ក្រុមសហជីពលើកឡើងថា របបក្រុងភ្នំពេញ នៅមិនទាន់បង្ហាញពីដំណើរការជជែកពិភាក្សា ការកំណត់ប្រាក់ឈ្នួលគោលសម្រាប់កម្មករវិស័យសំណង់ និងសេវាកម្មនៅឡើយទេ រហូតមកដល់ពេលនេះ។ ការលើកឡើងនេះ បន្ទាប់ពីលោក ហ៊ុន សែន កាលពីចុងឆ្នាំ២០១៨កន្លងទៅ ប្រកាស ជំរុញឱ្យក្រសួងស្ថាប័ន ពាក់ព័ន្ធជាពិសេសក្រសួងការងារ រួមគ្នាពិភាក្សាកំណត់ប្រាក់ឈ្នួលអប្បបរមាក្នុងវិស័យសំណង់ និងសេវាកម្មជាដើម។
ក្រុមសហជីពដែលធ្វើការខាងវិស័យសំណង់ និងសេវាកម្ម សង្ស័យថា ក្រសួងស្ថាប័នពាក់ព័ន្ធមាន ក្រសួងរៀបចំដែនដី និងក្រសួងការងារជាដើម មិនទាន់បានអនុវត្តតាមប្រសាសន៍របស់លោក ហ៊ុន សែន នៅឡើយអំពីផែនការកំណត់ប្រាក់ឈ្នួលគោលដល់កម្មករសំណង់ និងកម្មករសេវាកម្ម ជាដើម។
អគ្គលេខាធិការសហព័ន្ធសហជីពកម្មករសំណង់ និងព្រៃឈើ (BWTUC) លោក យ៉ាន់ ធី លើកឡើង ថា រហូតមកដល់ពេលនេះ លោកមិនទាន់ទទួលបានព័ត៌មានណាមួយ ឬក៏ការអញ្ជើញពីខាងរដ្ឋាភិបាល ដើម្បីចូលរួមជជែកលើបញ្ហាកំណត់ប្រាក់ឈ្នួលនៅឡើយទេ ក្រោយពីការប្រកាសរបស់ លោក ហ៊ុន សែន។ លោក ក៏មិនទាន់ដឹងថា ខាងក្រសួងការងារ កំពុងរៀបចំដំណើរការនេះ យ៉ាង សម្ងាត់ ឬក៏មិនទាន់បានអនុវត្តតាមប្រសាសន៍របស់លោក ហ៊ុន សែន នោះដែរ។ ទោះយ៉ាងណាក្តី លោកអះអាងថា ប្រសិនបើខាងក្រសួងការងារ ឬក្រសួងដែនដី ពិតជាបានចាប់ផ្ដើមដំណើរការ ជជែកពីរឿងកំណត់ប្រាក់ឈ្នួលនោះ គឺត្រូវតែមានការចូលរួមពីខាងតំណាងកម្មករ និងភាគី និយោជក ឬក្រុមហ៊ុនដែរ៖ «ខ្ញុំគិតថា វាចាំបាច់ត្រូវតែកំណត់ប្រាក់ឈ្នួល និងមួយទៀតទាក់ទងនឹងសុខភាពសុវត្ថិភាពដែលត្រូវយកចិត្តដាក់។ វិស័យសំណង់រីកចម្រើនខ្លាំង តែការយកចិត្តទុកដាក់លើកម្មករ នៅមានកម្រិតនៅឡើយ។ ពួកគាត់ធ្វើការប្រឈមខ្ពស់ ដូចជាឆក់ខ្សែភ្លើង និងធ្លាក់ពីលើអាគារខ្ពស់ រហូតដល់ស្លាប់ជាដើម។ ដូច្នេះត្រូវតែដោះស្រាយកំណត់ប្រាក់ឈ្នួលជាបន្ទាន់»។
របាយការណ៍ក្រសួងរៀបចំដែនដី បង្ហាញថា ៩ខែ ឆ្នាំ២០១៨ វិស័យសំណង់ បានផ្ដល់ការងារគិតជាមធ្យមពី ២០ម៉ឺន នាក់ ទៅ ២២ម៉ឺននាក់ក្នុងមួយថ្ងៃ។ សម្រាប់ក្រុងភ្នំពេញ មានកម្មករសំណង់ បំពេញការងារជាមធ្យមចន្លោះ ៩ម៉ឺន ទៅ១០ម៉ឺននាក់ក្នុងមួយថ្ងៃ។
