេ យុវជនអាចក្លាយទៅជាឧបករណ៍នយោបាយ ឬកម្មករនយោបាយដែលគេប្រើប្រាស់រួចហើយបោះបង់ចោល៖ «ឲ្យគាត់ (យុវជន) ធ្វើជាយុវជនខ្មែរមិនមែនជាយុវជនរបស់គណបក្សនយោបាយណាមួយទេ បម្រើផលប្រយោជន៍ទៅដល់សង្គមជាតិ»។
លទ្ធផលបឋមរបស់ គ.ជ.ប បង្ហាញថា គណបក្សសង្គ្រោះជាតិ ឈ្នះបានឃុំ-សង្កាត់ជិត ៥០០ នៃឃុំ-សង្កាត់ជាង ១.៦០០ទូទាំងប្រទេស បេក្ខភាពមេឃុំ-ចៅសង្កាត់វ័យក្មេងរបស់គណបក្សសង្គ្រោះជាតិ ដែលចូលរួមប្រកួតប្រជែងគឺសុទ្ធតែទទួលបានការគាំទ្រពីអ្នកបោះឆ្នោត។ ក្នុងនោះមាន បេក្ខភាពមេឃុំអូរចារ កញ្ញា ស៊ិន ចាន់ពៅរ៉ូហ្ស៊េត នៅខេត្តបាត់ដំបង និងបេក្ខជនចៅសង្កាត់សាលាកំរើក ក្រុងសៀមរាប ខេត្តសៀមរាប យុវជន ជិន សុខង៉េង។
អ្នកវិភាគនយោបាយ លោកបណ្ឌិត ឡៅ ម៉ុងហៃ យល់ថា ការចាប់យកយុវជនដាក់ជាកម្លាំងសំខាន់របស់គណបក្សនេះជាការវិវឌ្ឍន៍វិជ្ជមាននៅក្នុងសង្គម។ លោកសង្កេតឃើញថា យុវជនសព្វថ្ងៃមានចំណេះដឹង មានបទពិសោធន៍ សមត្ថភាព និងបានចូលរួមក្នុងការងារសង្គមបានច្រើន។
ក្នុងចំណោមតំណាងរាស្ត្រគណបក្សសង្គ្រោះជាតិ ទាំង ៥៥រូប ដែលចូលអង្គុយធ្វើការនៅក្នុងសភាមិនសូវឃើញតំណាងរាស្ត្រជាយុវជនច្រើននោះទេ ហើយតំណាងរាស្ត្រវ័យក្មេងក៏មិនសូវឃើញបញ្ចេញមតិយោបល់បានច្រើនដូចតំណាងរាស្ត្រដែលអាយុច្រើននៅពេលមានការជជែកដេញដោលគ្នាម្ដងៗ។ ជំរឿនឆ្នាំ២០០៨ បង្ហាញថា យុវជនកម្ពុជា មានចំនួន ៣៣% នៃពលរដ្ឋសរុប។
តាមគោលនយោបាយជាតិស្ដីពីការអភិវឌ្ឍយុវជនកម្ពុជា ឆ្នាំ២០១១ ឲ្យដឹងថា យុវជនជាភ្នាក់ងារដ៏សំខាន់សម្រាប់ការងារផ្លាស់ប្ដូរសង្គមឲ្យមានការអភិវឌ្ឍ និងប្រជាធិបតេយ្យ៕