Clik here to view.
សហគមន៍ផ្លូវរថភ្លើងនៅក្រុងប៉ោយប៉ែត ខេត្តបន្ទាយមានជ័យ ចំនួន ៩០គ្រួសារ នៅព្រឹកថ្ងៃទី៧ មិថុនា ចេញសេចក្ដីថ្លែងការណ៍ថ្កោលទោសអាជ្ញាធរក្រុងប៉ោយប៉ែត និងមន្ត្រីពាក់ព័ន្ធ ថាពុំបានបំពេញតួនាទីបម្រើពលរដ្ឋ ដើម្បីដោះស្រាយបញ្ហាដែលពួកគាត់ប្រឈមពីការបណ្ដេញចេញដោយសារគម្រោងអភិវឌ្ឍន៍ផ្លូវរថភ្លើងឡើយ។
សហគមន៍ដីធ្លីនៅក្រុងប៉ោយប៉ែត លើកឡើងថា កន្លងទៅ អាជ្ញាធរដែនដី និងមន្ត្រីអន្តរក្រសួង ចែកប័ណ្ណកម្មសិទ្ធិដីធ្លីជូនពលរដ្ឋបានមួយចំនួនតូច ចំណែកពួកគាត់ចំនួន ៩០គ្រួសារ ពុំបានដោះស្រាយសំណងប៉ះពាល់ពីគម្រោងអភិវឌ្ឍន៍ផ្លូវរថភ្លើងនៅឡើយ។
តំណាងពលរដ្ឋម្នាក់រស់នៅសង្កាត់ផ្សារកណ្ដាល ក្រុងប៉ោយប៉ែត លោក សែន សុផុន ឲ្យដឹងនៅថ្ងៃទី៧ មិថុនា ថា មូលហេតុដែលពួកគាត់ចេញសេចក្ដីថ្លែងការណ៍ថ្កោលទោសអាជ្ញាធរក្រុងប៉ោយប៉ែត ដោយសារពួកគាត់តវ៉ាឲ្យអាជ្ញាធរក្រុងនេះ និងមន្ត្រីពាក់ព័ន្ធ ដោះស្រាយចំនួន ៨១លើកមកហើយ តែពុំមានដំណោះស្រាយ៖ «ពួកខ្ញុំនិយាយដាច់ខាតតែម្ដង ប្រសិនបើអាជ្ញាធរមិនដោះស្រាយឲ្យពួកខ្ញុំទេ គឺពួកខ្ញុំនឹងនាំគ្នាតវ៉ារហូត ព្រោះអីពួកខ្ញុំមិនអាចរស់នៅតាមផ្លូវរថភ្លើងបានទៀតទេ ព្រោះផ្ទះរបស់ខ្ញុំនៅកៀកផ្លូវរថភ្លើងខ្លាំងពេក»។
អាស៊ីសេរី ពុំអាចទាក់ទងអភិបាលរងក្រុងប៉ោយប៉ែត ទទួលបន្ទុកដោះស្រាយវិវាទដីធ្លី លោក ម៉ែន សុភ័ណ ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី៧ មិថុនា ដោយសារទូរស័ព្ទរបស់លោកពុំមានអ្នកទទួល។
កន្លងទៅ លោក ម៉ែន សុភ័ណ មានប្រសាសន៍ថា អាជ្ញាធរក្រុងប៉ោយប៉ែត បានបញ្ជូនពាក្យបណ្ដឹងរបស់ពលរដ្ឋដាក់ទៅអន្តរក្រសួង ដើម្បីពិនិត្យបញ្ហានេះរួចមកហើយ តែមិនទាន់មានការឆ្លើយតបពីមន្ត្រីអន្តរក្រសួងនៅឡើយ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា សេចក្ដីថ្លែងការណ៍របស់ពលរដ្ឋ គឺជាការតស៊ូមតិតាមលទ្ធិប្រជាធិបតេយ្យ ដោយពុំមានអ្វីខុសច្បាប់នោះទេ។ លោកបន្ថែមថា នេះសាជាថ្មីមួយទៀតដែលពលរដ្ឋទទូចចង់ឲ្យអាជ្ញាធរដោះស្រាយសំណងជូនពួកគាត់ឲ្យបានឆាប់៖ «សំឡេងដែលពួកគាត់ប្រើប្រាស់ស្រែកដង្ហោយហៅនេះ ប្រើដូចជាបទចម្រៀងដ៏ពីរោះមួយបទទៅវិញទេ។ ដូច្នេះអាជ្ញាធរក្រុងប៉ោយប៉ែត ចាប់ផ្ដើមគិត និងពិចារណា ដើម្បីបម្រើប្រជាពលរដ្ឋនៅក្នុងមុខងាររបស់ខ្លួន»។
ខ្លឹមសារសំខាន់ក្នុងសេចក្ដីថ្លែងការណ៍នោះ ពលរដ្ឋស្នើឲ្យរដ្ឋាភិបាលស៊ើបអង្កេតទៅលើមន្ត្រីទទួលបន្ទុកដោះស្រាយផលប៉ះពាល់ពីគម្រោងអភិវឌ្ឍន៍ផ្លូវរថភ្លើងនៅក្រុងប៉ោយប៉ែត ដើម្បីកុំឲ្យប្រព្រឹត្តអំពើពុករលួយ និងស្នើឲ្យអាជ្ញាធរពាក់ព័ន្ធ ដោះស្រាយសំណងប៉ះពាល់ជូនពួកគាត់ទៅតាមច្បាប់ និងដោយតម្លាភាព ដើម្បីយកប្រាក់ទៅទិញដីសង់ទីលំនៅថ្មីរស់នៅឲ្យបានសមរម្យ៕
