មន្ត្រីគណបក្សសង្គ្រោះជាតិ ខេត្តកំពង់ធំ យល់ថា ការមិនអនុញ្ញាតឱ្យគណបក្សរបស់ខ្លួនអាចធ្វើពិធីជួបជុំ និងឃោសនាបោះឆ្នោតនៅសួនច្បារសាធារណៈក្នុងក្រុង គឺបង្ហាញពីការអនុវត្តច្បាប់មិនបានស្មើភាពគ្នា និងរើសអើងគណបក្សនយោបាយ។ ពួកគេបញ្ជាក់ថា ទីតាំងតែមួយនោះ គណបក្សកាន់អំណាចធ្វើពិធីជួបជុំឃោសនាកាលពីថ្ងៃឃោសនាថ្ងៃទី១ បាន ប៉ុន្តែបែរជាមិនអនុញ្ញាតឱ្យគណបក្សប្រឆាំងធ្វើទៅវិញ។
មន្ត្រីគណបក្សសង្គ្រោះជាតិ បង្ហាញជំហរថា នឹងយកទីតាំងសួនច្បារកំពង់ក្របៅ សង្កាត់កំពង់ក្របៅ ក្រុងស្ទឹងសែន ធ្វើពិធីជួបជុំ និងឃោសនាបោះឆ្នោតដដែល បើទោះបីជាទីតាំងនេះអាជ្ញាធរខេត្តមិនអនុញ្ញាតក្ដី។
ប្រធានប្រតិបត្តិគណបក្សសង្គ្រោះជាតិ ខេត្តកំពង់ធំ លោក ស៊ុន ចន្ធី មានប្រសាសន៍ថា ការប្រកាន់ជំហរបែបនេះ គឺធ្វើឡើងស្របតាមច្បាប់ស្ដីពីការបោះឆ្នោតក្រុមប្រឹក្សាឃុំ-សង្កាត់ ក្នុងការអនុវត្តច្បាប់ឱ្យបានស្មើភាពគ្នាប៉ុណ្ណោះ។ លោកថា ការអនុវត្តច្បាប់របស់អាជ្ញាធរខេត្ត រើសអើងគណបក្សសង្គ្រោះជាតិ ពីព្រោះទីតាំងតែមួយ គណបក្សកាន់អំណាចអាចធ្វើពិធីជួបជុំឃោសនាបានកាលពីថ្ងៃទី២០ ខែឧសភា ប៉ុន្តែគណបក្សប្រឆាំងបែរជាអាជ្ញាធរជំទាស់ ក្រោមហេតុផលបញ្ចៀសការកកស្ទះចរាចរណ៍ និងរក្សាសណ្ដាប់ធ្នាប់សាធារណៈ។
ហេតុផលទាំងនេះ លោក ស៊ុន ចន្ធី យល់ថា ជាការបង្ហាញពីកម្សោយរបស់អាជ្ញាធរក្នុងការថែរក្សាសណ្ដាប់ធ្នាប់សាធារណៈ និងជាអនុវត្តច្បាប់មិនបានស្មើភាពគ្នា៖ «ដូច្នេះការដែលអាជ្ញាធរបដិសេធដំណើររបស់គណបក្សសង្គ្រោះជាតិ គឺជាការអនុវត្តផ្ទុយទៅនឹងច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ ហើយជាគោលការណ៍មួយដែលអាជ្ញាធរខេត្តមិនបានអនុវត្តទៅនឹងគោលការណ៍ស្មើភាពគ្នា»។
កាលពីថ្ងៃទី២៤ ឧសភា អភិបាលរងខេត្ត និងជាអ្នកនាំពាក្យសាលាខេត្តកំពង់ធំ លោក គង់ វិមាន បានចេញលិខិតមួយឆ្លើយតបនឹងសំណើរបស់មន្ត្រីគណបក្សសង្គ្រោះជាតិ ដោយមិនអនុញ្ញាតឱ្យយកទីតាំងទីសួនច្បារកំពង់ក្របៅ ដើម្បីជួបជុំឃោសនាបោះឆ្នោតឡើយ ក្រោមហេតុផលថា ទីតាំងនោះតូចចង្អៀត មិនមានផ្លូវសម្រាប់បញ្ចៀសចរាចរណ៍ ហើយនៅកៀកនឹងគល់ស្ពានស្ទឹងសែន ងាយនឹងធ្វើឱ្យកកស្ទះចរាចរណ៍ប៉ះពាល់ដល់ប្រជាពលរដ្ឋ។
អាស៊ីសេរី មិនអាចទាក់ទងអ្នកនាំពាក្យសាលាខេត្តកំពង់ធំ លោក គង់ វិមាន ដើម្បីសាកសួរបន្ថែមជុំវិញបញ្ហានេះបានទេ នៅថ្ងៃទី២៦ ខែឧសភា។
