សាលាក្តីខ្មែរក្រហម នឹងបើកសវនាការធ្វើសេចក្ដីសន្និដ្ឋានផ្ទាល់មាត់បិទបញ្ចប់កិច្ចពិភាក្សាដេញដោលលើសំណុំរឿង ០០២/០២ ប្រឆាំងនឹងលោក ខៀវ សំផន និង នួន ជា ចាប់ពីថ្ងៃទី១៣ ដល់ថ្ងៃទី២៣ ខែមិថុនា ឆ្នាំ២០១៧។
សហមេធាវីនាំមុខតំណាងដើមបណ្តឹងរដ្ឋប្បវេណី នឹងធ្វើសេចក្ដីសន្និដ្ឋានផ្ទាល់មាត់មួយថ្ងៃដំបូង បន្ទាប់មកដល់វេនខាងសហព្រះរាជអាជ្ញា។ ចុងក្រោយគេ គឺខាងក្រុមមេធាវីការពារក្តីរបស់លោក ខៀវ សំផន និង នួន ជា។
ក្នុងសំណុំរឿង ០០២/០២ លោក ខៀវ សំផន និង នួន ជា ជាប់ចោទពីបទអំពើប្រល័យពូជសាសន៍ប្រឆាំងនឹងជនជាតិចាម និងជនជាតិវៀតណាម ការរៀបអាពាហ៍ពិពាហ៍ដោយបង្ខំ និងការរំលោភសេពសន្ថវៈ ការបោសម្អាតផ្ទៃក្នុង មន្ទីរសន្តិសុខ ស-២១ មន្ទីរសន្តិសុខក្រាំងតាចាន់ មន្ទីរសន្តិសុខអូរកន្សែង និងមន្ទីរសន្តិសុខភ្នំក្រោល ការកំណត់គោលដៅមកលើអតីតមន្ត្រីរបបសាធារណរដ្ឋខ្មែរ និងបទឧក្រិដ្ឋដែលប្រព្រឹត្តនៅការដ្ឋានសាងសង់ទំនប់ ១ មករា ការដ្ឋានសាងសង់ព្រលានយន្តហោះ កំពង់ឆ្នាំង និងការដ្ឋានលើកទំនប់ត្រពាំងថ្ម និងសហករណ៍ត្រាំកក់។
រហូតមកដល់ពេលនេះ សាលាក្ដីខ្មែរក្រហមបើកដំណើរការកាត់ក្ដីអស់រយៈពេលជាង ១១ឆ្នាំហើយ និងចំណាយថវិកាអស់ ៣០០លានដុល្លារអាមេរិក។ ជាលទ្ធផល សាលាក្ដីនេះបានកាត់ទោសឲ្យអតីតមេគុកទួលស្លែង លោក កាំង ហ្កេកអ៊ាវ ហៅ ឌុច ក្នុងសំណុំរឿង ០០១ ឲ្យជាប់ពន្ធនាគារអស់មួយជីវិត។ អតីតមេដឹកនាំជាន់ខ្ពស់ខ្មែរក្រហមពីររូប គឺលោក ខៀវ សំផន និង នួន ជា ក្នុងសំណុំរឿង ០០២/០២ នេះ ក៏ត្រូវបានកាត់ទោសឲ្យជាប់ពន្ធនាគារអស់មួយជីវិតផងដែរ។
ចំណែកការស៊ើបអង្កេតលើសំណុំរឿងពីរផ្សេងទៀត គឺសំណុំរឿង ០០៣ ដែលមានជនត្រូវចោទ មាស មុត និងសំណុំរឿង ០០៤ ដែលមានជនត្រូវចោទ អោ អាន និង យឹម ទិត្យ ត្រូវបានបិទបញ្ចប់នៅខែធ្នូ ឆ្នាំ២០១៦។ ប៉ុន្តែនីតិវិធីបន្តក្នុងសំណុំរឿងទាំងពីរនេះ នៅមិនទាន់បិទបញ្ចប់នៅឡើយទេ លើកលែងតែករណីអតីតកម្មាភិបាលខ្មែរក្រហម អ្នកស្រី អ៊ឹម ចែម ដែលត្រូវបានចោទប្រកាន់ក្នុងសំណុំរឿង ០០៤/០១ ត្រូវបានសាលាក្តីសម្រេចលើកលែងការចោទប្រកាន់កាលពីខែកុម្ភៈ ឆ្នាំ២០១៧៕