មន្ត្រីរៀបចំការបោះឆ្នោតខេត្តស្វាយរៀង និងខេត្តព្រៃវែង អះអាងថា ប្រជាពលរដ្ឋជាច្រើនម៉ឺននាក់នៅក្នុងខេត្តទាំងពីរ បានខកខានមិនបានទៅបោះឆ្នោត ដោយសារបញ្ហាចំណាកស្រុក និងបញ្ហាបន្ទាប់បន្សំមួយចំនួនទៀត។ ទោះជាយ៉ាងណា មន្ត្រីរៀបចំការបោះឆ្នោតវាយតម្លៃថា ស្ថានភាពទូទៅនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅខេត្តទាំងពីរ មានភាពល្អប្រសើរជាងអាណត្តិមុនៗ ទោះបីជាមានភាពមិនប្រក្រតីខ្លះៗកើតឡើងក្តី។
បន្ទាប់ពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ បានប្រព្រឹត្តទៅរួចរាល់ គេបានពិនិត្យឃើញថា នៅតាមបណ្ដាខេត្តមួយចំនួនដែលមានព្រំដែនជាប់នឹងប្រទេសវៀតណាម គឺប្រជាពលរដ្ឋជាច្រើនម៉ឺននាក់ដែលបានចុះឈ្មោះនៅក្នុងបញ្ជីបោះឆ្នោតថ្មីរបស់ គ.ជ.ប រួចហើយ មិនបានទៅបោះឆ្នោតទេ។ ការខកខានមិនបានទៅបោះឆ្នោតរបស់ពលរដ្ឋមួយចំនួននេះ ត្រូវបានមន្ត្រីគណៈកម្មការរៀបចំការបោះឆ្នោត សន្និដ្ឋានទៅលើមូលហេតុផ្សេងៗពីគ្នា។
ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តស្វាយរៀង គឺលោក មាស ឈី។ លោកមានប្រសាសន៍ថា នៅក្នុងខេត្តរបស់លោក គឺប្រជាពលរដ្ឋដែលបានទៅចុះឈ្មោះក្នុងបញ្ជីបោះឆ្នោតថ្មីចំនួនជាង ៣សែន ២ម៉ឺន ៨ពាន់នាក់ (៣២៨.១៦៦នាក់) ប៉ុន្តែមានប្រជាពលរដ្ឋប្រមាណ ៩០% (៩០,៥៥%) ប៉ុណ្ណោះដែលបានទៅបោះឆ្នោត។
មន្ត្រីរៀបចំការបោះឆ្នោតដដែលសន្និដ្ឋានថា បញ្ហាដែលពលរដ្ឋទៅបោះឆ្នោតមិនគ្រប់ចំនួននោះ អាចបណ្ដាលមកពីពលរដ្ឋខ្លះជាពលករចំណាកស្រុក និងដោយសារពុំមានការបង្កលក្ខណៈងាយស្រួលជូនអ្នកបោះឆ្នោត៖ «ខ្ញុំយកព័ត៌មាន ពេលខ្លះគាត់ថាខ្ជិល ហើយគាត់រវល់។ គាត់ខ្ជិល គាត់ថាគាត់រវល់។ មួយទៀតរោងចក្រអីវិន គឺមិនបានបង្កលក្ខណៈងាយស្រួល និងមួយទៀតចំណាកស្រុក»។
នៅខេត្តស្វាយរៀង មានឃុំ-សង្កាត់ចំនួន៨០ ហើយមានគណបក្សនយោបាយចំនួន៨ ចូលរួមប្រកួតប្រជែង ប៉ុន្តែលទ្ធផលក្រៅផ្លូវការបង្ហាញថា មានតែគណបក្សសង្គ្រោះជាតិ មួយប៉ុណ្ណោះដែលបានដណ្ដើមជ័យជម្នះចំនួន ៨ឃុំ-សង្កាត់ និងដណ្ដើមអាសនៈស្ទើរគ្រប់ឃុំ-សង្កាត់ពីគណបក្សប្រជាជនកម្ពុជា ដោយមានតែសង្កាត់ស្វាយតឿ ក្រុងស្វាយរៀង មួយប៉ុណ្ណោះដែលគណបក្សប្រជាជនកម្ពុជា ឈ្នះផ្តាច់មុខ។
ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តស្វាយរៀង ឲ្យដឹងដែរថា ចំពោះពាក្យបណ្ដឹងវិញ គឺមានពីរករណីដែលប្ដឹងដោយគណបក្សប្រជាជនកម្ពុជា ទាមទារឲ្យរាប់សន្លឹកឆ្នោតឡើងវិញនៅឃុំចំនួនពីរ គឺឃុំដូង ស្ថិតក្នុងស្រុករមាសហែក និងឃុំស្វាយធំ នៅស្រុកស្វាយជ្រុំ។
រីឯប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តព្រៃវែង គឺលោក វង្ស សោភ័ណ។ លោកមានប្រសាសន៍ថា នៅខេត្តរបស់លោកគឺមានប្រជាពលរដ្ឋចុះឈ្មោះបោះឆ្នោតចំនួនជាង ៦២ម៉ឺននាក់ (៦២.៩៩៥នាក់) ប៉ុន្តែពេលបោះឆ្នោត គឺមានប្រជាពលរដ្ឋប្រមាណ ៨៨% (៨៨,៥៤%) ប៉ុណ្ណោះដែលបានទៅបោះឆ្នោត។ លោកសន្និដ្ឋានថា មូលហេតុចម្បងនៃការខកខានពុំបានទៅបោះឆ្នោតគ្រប់ចំនួននេះ គឺដោយសារបញ្ហាចំណាកស្រុក៖ «ប្រហែលជាមានកិច្ចការការងារ ឬក៏ចំណាកស្រុកទៅប្រទេសក្រៅអីហើយ ប្រសិនបើនៅក្នុងស្រុកគាត់ចូលរួមចំណែកបំពេញកាតព្វកិច្ចអស់ហើយ»។
នៅខេត្តព្រៃវែង មានឃុំ-សង្កាត់ចំនួន១១៦ ហើយមានគណបក្សនយោបាយចំនួន៨ ចូលរួមប្រកួតប្រជែង ប៉ុន្តែលទ្ធផលក្រៅផ្លូវការបង្ហាញថា មានតែគណបក្សសង្គ្រោះជាតិ មួយប៉ុណ្ណោះដែលបានដណ្ដើមជ័យជម្នះចំនួន ៤៣ឃុំ។
ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តព្រៃវែង អះអាងថា ខេត្តមួយនេះពុំមានពាក្យបណ្ដឹងពីគណបក្សនយោបាយនោះទេរហូតមកដល់ពេលនេះ។
បើទោះបីជាមានពលរដ្ឋមួយចំនួនខកខានមិនបានទៅបោះឆ្នោតក្តី ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តស្វាយរៀង និងខេត្តព្រៃវែង អះអាងថា ស្ថានភាពទូទៅនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅខេត្តស្វាយរៀង មានភាពល្អប្រសើរជាងអាណត្តិមុនៗ ទោះបីជាមានភាពមិនប្រក្រតីខ្លះៗកើតឡើង។ ភាពមិនប្រក្រតីទាំងនោះមានដូចជា កម្លាំងនគរបាល និងអាជ្ញាធរមូលដ្ឋាន តែងតែឈរជើងនៅកៀកការិយាល័យបោះឆ្នោត ហើយគេក៏សង្កេតឃើញថា នៅតាមការិយាល័យបោះឆ្នោតខ្លះមានជនជាតិវៀតណាម ច្រើន ចូលរួមបោះឆ្នោត ដូចជានៅសង្កាត់បាវិត ជាដើម៕