ប្រធានគណបក្សខ្មែររួបរួមជាតិ លោក ញឹក ប៊ុនឆៃ ដែលលទ្ធផលបោះឆ្នោតបឋមបង្ហាញថា គណបក្សលោកបានឈ្នះឃុំមួយក្នុងខេត្តបន្ទាយមានជ័យ ឲ្យដឹងថា មានអ្នកបង្កើតព័ត៌មានក្លែងក្លាយលាបពណ៌ថា លោកទៅចូលរួមជាមួយគណបក្សសង្គ្រោះជាតិ។ ប៉ុន្តែទាំងលោក ញឹក ប៊ុនឆៃ និងគណបក្សសង្គ្រោះជាតិ ច្រានចោលចំពោះព័ត៌មាននេះ។
ការលើកឡើងរបស់លោក ញឹក ប៊ុនឆៃ ដូចនេះ បន្ទាប់ពីលេចឮព័ត៌មានថា មានសមត្ថកិច្ចចម្រុះទៅព័ទ្ធផ្ទះរបស់លោកនៅសង្កាត់ជ្រោយចង្វារ ខណ្ឌជ្រោយចង្វារ ក្រុងភ្នំពេញ កាលពីថ្ងៃទី៦ និងទី៧ ខែមិថុនា។
លោក ញឹក ប៊ុនឆៃ ប្រាប់ថា មានការភណ្ឌច្រឡំតិចតួចក្នុងរយៈពេលប៉ុន្មានថ្ងៃនេះ ប៉ុន្តែលោកបានដោះស្រាយរួចហើយ។ លោកពន្យល់ថា ការភណ្ឌច្រឡំនោះ មានអ្នកចោទប្រកាន់ថា លោកទៅចូលរួមជាមួយគណបក្សសង្គ្រោះជាតិ។ ប៉ុន្តែលោកថា លោកបានជូនដំណឹងទៅលោក ហ៊ុន សែន រួចរាល់ហើយពីព័ត៌មានក្លែងក្លាយនេះ៖ «ខ្ញុំបានស្រាយបំភ្លឺសម្ដេចតេជោហើយ មិនមានរឿងអ៊ីចឹងទេ គ្រាន់ថាមានការភណ្ឌប្រឡំអីតិចតួច តែឥឡូវចប់សព្វគ្រប់ហើយ»។
ខណៈដែលលោក ញឹក ប៊ុនឆៃ អះអាងថា មិនបានចូលរួមជាមួយគណបក្សសង្គ្រោះជាតិ លោកក៏បញ្ជាក់ថា មិនបានយកគណបក្សនយោបាយណាមួយ ឬខ្មែរណាមួយធ្វើជាសត្រូវទេ។ លោកយល់ថា ការបង្កើតព័ត៌មានបែបនេះ ព្រោះមានអ្នកច្រណែនឃើញគណបក្សរបស់លោកឈ្នះបានឃុំមួយក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីពេលថ្មីៗនេះ។
ទាក់ទងរឿងនេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថា លោកមិនដឹងរឿងនេះទេ ហើយពីមុនក៏គ្មានការចរចាណាមួយរវាងលោក ញឹក ប៊ុនឆៃ ជាមួយគណបក្សសង្គ្រោះជាតិ ស្តីពីការរួបរួមគ្នានោះដែរ។
ចំណែកគណបក្សប្រជាជនកម្ពុជា ដែលធ្លាប់មានទំនាក់ទំនងល្អជាមួយលោក ញឹក ប៊ុនឆៃ ក៏មិនដឹងរឿងនេះដែរ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន មិនជឿថា លោក ញឹក ប៊ុនឆៃ សម្រេចចិត្តបោះបង់អនុស្សាវរីយ៍ជាមួយគណបក្សប្រជាជនទៅរួមរស់ជាមួយគណបក្សសង្គ្រោះជាតិឡើយ។ ទោះយ៉ាងនេះក្តី បើមានការរួបរួមរវាងគណបក្សរបស់លោក ញឹក ប៊ុនឆៃ ជាមួយគណបក្សសង្គ្រោះជាតិ មែន លោក សុខ ឥសាន យល់ថា ការបូកបញ្ចូលនៃគណបក្សទាំងពីរក៏មិនអាចផ្ដួលគណបក្សកាន់អំណាចបានដែរ៖ «មិនបានទទួលព័ត៌មានហ្នឹងទេ និយាយឲ្យស្មោះត្រង់ បើសិនជាកើតឡើងមែននេះជាសិទ្ធិនយោបាយរបស់លោក ញឹក ប៊ុនឆៃ ទេ»។
លទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ បង្ហាញថា ក្នុងចំណោមគណបក្សតូចៗដែលចូលរួមប្រកួតប្រជែងមានតែគណបក្សខ្មែររួបរួមជាតិ ឈ្នះបានឃុំមួយក្នុងខេត្តបន្ទាយមានជ័យ។
អាស៊ីសេរី មិនអាចសុំការបំភ្លឺពីអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ ទាក់ទងព័ត៌មានថា មានកម្លាំងសមត្ថកិច្ចព័ទ្ធផ្ទះលោក ញឹក ប៊ុនឆៃ។ រីឯអ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ថា លោកមិនបានដឹងពីករណីនេះទេ។
លោក ញឹក ប៊ុនឆៃ អតីតមេទ័ព និងជាមន្ត្រីជំនិតរបស់សម្ដេចក្រុមព្រះ នរោត្ដម រណឫទ្ធិ កាលពីគណបក្សហ៊្វុនស៊ិនប៉ិច នៅដឹកនាំរដ្ឋាភិបាល។ អ្នកទាំងពីរបានបែកបាក់គ្នាបន្ទាប់ពីសម្ដេចក្រុមព្រះត្រូវបានទម្លាក់ចេញពីតំណែងប្រធានគណបក្សហ៊្វុនស៊ិនប៉ិច។ ប៉ុន្តែក្រោយមានការសម្របសម្រួលពីលោក ហ៊ុន សែន លោក ញឹក ប៊ុនឆៃ និងសម្ដេចក្រុមព្រះ អ្នកទាំង២បានរួមរស់ក្រោមដំបូលគណបក្សហ៊្វុនស៊ិនប៉ិច ឡើងវិញ។ ទីបំផុតកាលពីចុងឆ្នាំ២០១៦ លោក ញឹក ប៊ុនឆៃ សម្រេចចិត្តចាកចេញចោលសម្ដេចក្រុមព្រះ មកបង្កើតគណបក្សថ្មីឈ្មោះ គណបក្សខ្មែររួបរួមជាតិ។
កាលពីអាណត្តិទី៤ រដ្ឋាភិបាលដឹកនាំដោយលោក ហ៊ុន សែន ធ្លាប់តែងតាំងលោក ញឹក ប៊ុនឆៃ ជាឧបនាយករដ្ឋមន្ត្រី ប៉ុន្តែនៅពេលនេះមិនឃើញលោកមានតួនាទីក្នុងរដ្ឋាភិបាលទៀតទេ។ លោក ញឹក ប៊ុនឆៃ ក៏មិនធ្លាប់បង្ហាញសារនយោបាយម្ដងណាឡើយថា លោកចង់ចូលរួមជាមួយគណបក្សសង្គ្រោះជាតិ នោះដែរ៕