អាជ្ញាធរនៅស្រុកឱរ៉ាល់ ខេត្តកំពង់ស្ពឺ ចោទប្រជាសហគមន៍ដែលព្យាយាមរារាំងកងទាហាន «ង៧០» មិនឲ្យឈូសឆាយដីព្រៃជាង ៧០ហិកតារ ថាមានបំណងបង្កើតតំបន់អបគមន៍ ក៏ប៉ុន្តែប្រជាសហគមន៍ច្រានចោលការចោទប្រកាន់នេះ។
ដូចការគ្រោងទុក ប្រជាសហគមន៍ក្នុងតំបន់ព្រៃអភិរក្សស្រែពស់ នៃឃុំត្រពាំងជោរ ទាហានមកពីកងពល «ង៧០» អាជ្ញាធរស្រុក និងមន្ត្រីមន្ទីរបរិស្ថាន បានប្រជុំគ្នាដើម្បីពិភាក្សារឿងជម្លោះដីព្រៃនេះ។
នៅក្នុងកិច្ចពិភាក្សានេះ មន្ត្រីបរិស្ថានចោទប្រជាសហគមន៍ដែលហាមទាហានមិនឲ្យឈូសដីព្រៃកាលពីថ្ងៃទី១២ ខែមិថុនា ឆ្នាំ២០១៧ ថាកំពុងដើរញុះញង់កៀរគរប្រជាពលរដ្ឋបង្កើតតំបន់អបគមន៍។
លោក ឈួន ឈៀហេង មន្ត្រីមន្ទីរបរិស្ថានខេត្តកំពង់ស្ពឺ ប្រាប់ប្រជាសហគមន៍កុំឲ្យជឿមេខ្លោងញុះញង់ឲ្យទប់ស្កាត់ការឈូសឆាយដីព្រៃរបស់ទាហាន «ង៧០» ដែលលោកថាមានលិខិតទទួលស្គាល់ត្រឹមត្រូវ។ លោកថា ការព្យាយាមរារាំងនេះ គឺដើម្បីទទួលបានប្រយោជន៍ផ្ទាល់ខ្លួន៖ «កុំជឿតាមជនអគតិមួយចំនួនគ្រាន់តែបង្កើតបញ្ហា។ គ្មានអ្នកណាដោះស្រាយបញ្ហាទេ។ ជនញុះញង់ទាំងនោះបង្កើតបញ្ហា ដើម្បីទទួលបានផលប្រយោជន៍ ហើយបញ្ហាកើតឡើងហើយ គេនឹងដើរចោលបញ្ហា។ អ្នកដែលយកបញ្ហាទៅ គ្មានអ្នកណាដោះស្រាយក្រៅពីអាជ្ញាធរ អ្នកជំនាញដែលជាមន្ត្រីរបស់រដ្ឋាភិបាលទេ»។
ទោះបីជាយ៉ាងណា ប្រជាសហគមន៍បានច្រានចោលការចោទប្រកាន់នេះ។ ពួកគាត់អះអាងថា ការព្យាយាមរារាំងក្រុមទាហាន «ង៧០» មិនឲ្យប្រើគ្រឿងយន្តឈូសឆាយដីព្រៃ គឺដើម្បីថែរក្សាតំបន់ព្រៃអភិរក្សការពារដោយព្រះរាជក្រឹត្យ។ ពួកគាត់បន្តថា ដីសម្បទានឲ្យទាហាន «ង៧០» ចំនួន ១២គ្រួសារជាន់លើដីព្រៃការពារ។
លោក ម៉ុន អ៊ី ពលរដ្ឋដែលចូលរួមរារាំងក្រុមទាហាន «ង៧០» លើកឡើងថា ប្រជាសហគមន៍ចង់ឲ្យអាជ្ញាធរដោះស្រាយបញ្ហានេះដោយយុត្តិធម៌៖ «ជាសំណូមពររបស់ខ្ញុំ គឺបើសិនជាដីដែលពួកខ្ញុំការពារនេះ កាត់ជូនកងទ័ព ១២គ្រួសារ សុំឲ្យពិនិត្យលើសំណើ។ គាត់ស្នើសុំ ១២គ្រួសារក្នុងមួយគ្រួសារតែ ៥ហិកតារទេ តែដល់ពេលចេញមកជាក់ស្តែង ក្នុងឯកសារ ឬក្នុងផែនទីដែលពង្រាងឈូសឆាយ រាល់ការកាយព្រំរបស់គាត់ដែលមិនទាន់ដាច់ស្រេច ក៏ខុសពីអ្វីដែលពង្រាងនៅក្នុងផែនទី»។
សហគមន៍ព្រៃឈើអម្ពរស្រែពស់ ត្រូវបានបង្កើតឡើងកាលពីឆ្នាំ២០០៣ ដើម្បីចូលរួមការពារព្រៃអភិរក្ស និងប្រើប្រាស់ព្រៃ។
