តំណាងរាស្ត្រគណបក្សសង្គ្រោះជាតិ ២រូប គ្រោងចូលសួរសុខទុក្ខមន្ត្រី និងសកម្មជនបក្សប្រឆាំងកំពុងជាប់ឃុំចំនួន ១៦នាក់នៅពន្ធនាគារព្រៃស នៅព្រឹកថ្ងៃទី១៩ មេសា។
លិខិតរបស់ក្រសួងមហាផ្ទៃ ផ្ញើទៅកាន់តំណាងរាស្ត្របក្សប្រឆាំងនៅថ្ងៃទី១៨ មេសា បញ្ជាក់ថា អគ្គនាយកដ្ឋានពន្ធនាគារយល់ព្រមអនុញ្ញាតឲ្យតំណាងរាស្ត្រគណបក្សសង្គ្រោះជាតិ ២រូប គឺលោក ឡុង រី អ្នកស្រី មូរ សុខហួរ និងសហការី ៣នាក់ទៀត ចូលជួបសួរសុខទុក្ខជនជាប់ឃុំចំនួន ១៦នាក់នៅថ្ងៃទី១៩ ខែមេសា ឆ្នាំ២០១៧ វេលាម៉ោង ៩ព្រឹក។
ជនជាប់ឃុំទាំង ១៦នាក់នោះរួមមាន អតីតសមាជិកព្រឹទ្ធសភា លោក ហុង សុខហួរ សមាជិករដ្ឋសភា លោក អ៊ុំ សំអាន អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិ មួយចំនួនទៀត៕