យ៉ាងនេះក្តី កាលពីថ្ងៃទី២៥ ខែឧសភា អភិបាលខេត្តកំពង់ធំ លោក សុខ លូ បានចេញលិខិតមួយទៀតមិនអនុញ្ញាតតាមការស្នើសុំទីតាំងជួបជុំនៅសួនច្បារកំពង់ក្របៅ ដដែល។ លិខិតនេះ ដើម្បីឆ្លើយតបនឹងគោលជំហររបស់គណបក្សសង្គ្រោះជាតិ ដែលចង់យកទីតាំងនោះជួបជុំឃោសនាការបោះឆ្នោតរបស់ខ្លួន។ ក្នុងលិខិតនោះបញ្ជាក់ថា អាជ្ញាធរខេត្តមិនដែលអនុញ្ញាតឱ្យគណបក្សប្រជាជនកម្ពុជា រៀបចំពិធីជួបប្រជុំនៅសួនច្បារកំពង់ក្របៅ នៅថ្ងៃបើកយុទ្ធនាការឃោសនាការបោះឆ្នោតទេ។ តាមពិតគណៈកម្មការរៀបចំការបោះឆ្នោតសង្កាត់កំពង់ក្របៅ បានអនុញ្ញាតតាមប្រតិទិនដែលគណបក្សប្រជាជនកម្ពុជា ស្នើសុំក្នុងថ្ងៃឃោសនាដំបូង ជាលក្ខណៈទ្រង់ទ្រាយតូចក្នុងសង្កាត់របស់ខ្លួនប៉ុណ្ណោះ។ ចំណែកការស្នើសុំរៀបចំពិធីជួបជុំរបស់គណបក្សសង្គ្រោះជាតិ ក្រោមអធិបតីភាពប្រធានគណបក្សលោក កឹម សុខា គឺធ្វើឡើងជាទ្រង់ទ្រាយធំ និងមានសមាជិកច្រើនមកពីតាមបណ្ដាក្រុង និងស្រុកមួយចំនួននៅខេត្តកំពង់ធំ លើផ្លូវតូចចង្អៀត គ្មានកន្លែងបញ្ចៀសចរាចរណ៍ ហើយជាកន្លែងកៀកគល់ស្ពាន ងាយនឹងធ្វើឱ្យកកស្ទះចរាចរណ៍ដល់ប្រជាពលរដ្ឋ។
មន្ត្រីសម្របសម្រួលផ្នែកអង្កេតអង្គការខុមហ្វ្រែល (COMFREL) លោក កន សាវាង្ស យល់ឃើញថា ហេតុផលរបស់អាជ្ញាធរខេត្ត គឺមិនត្រឹមត្រូវឡើយ ពីព្រោះគោលការណ៍ស្មើភាពគ្នាក្នុងករណីទីតាំងតែមួយ ប្រសិនបើគណបក្សមួយអាចរៀបចំបាន គណបក្សមួយទៀតក៏អាចរៀបចំនៅទីតាំងនោះបានដែរ៖ «អ៊ីចឹងគួរពិចារណាឡើងវិញទៅ ហើយយើងធ្វើការសម្របសម្រួលគ្នាទៅដើម្បីជៀសវាងបញ្ហាណាមួយកើតឡើងនេះគឺជាការប្រសើរហើយ»។
មន្ត្រីសង្គមស៊ីវិលដដែលបញ្ជាក់ថា ប្រសិនបើនៅថ្ងៃគណបក្សប្រឆាំងរៀបចំវេទិកាឃោសនាការបោះឆ្នោតរបស់ខ្លួននៅលើទីតាំងដែលបានស្នើសុំ ហើយមានសកម្មភាពរារាំងណាមួយពីសំណាក់អាជ្ញាធរ គឺបង្ហាញកាន់តែច្បាស់ពីការរើសអើងគណបក្សនយោបាយតែម្ដង។
អាជ្ញាធរខេត្តកំពង់ធំ បានចេញលិខិតបដិសេធសំណើរបស់គណបក្សសង្គ្រោះជាតិ ៣ លើករួចមកហើយ។ មន្ត្រីគណបក្សប្រឆាំងបានស្នើសុំទីតាំងពីរកន្លែងនៅទីរួមខេត្តកំពង់ធំ និងមួយកន្លែងទៀតនៅមុខផ្សារកំពង់ថ្ម ស្រុកបារាយណ៍ ប៉ុន្តែត្រូវបានអាជ្ញាធរបដិសេធទាំងអស់ ក្រោមហេតុផលថា ដើម្បីរក្សាសន្តិសុខសណ្ដាប់ធ្នាប់ និងបញ្ចៀសការកកស្ទះចរាចរណ៍។ អាជ្ញាធរតម្រូវឱ្យមន្ត្រីគណបក្សប្រឆាំងរៀបចំពិធីនៅទីតាំងផ្សេង ប៉ុន្តែមន្ត្រីគណបក្សសង្គ្រោះជាតិ បញ្ជាក់ថា ជាទីតាំងមិនល្អ ឬមិនសូវមានចាប់ការអារម្មណ៍ពីប្រជាពលរដ្ឋម្ចាស់ឆ្នោត៕