ដោយឡែកប្រធានសហជីពប្រចាំក្រុមហ៊ុន ណាហ្គាវើលដ៍ កញ្ញា ឈឹម ស៊ីថរ លើកឡើងថា ខាង កញ្ញា ក៏មិនទាន់ទទួលបានព័ត៌មានណាមួយអំពីដំណើរការ ជជែកពិភាក្សារឿងកំណត់ប្រាក់ឈ្នួល សម្រាប់កម្មករផ្នែកសេវាកម្មតាមសណ្ឋាគារ និងភោជនីយដ្ឋានដែរ។ កញ្ញាសង្ស័យថា ខាងក្រសួង ការងារ និងក្រសួងពាក់ព័ន្ធផ្សេងទៀត មិនទាន់បានធ្វើអ្វីឡើយ។ កញ្ញាប្ដេជ្ញាថា នឹងព្យាយាមជំរុញ ឱ្យមានការកំណត់ប្រាក់ឈ្នួលនេះឱ្យបានឆាប់បំផុត ដើម្បីកុំឱ្យកម្មករផ្នែកសេវាកម្ម បន្តប្រឈមការកេងប្រវ័ញ្ចកម្លាំងពលកម្មខ្លាំងពីខាងក្រុមហ៊ុន៖ «បើយើងនៅតែបណ្ដោយឱ្យអត់មានប្រាក់ឈ្នួលអប្បបរមាទៀតនោះ វាធ្វើឱ្យថៅកែផ្ដល់ប្រាក់ឈ្នួល ស្រេចតែចិត្តគាត់ ដូច្នេះអត់បានគិតគួរពីជីវភាពនិងការចំណាយប្រចាំថ្ងៃរបស់ពួកគាត់ ហើយក្រុមហ៊ុនខ្លះ ចំណូលច្រើនហើយ តែឱ្យប្រាក់ខែបុគ្គលិកទាបអ៊ីចឹង ដូច្នេះវាកើតទៅជារូបភាពកេងប្រវ័ញ្ចកម្លាំងពលកម្មរលើបុគ្គលិក»។
របាយការណ៍របស់ធនាគារពិភពលោកឆ្នាំ២០១៧បង្ហាញថា កម្ពុជាមានកម្លាំងពលកម្មចំនួន ប្រមាណ ៩លាន ៣សែននាក់ ក្នុងនោះវិស័យសេវាកម្មដែលរួមមានវិស័យសណ្ឋាគារ និងទេសចរណ៍ផងនោះ មានចំនួនជាង ៤៦ភាគរយ វិស័យឧស្សាហកម្មមានជាង ២៧ភាគរយ និងកសិកម្មមានជាង ២៦ភាគរយ។
កាលពីថ្ងៃទី១២ ខែធ្នូ ឆ្នាំ២០១៨ កន្លងទៅ ក្នុងជំនួបស្វែងរកគាំទ្រពីកម្មកររោងចក្រនៅខេត្តកំពង់ស្ពឺ លោក ហ៊ុន សែន បានប្រកាសជំរុញឱ្យក្រសួងការងារ និងបណ្ដុះបណ្ដាលវិជ្ជាជីវៈ តំណាងកម្មករនិយោជិក តំណាងនិយោជក និងក្រសួង-ស្ថាប័នពាក់ព័ន្ធទាំងអស់ ត្រូវរួមគ្នាពិភាក្សាឱ្យបានហ្មត់ចត់លើការកំណត់ប្រាក់ឈ្នួលអប្បបរមាក្នុងវិស័យផ្សេងទៀត ដូចជាវិស័យសំណង់ សេវាកម្ម អ្នកបម្រើ ការតាមផ្ទះ និងវិស័យកសិកម្មជាដើម៖ «សំណង់នៅ ធ្វើការតាមភោជនីយដ្ឋាន តាមសណ្ឋាគារក៏នៅធ្វើការតាមផ្ទះក៏នៅ ប៉ុន្តែធ្វើការតាមផ្ទះ ត្រូវប្រយ័ត្នប្រយែង ប្រយ័ត្នទីចុងបំផុត គាត់អត់មានការងារធ្វើ ប៉ុន្តែខ្ញុំនៅតែទទូចស្នើសុំឱ្យមានការកំណត់ទាំងអស់ ដើម្បីធានាថា ប្រទេសរបស់យើងអ្នកធ្វើការ យើងត្រូវដឹង យើងត្រូវដឹងពីចំណូល ហើយជៀសវាងការកេងប្រវ័ញ្ចនៃកម្លាំងពលកម្ម»។
អាស៊ីសេរី បានព្យាយាមទាក់ទងអ្នកនាំពាក្យក្រសួងការងារលោក ហេង សួរ និងអ្នកនាំពាក្យក្រសួង រៀបចំដែន លោក សេង ឡូត ជាច្រើនលើក ប៉ុន្តែមិនមានអ្នកទទួលទូរស័ព្ទ។ ចំណែកអ្នកនាំពាក្យរបបក្រុងភ្នំពេញ លោក ផៃ ស៊ីផាន ក៏មិនទទួលទូរស័ព្ទដែរ។
ក្រុមសហជីពឯករាជ្យ និងកម្មករ ប្ដេជ្ញាថា នឹងបន្តធ្វើការតស៊ូមតិជំរុញ និងធ្វើយុទ្ធនាការដើម្បីទាមទារឱ្យរបបក្រុងភ្នំពេញ យកចិត្តទុកដាក់ដោះស្រាយនូវអ្វីដែលពួកគេទាមទារ និងអ្វីដែលលោក ហ៊ុន សែន បានសន្យាកន្លងមក៕