ក៏ប៉ុន្តែអនុប្រធានមន្ទីរបរិស្ថានខេត្តកំពង់ស្ពឺ លោក នៅ ណាក់ សង្កេតឃើញថា បច្ចុប្បន្ន សហគមន៍នេះមិនមានរចនាសម្ព័ន្ធគ្រប់គ្រងច្បាស់លាស់។ លោកសម្រេចប្រកាសចងក្រងសហគមន៍សាជាថ្មី ហើយវាស់វែងដីព្រៃសហគមន៍ឡើងវិញ៖ «ខ្ញុំនឹងបង្កើតសហគមន៍សាជាថ្មី។ សហគមន៍ឥឡូវមិនដឹងក្បាលកន្ទុយនៅណាទេ។ នឹងបង្កើត ហើយធ្វើសំណើតែម្តង។ ដាក់ចំនួនគ្រួសារប៉ុន្មាន ចំនួនភូមិប៉ុន្មាន ចំនួនផ្ទៃដីប៉ុន្មាន តាមស្ថានភាពជាក់ស្តែង កុំឲ្យដាក់ទៅប៉ះកន្លែងគេអាស្រ័យផល។ យើងទៅពិនិត្យជាក់ស្តែងទាំងអស់គ្នា ដើម្បីបង្កើតសហគមន៍សាជាថ្មីនៅពេលនេះ ចាប់ពីពេលនេះតទៅ»។
ទាក់ទងនឹងរឿងរចនាសម្ព័ន្ធសហគមន៍នេះ ប្រជាសហគមន៍ដែលចូលរួមឃាត់គ្រឿងយន្តរបស់ទាហាន «ង៧០» ចោទប្រធានសហគមន៍បច្ចុប្បន្នថាកំពុងឃុបឃិតជាមួយក្រុមទាហាន និងអាជ្ញាធរ ដើម្បីរំលោភយកដីព្រៃសហគមន៍។ ពួកគាត់បង្ហាញឯកសារនៅក្នុងពេលប្រជុំថា អនុប្រធានភូមិក៏បានដើរបញ្ចុះបញ្ចូលប្រជាសហគមន៍ឲ្យផ្ដិតមេដៃលក់ដី ជាថ្នូរនឹងប្រាក់ ៣០០ដុល្លារសហរដ្ឋអាមេរិក។ ក៏ប៉ុន្តែអនុប្រធានភូមិពោធិ៍មាស លោក ឈួន សាវុធ ចោទប្រជាសហគមន៍ល្បាតព្រៃ ថាកំពុងប្រជែងយកឥទ្ធិពលគ្រប់គ្រងដីព្រៃយកដីសហគមន៍ចែកគ្នា ហើយពេលចុះល្បាតព្រៃ ប្រជាសហគមន៍មិនបានផ្តល់របាយការណ៍មកឲ្យលោកនោះទេ។
តែប្រជាសហគមន៍ថ្លែងបកវិញថា ទោះបីជាអញ្ជើញក៏ដោយ លោក ឈួន សាវុធ មិនបានចូលរួមជាមួយប្រជាសហគមន៍ល្បាតព្រៃនោះទេ។
មន្ត្រីការិយាល័យសហគមន៍ព្រៃឈើខេត្តកំពង់ស្ពឺ លោក សាំង សំណាង លើកក្នុងអង្គប្រជុំថា ភាពមិនច្បាស់លាស់នៃព្រំប្រទល់ដីព្រៃ ជាឧបសគ្គដោះស្រាយជម្លោះដីព្រៃជាង ៧០ហិកតាររវាងប្រជាសហគមន៍ និងទាហាន «ង៧០» ទាំង ១២គ្រួសារ។ លោកស្នើឲ្យធ្វើបច្ចុប្បន្នភាពព្រំប្រទល់ដីព្រៃសហគមន៍នេះ ដើម្បីបញ្ចប់ជម្លោះ ហើយឲ្យប្រជាសហគមន៍ធ្វើសម្បទានគ្នាទៅវិញទៅមករវាងភាគីទាំងពីរ។
លោក អៀម ម៉ៅ វរសេនីយ៍ឯកកងពល «ង៧០» ដែលដឹកនាំកម្លាំងឈូសដីព្រៃ អះអាងថា ដីទាំងប្រមាណ ៧៨ហិកតារ (៧៧,៩ហិកតារ) ជាដីសម្បទានសង្គមកិច្ចដែលរដ្ឋាភិបាលផ្តល់ឲ្យគ្រួសារកងទ័ពទាំង ១២គ្រួសារ ហើយលោកថា ប្រសិនបើប្រជាសហគមន៍នៅបន្តរារាំងមិនឲ្យឈូសដីព្រៃនេះទៀត ក្រុមលោកនឹងប្រើកម្លាំងបង្ក្រាប។
ពេលប្រជុំ អភិបាលរងស្រុកឱរ៉ាល់ លោក ប៊ុន វិចិត្រ ហាមប្រជាសហគមន៍មិនឲ្យទៅរារាំងក្រុមទាហាន «ង៧០» ក្រោយពេលអាជ្ញាធរសម្រេចថា ដីព្រៃដែលទាហានកំពុងឈូសឆាយ គឺស្របតាមច្បាប់៕
