មន្ត្រីសង្គមស៊ីវិលជំរុញឲ្យអាជ្ញាធរ និងតុលាការខេត្តរតនគិរី ស៊ើបអង្កេត បុគ្គលនៅពីក្រោយខ្នង ជនជាតិវៀតណាម ១២នាក់ ឆ្លងដែនចូលដីខ្មែរខុសច្បាប់ និងយកគ្រឿងចក្រពីប្រទេសវៀតណាម មកឈូសឆាយព្រៃក្នុងតំបន់ព្រៃហាមឃាត់។ ការលើកឡើងនេះ ក្រោយពីតុលាការខេត្តរតនគិរី សម្រេចឃុំខ្លួនជនជាតិវៀតណាមទាំង ១២នាក់នោះ ក្នុងពន្ធនាគារកាលពីពេលថ្មីៗ នេះ ពីបទឆ្លងដែនចូលដីខ្មែរខុសច្បាប់ និងឈូសឆាយព្រៃអភិរក្សក្នុងស្រុកតាវែង ជាប់ព្រំប្រទល់ប្រទេសវៀតណាម។
មន្ត្រីនាំពាក្យសមាគម អាដហុក លោក សឹង សែនករុណា ឲ្យដឹងនៅថ្ងៃទី២៣ មេសាថា ហេតុផលសំខាន់ដែលលោកចង់ឲ្យតុលាការ និងអាជ្ញាធរពាក់ព័ន្ធ គឺត្រូវចាត់វិធានការរកអ្នកដែលឃុបឃិត អនុញ្ញាតឲ្យជនជាតិវៀតណាមទាំងនោះ ចូលដីខ្មែរខុសច្បាប់ និងយកគ្រឿងចក្រពីប្រទេសវៀតណាមចូលដោយគ្មានលិខិតអនុញ្ញាត ដើម្បីទប់ទល់កុំឲ្យបាតុភាពអាក្រក់នេះកើតឡើងលើកក្រោយទៀត។ លោកបញ្ជាក់ថា តុលាការគួរតែស្រាវជ្រាវ រកជនណាដែលពាក់ព័ន្ធករណីនេះ ឲ្យមកទទួលខុសត្រូវតាមច្បាប់ បំណងការពារបូរណភាពទឹកដីកម្ពុជា និងធនធានធម្មជាតិក្នុងប្រទេសកម្ពុជា៖ «គ្រឿងចក្រទាំងអស់ហ្នឹង ប្រសិនជាមិនមានអ្នកពាក់ព័ន្ធផ្សេងទៀត អាចថា ជា អាជ្ញាធរក្នុងតំបន់ ដែលគាត់យកចូលមកហ្នឹងផងដែរ។ ហេតុអ្វីបានយកមកបានប្រសិនជាគ្មានការសហការ ការផ្ដល់ និងការអនុញ្ញាតពីអ្នកទាំងអស់ហ្នឹង។ អីចឹងយើងចាប់ផ្ដើមធ្វើការស្រាវជ្រាវ ប្រសិនបើរកឃើញថា ជនណាម្នាក់ ដែលមានការពាក់ព័ន្ធលើអំពើខុសច្បាប់ទាំងអស់ហ្នឹងគួរតែ មានចំណាត់ការទៅ ដើម្បីទប់ស្កាត់ កុំឲ្យមានអំពើបែបហ្នឹងកើតឡើង»។
កាលពីថ្ងៃទី១៦ មេសា មន្ត្រីអាវុធហត្ថខេត្តរតនគិរី បានឃាត់ខ្លួនជនជាតិវៀតណាម ១២នាក់ និងគ្រឿងចក្រ ៦គ្រឿង ក្នុងតំបន់ឧទ្យានជាតិវីរៈជ័យ របស់ឃុំតាវែងលើ ស្រុកតាវែង។ កាសែតក្នុងស្រុកចុះផ្សាយថា ជនជាតិវៀតណាមទាំងនោះ បានចូលមកដោយខុសច្បាប់ តាមច្រកព្រៃ ក្នុងភូមិសាស្ត្រ ប៉ុស្តិ៍នគរបាលការពារព្រំដែនគោកលេខ ៥០៥ ក្នុងខេត្តរតនគិរី ជាប់ប្រទេសវៀតណាម។ លើសពីនេះ បុគ្គលដែលកាងការពារជនជាតិវៀតណាមទាំងនោះចូលដីខ្មែរបាន គឺជាមន្ត្រីអាវុធហត្ថម្នាក់ នៅខេត្តរតនគិរី ដែលល្បីខាងជួញដូរឈើខុសច្បាប់ ឆ្លងដែនទៅលក់នៅក្រៅប្រទេស និងជាប់ពាក់ព័ន្ធឃុបឃិតឲ្យមានការយកគ្រឿងចក្រ ពីប្រទេសវៀតណាមចូលមកកម្ពុជា។
