គណៈកម្មការរៀបចំការបោះឆ្នោតខេត្តរតនគិរី កោះហៅអ្នកសង្កេតការណ៍បោះឆ្នោតគណបក្សប្រជាជនកម្ពុជា និងសកម្មជនបក្សសង្គ្រោះជាតិ មកឆ្លើយបំភ្លឺទាក់ទិនពាក្យប្ដឹងចោទប្រកាន់រឿងរំខានការិយាល័យបោះឆ្នោត។ គណៈកម្មការរៀបចំការបោះឆ្នោតសង្កាត់បឹងកន្សែង បានបញ្ជូនសំណុំរឿងនេះទៅគណៈកម្មការរៀបចំការបោះឆ្នោតខេត្តដោះស្រាយបន្ត កាលពីថ្ងៃទី៧ ខែមិថុនា។
មន្ត្រីសេវាកម្មច្បាប់ និងវិវាទកម្មនៃគណៈកម្មការរៀបចំការបោះឆ្នោតខេត្តរតនគិរី សម្រេចមិនចាត់ការលើបណ្ដឹងរបស់អ្នកសង្កេតការណ៍បោះឆ្នោតបក្សប្រជាជនកម្ពុជា ដែលប្ដឹងចោទបេក្ខជនឈរឈ្មោះបោះឆ្នោតបក្សសង្គ្រោះជាតិ ពីបទរំខានការបោះឆ្នោតក្នុងអំឡុងពេលបោះឆ្នោតក្រុមប្រឹក្សាឃុំ-សង្កាត់ កាលពីថ្ងៃទី៤ ខែមិថុនា។ ការសម្រេចនេះធ្វើឡើងនៅថ្ងៃទី៩ ខែមិថុនា បន្ទាប់ពីមន្ត្រីសេវាកម្មច្បាប់បានកោះហៅភាគីចុងចោទ និងដើមចោទឲ្យឆ្លើយបំភ្លឺពីករណីចោទប្រកាន់នេះ។
អនុប្រធានគណៈកម្មការរៀបចំការបោះឆ្នោតខេត្តរតនគិរី លោក ធូ រុង បញ្ជាក់ថា មន្ត្រីសេវាកម្មច្បាប់រកមិនឃើញអង្គហេតុជាក់លាក់ដែលដើមបណ្ដឹងប្ដឹងចោទ មានចែងក្នុងបទបញ្ជា និងនីតិវិធីរបស់គណៈកម្មាធិការជាតិរៀបចំការបោះឆ្នោតនោះឡើយ។ លោកថា បានធ្វើកំណត់ហេតុឆ្លើយបំភ្លឺរបស់ភាគីទាំងពីរ ហើយសម្រេចបញ្ចប់នីតិវិធីដោះស្រាយបណ្ដឹងនេះ៖ «បើមានចែងក្នុងនីតិវិធីជំពូកណាមួយយើងនឹងបើកសវនាការ តែវាអត់មានចំណុចហ្នឹង»។
គណៈកម្មការរៀបចំការបោះឆ្នោតបឹងកន្សែង សម្រេចបញ្ជូនពាក្យប្ដឹងរបស់ដើមចោទគឺលោក គឹម បូរ៉ាន់ ភ្នាក់ងារសង្កេតការណ៍បក្សប្រជាជនកម្ពុជា ដែលបានប្ដឹងសកម្មជនបក្សសង្គ្រោះជាតិថា បានយកបាយចូលទៅឲ្យអ្នកសង្កេតការណ៍បោះឆ្នោតគណបក្សសង្គ្រោះជាតិ ក្នុងការិយាល័យបោះឆ្នោតលេខ ០០៥៨ ដោយគ្មានការអនុញ្ញាត ជាហេតុធ្វើឲ្យរំខានក្រុមការងារបោះឆ្នោត។
ករណីនេះ គណៈកម្មការរៀបចំបោះឆ្នោតសង្កាត់បឹងកន្សែង កាលពីថ្ងៃទី៧ ខែមិថុនា មិនអាចសម្របសម្រួលឲ្យភាគីទាំងពីសះជាគ្នាបាន បើទោះបីភាគីចុងចោទសារភាពថា មិនមានចេតនារំខានការិយាល័យបោះឆ្នោតនោះទេ ហើយសុំឲ្យដើមចោទអនុគ្រោះចំពោះបញ្ហានេះក្ដី។
សកម្មជនបក្សសង្គ្រោះជាតិ លោក ស ជ្រឿន បញ្ជាក់សាជាថ្មីថា លោកយកអាហារទៅឲ្យអ្នកសង្កេតការណ៍បោះឆ្នោត និងមិនបានរំខានអ្វីនោះទេ។ លោកថា ការសម្រេចរបស់គណៈកម្មការបោះឆ្នោតខេត្តបានផ្ដល់យុត្តិធម៌ចំពោះរូបលោក៖ «កន្លែងខ្ញុំបានធ្វើគឺខ្ញុំសារភាពជូនគាត់ត្រង់គ្មានកាឡៃពាក្យ អ៊ីចឹងគណៈកម្មការហ្នឹងគាត់កាត់ត្រឹមត្រូវល្អ»។
ចំណែកដើមចោទ លោក គឹម បូរ៉ាន់ បញ្ជាក់ថា គោលបំណងរបស់លោកដែលដាក់ពាក្យប្ដឹងករណីនេះ គឺដោយយល់ឃើញថា បេក្ខជនបក្សប្រឆាំងចូលទៅក្នុងការិយាល័យបោះឆ្នោតគឺជាភាពមិនប្រក្រតីក្នុងថ្ងៃបោះឆ្នោត។ លោកថា ក្នុងឋានៈជាភ្នាក់ងារសង្កេតការណ៍បោះឆ្នោតលោកត្រូវតែដាក់ពាក្យប្ដឹងចៀសវាងការបង្កបរិយាកាសមិនល្អក្នុងថ្ងៃបោះឆ្នោត៖ «ចូលទៅក្នុងការិយាល័យបោះឆ្នោតខ្ញុំគិតថា ជាទង្វើខុសច្បាប់ បើធ្វើបែបហ្នឹងមិនខុសច្បាប់ អាហ្នឹងជាសិទ្ធិ គ.ជ.ប គាត់សម្រេចទៅ»។
លទ្ធផលបឋមរបស់គណៈកម្មការជាតិរៀបចំការបោះឆ្នោតខេត្តរតនគិរី ឲ្យដឹងថា គណបក្សប្រជាជនឈ្នះចំនួន ៤៨ឃុំ-សង្កាត់ ចំណែកគណបក្សសង្គ្រោះជាតិ ឈ្នះឃុំ-សង្កាត់ចំនួនពីរក្នុងអាណត្តិបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ទើបកន្លងទៅនេះ។ ដោយឡែកនៅរសៀលថ្ងៃទី៩ ខែមិថុនា គណបក្សសង្គ្រោះជាតិ ខេត្តរតនគិរី បានដាក់ពាក្យបណ្ដឹងសុំឲ្យរាប់សន្លឹកឆ្នោតឡើងវិញនៅឃុំ-សង្កាត់ចំនួនពីរ គឺសង្កាត់បឹងកន្សែង និងឃុំចាអ៊ុង៕