ឆ្លើយតបរឿងនេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់អាស៊ីសេរីនៅថ្ងៃទី២៣ មេសាថា ជំហានដំបូងនៅគ្រាដែលកាសែតក្នុងស្រុកចុះផ្សាយករណីនេះ អាវុធហត្ថលើផ្ទៃប្រទេស បានបញ្ជាឲ្យមេបញ្ជាការអាវុធហត្ថខេត្តកោះហៅ មន្ត្រីអាវុធហត្ថម្នាក់នោះ មកឆ្លើយបំភ្លឺរួចហើយ។ លោកថា បុគ្គលនោះបដិសេធថា មិនជាប់ពាក់ព័ន្ធបទល្មើសព្រៃឈើ និងកាងការពារជនជាតិវៀតណាមទាំងនោះទេ។ តែទោះយ៉ាងណាលោកថា កម្លាំងអាវុធហត្ថនៅតែបន្តស្រាវជ្រាវសំណុំរឿងនេះឲ្យស៊ីជម្រៅ ដោយតម្លាភាព និងយុត្តិធម៌? លោកសង្កត់ធ្ងន់ៗ ថា ជំហររបស់កងរាជអាវុធហត្ថនឹងចាត់វិធានការ ចំពោះមន្ត្រីអាវុធហត្ថណា មិនត្រឹមតែពាក់ព័ន្ធបទល្មើសព្រៃឈើទេ ឲ្យតែប្រព្រឹត្តល្មើសច្បាប់ និងវិន័យ ត្រូវតែអនុវត្តច្បាប់ និងវិន័យរដ្ឋបាល៖ «បុគ្គលនោះបានសារភាពថា មិនជាប់ពាក់ព័ន្ធសាច់រឿងហ្នឹងដូចកាសែតបានចុះទេ ក៏ប៉ុន្តែទោះបីយ៉ាងណាក៏ដោយ ក្នុងការធ្វើឲ្យមានតម្លាភាព និងយុត្តិធម៌ គឺកម្លាំងរបស់កងរាជអាវុធហត្ថ គឺនៅតែធ្វើការស្រាវជ្រាវបន្ត តើកងរាជអាវុធហត្ថដែលគេចុះផ្សាយនោះ មានពាក់ព័ន្ធឬអត់។ ដូច្នេះខាងអធិការកិច្ចនៅតែចុះស្រាវជ្រាវជាបន្តបន្ទាប់»។
ទោះយ៉ាងណា ព្រះរាជអាជ្ញាអមសាលាដំបូង ខេត្តរតនគិរី លោក ជា ពេជ្រ មានប្រសាសន៍ថា មកទល់ពេលនេះ សំណុំរឿងជនជាតិវៀតណាម ១២នាក់នោះ ផុតពីដៃអយ្យការ ហើយចៅក្រមស៊ើបសួរកំពុងបន្តអនុវត្តនីតិវិធី។ លោកថា ជនជាតិវៀតណាម ១២នាក់នោះ តំណាងអយ្យការចោទប្រកាន់ទី១ ឆ្លងដែនខុសច្បាប់ ទី២ នាំគ្រឿងចក្រចូលដីខ្មែរដោយគ្មានច្បាប់អនុញ្ញាត និងទី៣ ឈូសឆាយព្រៃក្នុងតំបន់ហាមឃាត់ ដែលមានចែងក្នុងមាត្រា ៦២ នៃច្បាប់ស្ដីពីព្រៃឈើ៖ «អធិការក្នុងហ្នឹងយើងចោទប្រកាន់ទី១ ពាក់ព័ន្ធការឆ្លងដែនខុសច្បាប់ ទី២ នាំគ្រឿងចក្រចូលគ្មានច្បាប់អនុញ្ញាត ច្បាប់ព្រៃឈើមាត្រា ៥៨ ហើយមួយទៀត យើងចោទពាក់ព័ន្ធការឈូសឆាយដីហាមឃាត់ ដែលមានចែងក្នុងមាត្រា ៦២ នៃច្បាប់ព្រៃឈើ។ អីចឹងមាត្រា ៣ហ្នឹង មានការចោទប្រកាន់បញ្ជូនទៅ»។
អាស៊ីសេរីនៅមិនទាន់អាចទាក់ទង ចៅក្រមស៊ើបសួរសាលាដំបូង ខេត្តរតនគិរីលោក ឡេង វណ្ណារិទ្ធ ដើម្បីសុំការពន្យល់បន្ថែមសំណុំរឿងនេះបានទេ នៅថ្ងៃទី២៣ មេសា។
ក៏ប៉ុន្តែលោកប្រាប់កាសែតភ្នំពេញប៉ុស្តិ៍ថា តុលាការសម្រេចចោទប្រកាន់ជនជាតិវៀតណាមទាំងនោះ ២ករណី ទី១ ឆ្លងដែនខុសច្បាប់ និងទី២ នាំគ្រឿងចក្រចូលដីខ្មែរ ឈូសឆាយព្រៃធ្វើជាកម្មសិទ្ធិ។
មន្ត្រីឃ្លាំមើលសិទ្ធិមនុស្ស លោក ស៊ឹង សែនករុណា ចង់ឃើញតុលាការមានវិធានការច្បាប់តឹងរ៉ឹង ក្នុងសំណុំរឿងនេះ ដើម្បីទប់ស្កាត់កុំឲ្យជាតិសាសន៍ដទៃឈ្លានពានទឹកដីកម្ពុជាដោយខុសច្បាប់ និងប្រព្រឹត្តបទល្មើសព្រៃឈើតាមអំពើចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
